ଅନୁଗୋଳ ଅଫିସ, ୯।୭ ମାତ୍ର ୨୦ ବର୍ଷ ବୟସରେ ୨୨୪ ପୃଷ୍ଠାର ଉପନ୍ୟାସ ଲେଖିଛନ୍ତି ଅନୁଗୋଳ ସରକାରୀ ସ୍ବୟଂଶାସିତ ମହାବିଦ୍ୟାଳୟର ଛାତ୍ର ପ୍ରଭୁ କଲ୍ୟାଣ ସିଂ। ସେ ଏବେ ଯୁକ୍ତ ୩ ଦ୍ୱିତୀୟ ବର୍ଷ (ଇଂଲିଶ ସମ୍ମାନ)ରେ ଅଧ୍ୟୟନ କରୁଛନ୍ତି। ପ୍ରେମକାହାଣୀ ଉପରେ ଆଧାରିତ ଏହି ଉପନ୍ୟାସ ‘ବ୍ରୋକେନ୍ ପ୍ରୋମିଜେସ୍’ ଚଣ୍ଡିଗଡ଼ର ଏକ ପ୍ରକାଶନ ସଂସ୍ଥା ହ୍ବାଇଟ ଫାଲକନ୍ ପବ୍ଲିଶର ପକ୍ଷରୁ ପ୍ରକାଶ କରାଯାଇଛି। ଏହାକୁ ଲେଖିବା ପାଇଁ ୬ମାସ ଲାଗିଥିବା ପ୍ରଭୁ ପ୍ରକାଶ କରିଛନ୍ତି। ନିଜର ଏହି ସାହିତ୍ୟ କୃତିକୁ ନେଇ ବେଶ୍ ଉତ୍ସାହିତ ଥିବା ପ୍ରଭୁ ସ୍କୁଲ ସମୟର ଇଚ୍ଛା ପୂରଣ ହୋଇଥିବା କହିଛନ୍ତି।
ପ୍ରଭୁଙ୍କ ଘର ଅନୁଗୋଳ ଜିଲା ତାଳଚେର ବ୍ଲକ ବଳରାମପ୍ରସାଦର ଗଡ଼ସାହିରେ। ବାପା ପ୍ରଦୋଷ କୁମାର ସିଂ ନାଲ୍କୋରେ କାର୍ଯ୍ୟ କରୁଥିବାରୁ ସେ ମା’ ଜ୍ୟୋତ୍ସ୍ନାମୟୀ ସିଂଙ୍କ ସହ ନାଲ୍କୋ ଟାଉନଶିପ୍ରେ ରହୁଛନ୍ତି। ନିଜର ଏହି କୃତି ସମ୍ପର୍କରେ ପ୍ରଭୁ କହିଛନ୍ତି, ଜଣେ ବନ୍ଧୁଙ୍କ ଗ୍ରାମରେ ଜନୈକ ଯୁବକଙ୍କ ସହ ଘଟିଥିବା ଏକ ପାରିବାରିକ ଘଟଣା ତାଙ୍କୁ ଉପନ୍ୟାସ ଆକାରରେ ଉତ୍ତାରିବାକୁ ପ୍ରେରଣା ଯୋଗାଇଥିଲା। ପାରିବାରିକ ଚାପରେ କିପରି ସେହି ଯୁବକ ଜଣକ ନିଜ ବଡ଼ଭାଇଙ୍କ ଦୁଇ ପିଲା ଓ ବିଧବା ଭାଉଜଙ୍କୁ ଆପଣେଇବାକୁ ବାଧ୍ୟ ହୋଇଛନ୍ତି, ତାହାକୁ ସେ ଏଥିରେ ସ୍ଥାନିତ କରିଛନ୍ତି। ହେଲେ ମୁଖ୍ୟ ଚରିତ୍ରରେ ଥିବା ସେହି ଯୁବକଙ୍କ ବାସ୍ତବ ଜୀବନରେ ପ୍ରେମିକା ନ ଥିଲେ ବି ଉପନ୍ୟାସରେ କିନ୍ତୁ ପ୍ରଭୁ ତାଙ୍କୁ ଜଣେ ପ୍ରେମିକ ସଜାଇଛନ୍ତି। ଏହି ପ୍ରେମ ଓ ପାରିବାରିକ ବାଧ୍ୟବାଧକତାର କାହାଣୀକୁ ପୁସ୍ତକର ରୂପ ଦେବାକୁ ତାଙ୍କୁ ୬ ମାସ ଲାଗି ଯାଇଥିଲା। ୪ ମାସ ସେ କେବଳ ଲେଖିଥିଲେ। ତ୍ରୁଟି ସଂଶୋଧନ କରିବାକୁ ଆଉ ୨ ମାସ ନେଇଥିଲେ। ୪ ଥର ପ୍ରକାଶନ ସଂସ୍ଥା ନିକଟକୁ ଲେଖା ପଠାଇବା ପରେ ତାହାକୁ ପ୍ରକାଶ ପାଇଁ ଗ୍ରୀନ୍ ସିଗନାଲ ମିଳିଥିଲା ବୋଲି ପ୍ରଭୁ ପ୍ରକାଶ କରିଛନ୍ତି।
