ଦଶରଥପୁର,୨୭ା୫(ଡି.ଏନ.ଏ.)- ଦଳରେ ରହି ଦଳ ବିରୋଧରେ ଅନ୍ତର୍ଘାତୀ କାର୍ଯ୍ୟ କରିବା ଯୋଗୁ ବିଜେଡିର ଦଶରଥପୁର ବ୍ଲକ ସଭାପତି ସୁବାସ ଚନ୍ଦ୍ର ମହାନ୍ତି ଏବଂ ଯାଜପୁର ବ୍ଲକ ସଭାପତି ପ୍ରଭାତ ଘଡାଇଙ୍କୁ ସୋମବାର ପଦରୁ ନିଲମ୍ବିତ କରାଯାଇଛି। ଯାଜପୁର ଜିଲା ବିଜେଡି ସଭାପତି ସରୋଜ ମହାପାତ୍ର ୨୭ା୦୫ା୨୦୧୯, ପ୍ରେସ ଇସ୍ତାହାର ପତ୍ର ସଂଖ୍ୟା-୦୮ ଜରିଆରେ ଏହା ପ୍ରକାଶ କରିଛନ୍ତି। ତେବେ ନିଲମ୍ବିତ ୨ ବ୍ଲକ ସଭାପତିଙ୍କ ସ୍ଥାନରେ ଦଶରଥପୁର ବ୍ଲକରେ ଅଜୟ କୁମାର ମହାନ୍ତି ଏବଂ ଯାଜପୁର ବ୍ଲକ ସଭାପତିଭାବେ ପରେଶ କୁମାର ବିଶ୍ୱାଳଙ୍କୁ ନୂତନ ଭାବେ ନିଯୁକ୍ତି କରାଯାଇଛି। ଏତଦ୍ବ୍ୟତୀତ ଦଶରଥପୁର ବ୍ଲକ ଛଚିଣା ପଞ୍ଚାୟତର ପ୍ରକାଶ ଚନ୍ଦ୍ର ସାମଲଙ୍କୁ ଯାଜପୁର ଜିଲା ସମ୍ପାଦକ ଭାବେ ନୂଆ କରି ନିଯୁକ୍ତି ମିଳିବା ସହ ଦଶରଥପୁର ବ୍ଲକର ସାଂଗଠନିକ ଦାୟିତ୍ୱ ପ୍ରଦାନ କରାଯାଇଥିବା ଜଣାପଡ଼ିଛି। ସୂଚନାଯୋଗ୍ୟ, ସୁବାସ ମହାନ୍ତି ଏବଂ ପ୍ରଭାତ ଘଡାଇ ଦଳର ବ୍ଲକ ସଭାପତି ଆସନରେ ଥାଇ ସଦ୍ୟସମାପ୍ତ ସାଧାରଣ ନିର୍ବାଚନରେ ଦଳ ବିରୋଧରେ ଅନ୍ତର୍ଘାତୀ କାର୍ଯ୍ୟ କରିଥିବା ଅଭିଯୋଗ ଆସିଥିଲା। ଫଳରେ ଉଭୟଙ୍କୁ ନିଲମ୍ବିତ କରାଯାଇଥିବା ଯାଜପୁର ଜିଲା ବିଜେଡି ସଭାପତି ମହାପାତ୍ର ମଣମାଧ୍ୟମକୁ ସୂଚନା ଦେଇଛନ୍ତି।
