ବ୍ରହ୍ମପୁର ଅଫିସ୍,୮ା୬- ବ୍ରହ୍ମପୁର ସହରରେ ହୁ ହୁ ହୋଇ ବଢ଼ୁଛି ଘରୋଇ ନର୍ସିଂହୋମ୍। ସହରର ଗଳି କନ୍ଦି, ସବୁଆଡ଼େ ଏବେ ନର୍ସିଂହୋମ୍ ଦେଖିବାକୁ ମିଳୁଛି। ଏସବୁରେ ବେପାରକୁ ଅଧିକ ଗୁରୁତ୍ୱ ଦିଆଯାଉଛି। କିନ୍ତୁ ରୋଗୀଙ୍କୁ ଆବଶ୍ୟକ ଚିକିତ୍ସା ସୁବିଧା ମିଳୁନି। ନିଅଁା ଲାଗିଲେ ମୁକାବିଲା ପାଇଁ ବ୍ୟବସ୍ଥା ନାହିଁ। ପଞ୍ଜୀକରଣ ଦୀର୍ଘ ମାସ ହେଲା ସରି ଯାଇଥିଲେ ମଧ୍ୟ ନବୀକରଣ କରାଯାଇନାହିଁ। ଏଭଳି ଅନେକ ଅବ୍ୟବସ୍ଥା ଶୁକ୍ରବାର ପଦାକୁ ଆସିଛି। ଜିଲା ପ୍ରଶାସନର ଏକ ମିଳିତ ଟିମ୍ ସହରର କେତେକ ନର୍ସିଂହୋମ୍ରେ ଚଢ଼ାଉ କରିବା ବେଳେ ଅବ୍ୟବସ୍ଥା ଥିବା ସୂଚନା ମିଳିଛି। ତେବେ ରୋଗୀଙ୍କ ଜୀବନ ସହ ଖେଳୁଥିବା ଏହି ନର୍ସିଂହୋମ୍ଗୁଡ଼ିକ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ। କେବଳ ତାଗିଦ୍ କରି ଛାଡ଼ି ଦିଆଯାଇଛି।
ଫଳରେ ପ୍ରଶାସନର ଚଢ଼ାଉକୁ ନେଇ ମଧ୍ୟ ପ୍ରଶ୍ନ ଉଠିଛି। ଘରୋଇ ନର୍ସିଂହୋମ୍ ପ୍ରତି ପ୍ରଶାସନର ଏଭଳି ଦରଦକୁ ନେଇ ସାଧାରଣରେ ସମାଲୋଚନା କରାଯାଉଛି। ଜିଲାପାଳଙ୍କ ନିର୍ଦ୍ଦେଶକ୍ରମେ ତଥା ଉପଜିଲାପାଳ ଦିଗନ୍ତ କୁମାର ରାଉତରାୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶୁକ୍ରବାର ବ୍ରହ୍ମପୁର ତହସିଲଦାର୍ ତଥା କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଦୟାମୟ ପାଢୀ, ଡ୍ରଗ୍ ଇନ୍ସପେକ୍ଟର ଦେବାଶିଷ କାଲେ, ଜିଲା ଚିକିତ୍ସାଧିକାରୀଙ୍କ କାର୍ଯ୍ୟାଳୟର କିରାଣି ଅଶୋକ କୁମାର ପାଢୀ ପ୍ରମୁଖ ବିଭିନ୍ନ ନର୍ସିଂହୋମ୍ରେ ଚଢ଼ାଉ କରିଥିଲେ। ନୂଆ ବସ୍ଷ୍ଟାଣ୍ଡରେ ଥିବା ସାଇସୁଧା ନର୍ସିଂହୋମ୍ ଏବଂ ଅସ୍ଥା ହସ୍ପିଟାଲ୍ରେ ଚଢ଼ାଉ କରାଯାଇଥିଲା।
ସେହିଭଳି ଅନ୍ୟ ଏକ ଟିମ୍ ଜିଲା ଚିକିତ୍ସାଧିକାରୀ(ଭେଷଜ) ପି.କୁର୍ମୟାଙ୍କ ନେତୃତ୍ୱରେ ସହକାରୀ ଜିଲାପାଳ ତଥା କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ବିନୋଦ କୁମାର ବେହେରା ଏବଂ ଉପଜିଲାପାଳଙ୍କ କାର୍ଯ୍ୟାଳୟର କନିଷ୍ଠ କିରାଣି କାଳୁ ପ୍ରଧାନ। ଏହି ଟିମ୍ ନୂଆବସ୍ଷ୍ଟାଣ୍ଡ ଥିବା ସାହାରା ସେବା ସଦନ ଓ ଯଶୋଦା ନର୍ସିଂହୋମ୍ରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ସରକାରଙ୍କ ନିର୍ଦ୍ଧାରିତ ଗାଇଡ୍ ଲାଇନ୍ ପ୍ରକାରେ ଠିକ୍ ଭାବରେ ନର୍ସିଂହୋମ୍ ପରିଚାଳନା ହେଉ ନ ଥିବା ଜଣାପଡ଼ିଥିଲା। ସେହିଭଳି କ୍ଲିନିକାଲ୍ ରେଜିଷ୍ଟ୍ରେଶନ୍ ପଞ୍ଜୀକରଣ କିମ୍ବା ନବୀକରଣ ମଧ୍ୟ ନାହିଁ। ବର୍ଷ ବର୍ଷ ହେଲା ନବୀକରଣ କରାଯାଇ ନ ଥିବା ଦୃଷ୍ଟିକୁ ଆସିଥିଲା। ଏଥିସହ ଅଗ୍ନି ନିର୍ବାପକ ବ୍ୟବସ୍ଥା ମଧ୍ୟ ନାହିଁ। ଯନ୍ତ୍ର ମଧ୍ୟ ଲଗାଯାଇନାହିଁ। ଏଥି ସହ ବର୍ଜ୍ୟବସ୍ତୁ ପରିଚାଳନା, ବିଦ୍ୟୁତ୍ ନିରାପତ୍ତା ବ୍ୟବସ୍ଥା ନାହିଁ। କର୍ମଚାରୀମାନଙ୍କ ଡ୍ରେସ୍ କୋଡ଼୍ ଓ ପରିଚୟପତ୍ର ନ ଥିଲା। ତେବେ ଯେଉଁମାନେ ସରକାରୀ ନିୟମକୁ ଖିଲାପ୍ କରିଛନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ନେଇ କେବଳ ତାଗିଦ କରି ଛାଡ଼ିଦିଆ ଯାଇଥିଲା। ଆଗାମୀ ଦିନରେ ଗାଇଡ୍ ଲାଇନ୍ ପାଳନ କରା ନ ଗଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କେବଳ ତାଗିଦ କରାଯାଇଛି।
ଜିଲାପାଳ ତଥା କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ବିନୋଦ କୁମାର ବେହେରା କହିଛନ୍ତି, ଚଢ଼ାଉ କରାଯାଇଥିଲା। ଆବଶ୍ୟକକ ଗାଇଡ୍ ଲାଇନ୍ ପୂରଣ କରିବାକୁ ତାଗିଦ କରାଯାଇଛି। ସମସ୍ତ ପ୍ରକାର ସରକାରୀ ଅନୁମତି ନେବାକୁ କୁହାଯାଇଛି। ଜିଲାପାଳଙ୍କ ନିକଟରେ ଆବେଦନ ପାଇଁ କୁହାଯାଇଥିବା ସେ ପ୍ରକାଶ କରିଛନ୍ତି।
