ନୂଆଦିଲ୍ଲୀ,୨୩।୩: କରୋନା ଭାଇରସ ଥମିବାର ନାଁ ନେଉନି। ଚାଇନାରୁ ଆରମ୍ଭ ହୋଇଥିବା ଏହି କରୋନା ଏବେ ୧୮୮ ଦେଶକୁ ତା’ କବଳକୁ ନେଇ ସାରିଥିବା ବେଳେ ଭାରତରେ ସୋମବାର ସକାଳ ସୁଦ୍ଧା କରୋନା ସଂକ୍ରମିତଙ୍କ ସଂଖ୍ୟା ପହଞ୍ଚିଛି ୪୧୫ରେ। ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ ରିସର୍ଚ୍ଚ (ଆଇସିଏମ୍ଆର୍) ଏହି ସୂଚନା ଦେଇଛି। ଏପଟେ ମୃତକଙ୍କ ସଂଖ୍ୟା ୭ ଥିବା ବେଳେ ମହାରାଷ୍ଟ୍ରରେ ଆଉ ଜଣଙ୍କର ମୃତ୍ୟୁ ହୋଇଥିବା କୁହାଯାଉଛି। ହେଲେ ସରକାରୀ ଭାବେ ଏହାର କୌଣସି ଘୋଷଣା କରାଯାଇ ନାହିଁ। ସେପଟେ କରୋନା ମୁକାବିଲା ପାଇଁ କିଛି ରାଜ୍ୟରେ ଲକ୍ଡାଉନ୍ ଘୋଷଣା କରାଯାଇଥିବା ବେଳେ ଆଉ କିଛି ରାଜ୍ୟରେ ୧୪୪ ଧାରା ଜାରି କରାଯାଇଛି। ମହାରାଷ୍ଟ୍ରରେ ସର୍ବାଧିକ କରୋନା ରୋଗୀ ଚିହ୍ନଟ ହେବା ପରେ ସେଠାରେ ଲକ୍ଡାଉନ୍ ସହ ୧୪୪ ଧାରା ଜାରି କରାଯାଇଛି। ଏଠାରେ ବହୁ ସଂଖ୍ୟାରେ ବଲିଉଡ୍ ସେଲିବ୍ରିଟି ରହୁଥିବାରୁ ସେମାନେ ମଧ୍ୟ ଏହି ଲକ୍ଡାଉନକୁ ସ୍ବାଗତ କରିଛନ୍ତି।
