ପାଟଣା,୧୦।୯(ସ୍ବ.ପ୍ର.): କେନ୍ଦୁଝର ଜିଲା ପାଟଣା ରେଞ୍ଜ ଅନ୍ତର୍ଗତ ସାହାରପଡ଼ା ଓ ଗରାଣ୍ଡିଯୋଡି ସେକ୍ସନରେ ସୋମବାର ରାତିରେ ମୟୂରଭଞ୍ଜ ଜିଲା କରଞ୍ଜିଆ ରେଞ୍ଜରୁ ୨୩ଟି ଝାଡ଼ଖଣ୍ଡି ହାତୀ ପଶି ବ୍ୟାପକ ଧାନ ଫସଲ ନଷ୍ଟ କରିଛନ୍ତି।
ସୂଚନା ଅନୁଯାୟୀ, ଏହି ବଣୁଆ ହାତୀଗୁଡ଼ିକ କରଞ୍ଜିଆ ରେଞ୍ଜରୁ ପାଟଣା ରେଞ୍ଜର ବାଇକଳାସ୍ଥିତ ଜଟିଆ ହୁଡ଼ିରେ ଆଶ୍ରୟ ନେଇଥିଲେ। ରାତିରେ ଗୋଜିଟାଙ୍ଗିରି ଓ ବାଇକଳା ଅଞ୍ଚଳ ଧାନ ବିଲରେ ପଶି ଫସଲ ଖାଇବା ସହ ବ୍ୟାପକ କ୍ଷେତ ଦଳିଚକଟି ନଷ୍ଟ କରିଦେଇଛନ୍ତି। ବନବିଭାଗ କର୍ମଚାରୀ ଓ ସ୍ଥାନୀୟ ଲୋକେ ହାତୀଙ୍କୁ ଘଉଡାଇବାରୁ ହାତୀପଲ ମଙ୍ଗଳବାର କରଞ୍ଜିଆ ମୁହାଁ ହୋଇଛନ୍ତି। ଚାଷୀମାନଙ୍କୁ କ୍ଷତିପୂରଣ ଯୋଗାଇଦେବାକୁ ସ୍ଥାନୀୟ ଅଞ୍ଚଳରେ ଦାବି ହୋଇଛି । ଏ ନେଇ ପାଟଣା ରେଞ୍ଜର ପିବିତ୍ରମୋହନ ନାଏକଙ୍କୁ ପଚାରିବାରୁ ହାତୀପଲ ବର୍ତ୍ତମାନ କରଞ୍ଜିଆ ରେଞ୍ଜର ବଡ଼ଦେଉଳିକୁ ଚାଲିଯାଇଥିବା କହିଛନ୍ତି। ରେଞ୍ଜରଙ୍କ ସୂଚନା ଅନୁଯାୟୀ ଗୋଜିଟାଙ୍ଗିରୀ ଗ୍ରାମର ଦୈତାରୀ ନାଏକ, କ୍ଷୀରୋଦ ନାଏକ, ସୁଦର୍ଶନ ନାଏକ ଓ ନିଧି ନାଏକଙ୍କ ଧାନ କ୍ଷେତ ନଷ୍ଟ ହୋଇଛି।
