ନୂଆଦିଲ୍ଲୀ, ୨୧।୬-ବାହାରିନଠାରେ ହେବାକୁଥିବା ୧୬ ବର୍ଷରୁ କମ୍ ଏଏଫସି ଚାମ୍ପିୟନଶିପ୍ରେ ଭାରତ କଷ୍ଟସାଧ୍ୟ ଗ୍ରୁପରେ ସ୍ଥାନ ପାଇଛି। ତେବେ ଏହାକୁ ସକାରାତ୍ମକ ଦୃଷ୍ଟିରେ ନେଇଛନ୍ତି ମୁଖ୍ୟ କୋଚ୍ ବିବିଆନୋ ଫର୍ନାଣ୍ଡିଜ। ଉଚ୍ଚସ୍ତରୀୟ ପ୍ରତିଯୋଗିତାରେ ତାଙ୍କ ଦଳର ଖେଳାଳିମାନେ ଭଲ ପ୍ରଦର୍ଶନ କରିବେ ବୋଲି ସେ ଅନୁଭବ କରୁଛନ୍ତି। ”ପ୍ରତିଯୋଗିତାର ଗ୍ରୁପିଂ ପାଇଁ ଡ୍ର ଉଠାଣ କାର୍ଯ୍ୟକ୍ରମକୁ ମୁଁ ଲାଇଭ୍ ଦେଖୁଥିଲେ ହେଁ କିଛି ଆଶା ରଖି ନ ଥିଲି। କ୍ୱାଲିଫାୟରରେ ଆମ ପିଲାମାନେ ଚମତ୍କାର ଖେଳିଛନ୍ତି। ତେଣୁ ଗ୍ରୁପରେ ମଧ୍ୟ ଦଳ ଭଲ ପ୍ରଦର୍ଶନ କରିବା ନେଇ ମୁଁ ଦୃଢ଼ ଆଶାୟୀ“ ବୋଲି ବିବିଆନୋ କହିଛନ୍ତି। ଚଳିତମାସ ୧୮ ତାରିଖରେ ପ୍ରତିଯୋଗିତା ପାଇଁ ଡ୍ର ଉଠାଣ କାର୍ଯ୍ୟକ୍ରମ କୁଆଲାଲମ୍ପୁରରେ ଅନୁଷ୍ଠିତ ହୋଇଥିଲା। ଗ୍ରୁପ‘ସି’ରେ ଦକ୍ଷିଣ କୋରିଆ, ଅଷ୍ଟ୍ରେଲିଆ ଓ ଉଜବେକିସ୍ତାନ ସହିତ ଭାରତ ସ୍ଥାନ ପାଇଥିଲା। ୨୦୧୮ କ୍ୱାର୍ଟର ଫାଇନାଲରେ ଭାରତ ଗୋଟିଏ ଗୋଲରେ କୋରିଆଠାରୁ ହାରି ଯାଇଥିଲା। ଏହି ମ୍ୟାଚ ଜିତିଥିଲେ ଭାରତୀୟ ଦଳ ୧୭ ବର୍ଷରୁ କମ୍ ଫିଫା ବିଶ୍ୱକପ ପାଇଁ ଯୋଗ୍ୟତା ଅର୍ଜନ କରିଥାନ୍ତା।
ସାମ୍ପ୍ରତିକ ସ୍ଥିତିରେ ପିଲାମାନେ କେତେଶୀଘ୍ର ଟ୍ରେନିଂକୁ ଫେରିବେ ତାହା ଗୁରୁତ୍ୱପୂର୍ଣ୍ଣ। ଟୁର୍ନାମେଣ୍ଟ ଆରମ୍ଭ ପୂର୍ବରୁ ଖେଳାଳିମାନେ ସେଥିପାଇଁ ପ୍ରସ୍ତୁତ ହେବା ଆବଶ୍ୟକ ବୋଲି ବିବିଆନୋ କହିଛନ୍ତି। ସବୁ ସମୟରେ କିଛି ନା କିଛି ଶିଖିବାର ଅଛି। ୨୦୧୮ ପ୍ରତିଯୋଗିତାରୁ ଆମେ ଅନେକ କିଛି ଶିଖିଛୁ। ସେଠାରେ ହୋଇଥିବା ତ୍ରୁଟିକୁ ଆମେ ଟ୍ରେନିଂରେ ସୁଧାରିବୁ ବୋଲି ସେ ପ୍ରକାଶ କରିଛନ୍ତି। କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ଯୋଗୁ ଗତ ମାର୍ଚ୍ଚରୁ ସର୍ବଭାରତୀୟ ଫୁଟବଲ ଫେଡେରେଶନ(ଏଆଇଏଫଏଫ)ର ସମସ୍ତ କାର୍ଯ୍ୟକ୍ରମ ସ୍ଥଗିତ ରହିଛି। ପିଲାମାନେ ଘରେ ଥିବାରୁ ବିବିଆନୋ ଅନ୍ଲାଇନ୍ ସେସନରେ ସେମାନଙ୍କ ସହ ଟଚ୍ରେ ରହୁଛନ୍ତି। ବିବିଆନୋଙ୍କ ପ୍ରଶିକ୍ଷଣରେ ୧୬ ବର୍ଷରୁ କମ୍ ଦଳ ସଫଳତା ପଥରେ ରହିଛି। ଅନ୍ତର୍ଜାତୀୟ ଫୁଟବଲରେ ଭାରତ ଗତ ୮ଟି ମ୍ୟାଚରେ ଅପରାଜେୟ ରହିଛି। ୧୫ ବର୍ଷରୁ କମ୍ ସାଫ୍ ଚାମ୍ପିୟନଶିପ୍ରେ ଭାରତ ୫ଟି ମ୍ୟାଚ ଜିତିଥିବାବେଳେ ୧୬ ବର୍ଷରୁ କମ୍ ଏଏଫସି ଚାମ୍ପିୟନଶିପ୍ କ୍ୱାଲିଫାୟରରେ ୨ଟି ମ୍ୟାଚ ଜିତିଛି ଏବଂ ଗୋଟିଏ ଡ୍ର ରଖିଛି। ଏଥିପାଇଁ ଏଆଇଏଫଏଫ ଏବଂ ସପୋର୍ଟ ଷ୍ଟାଫ୍ଙ୍କୁ ପ୍ରଶଂସା କରିଛନ୍ତି କୋଚ୍ ବିବିଆନୋ।
