ଭୁବନେଶ୍ୱର,୧୬।୬(ବ୍ୟୁରୋ): ପଞ୍ଜାବ ନ୍ୟାଶନାଲ ବ୍ୟାଙ୍କ (ପିଏନ୍ବି)ର ଷ୍ଟେଶନ ସ୍କୋୟାର ଶାଖାରୁ ୩୨ କୋଟି ଟଙ୍କା ଠକେଇ ମାମଲାରେ ଖୋଳତାଡ଼ ଚଳାଇଛି ସିବିଆଇ। ଠକେଇର ମୁଖ୍ୟ କୁହାଯାଉଥିବା ଗ୍ଲୋବାଲ ଟ୍ରେଡିଂ ସଲ୍ୟୁସନ ଲିମିଟେଡ୍ର ଏମ୍ଡି ଅବିନାଶ ମହାନ୍ତିଙ୍କୁ ଗିରଫ କରିବା ପାଇଁ ସିବିଆଇ ଭୁବନେଶ୍ୱର, ଦିଲ୍ଲୀ, କଲିକତାରେ ଚଢ଼ାଉ କରିଛି। ଏପରିକି ତାଙ୍କ ବାସଭବନ ଓ ସମ୍ପର୍କୀୟଙ୍କ ଘରେ ଚଢ଼ାଉ କରିଥିଲେ ମଧ୍ୟ ଅବିନାଶଙ୍କ ସମ୍ପର୍କରେ କିଛି ପତ୍ତା ମିଳିନାହିଁ। ଅନ୍ୟପକ୍ଷରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏହି ଠକେଇର ଯାଞ୍ଚ କରିବ। ଇଡିର ଜଣେ ଅଧିକାରୀ ସିବିଆଇ ମୁଖ୍ୟାଳୟକୁ ଯାଇ ମାମଲା ସମ୍ପର୍କିତ କିଛି ଦସ୍ତାବିଜ ଆଣିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି।
ପ୍ରବର୍ତ୍ତନ ନିର୍ଦ୍ଦେଶାଳୟର ଜଣେ ଅଧିକାରୀଙ୍କୁ ଏନେଇ ପଚାରିବାରୁ ସେ ଏହା ସ୍ବୀକାର କରିଥିଲେ। ମାମଲା ତଦନ୍ତର ଅଧୀନ ଥିବାରୁ କିଛି କହିବା ଠିକ୍ ନୁହେଁ ବୋଲି ସେ କହିଥିଲେ। ଏହି ଠକେଇରେ କେଉଁମାନେ ସଂପୃକ୍ତ ଅଛନ୍ତି, କେଉଁମାନଙ୍କ ଆକାଉଣ୍ଟକୁ ଟଙ୍କା ଯାଇଛି ଓ ଠକେଇ ହୋଇଥିବା ଅର୍ଥ ବ୍ୟବସାୟରେ ବିନିଯୋଗ ହୋଇଛି କି ନା, ଇଡି ତାହାର ଯାଞ୍ଚ କରିବ। ଠକେଇ ସମୟରେ ପିଏନ୍ବିରେ ଥିବା କେତେକ କର୍ମଚାରୀଙ୍କୁ ମଧ୍ୟ ଇଡି ପଚରାଉଚରା କରିବ। ଏପରିକି ଆର୍ଥିକ ତଦନ୍ତ କ୍ଷେତ୍ରରେ ସିବିଆଇକୁ ଇଡି ସମ୍ପୂର୍ଣ୍ଣ ସହଯୋଗ କରିବ ବୋଲି ଅଧିକାରୀ ଜଣକ କହିଛନ୍ତି। ଉଲ୍ଲେଖଯୋଗ୍ୟ, ଅବିନାଶ ୨୦୧୦ରେ ଗ୍ଲୋବାଲ ଟ୍ରେଡିଂ ସଲ୍ୟୁସନ ଲିମିଟେଡ୍ କମ୍ପାନୀ ଆରମ୍ଭ କରିଥିଲେ। ଏହି କମ୍ପାନୀ ବିଦେଶକୁ ଲୁହାପଥର ରପ୍ତାନି କରୁଥିଲା। ପିଏନ୍ବି ଷ୍ଟେଶନ ସ୍କୋୟାର ଶାଖାରୁ ଋଣ ବାବଦରେ ୩୨କୋଟି ଟଙ୍କା ଉଠାଇବା ପରେ କମ୍ପାନୀ ହଠାତ୍ ଅନ୍ତର୍ଦ୍ଧାନ ହୋଇଯାଇଥିଲା। ପିଏନ୍ବି ସର୍କଲ ମୁଖ୍ୟ ଗଣପତି ଲାଲ ଗତ ୯ ତାରିଖରେ ସିବିଆଇ ଭୁବନେଶ୍ୱର ଶାଖାରେ ଅଭିଯୋଗ କରିଥିଲେ। ଉପରୋକ୍ତ କମ୍ପାନୀର ୫ ଅଧିକାରୀ ଓ ପିଏନ୍ବି ଷ୍ଟେଶନ ସ୍କୋୟାର ଶାଖାର ୪ ଅଧିକାରୀଙ୍କ ବିରୋଧରେ ମାମଲା ରୁଜୁ କରାଯାଇଥିଲା।
