ଲାଉସାନେ, ୭।୪(ପି.ଟି.): ଟେବୁଲ ଟେନିସ (ଟିଟି) ବିଶ୍ୱ ଚାମ୍ପିୟନଶିପ୍ର ନୂଆ ତାରିଖ ଘୋଷଣା ହୋଇଛି। ବିଶ୍ୱ ଟିଟିର ସର୍ବୋଚ୍ଚ ପ୍ରଶାସନିକ ସଂସ୍ଥା ଅନ୍ତର୍ଜାତୀୟ ଟେବୁଲ ଟେନିସ ଫେଡେରେଶନ (ଆଇଟିଟିଏଫ୍) ମଙ୍ଗଳବାର ଏ ନେଇ ଆନୁଷ୍ଠାନିକ ଭାବେ ଘୋଷଣା କରିଛି। ପ୍ରଥମେ ଏହି ପ୍ରତିଯୋଗିତା ବୁସାନରେ ୨୦୨୦ ମାର୍ଚ୍ଚ ୨୨ରୁ ୨୯ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଏହି ଇଭେଣ୍ଟ ଏବେ ସେପ୍ଟେମ୍ବର ୨୭ରୁ ଆରମ୍ଭ ହୋଇ ଅକ୍ଟୋବର ୪ ତାରିଖରେ ଶେଷ ହେବ ବୋଲି ଆଇଟିଟିଏଫ୍ ସୂଚନା ଦେଇଛି।
ସବୁଠାରୁ ମର୍ଯ୍ୟାଦାସମ୍ପନ୍ନ ଟିଟି ଇଭେଣ୍ଟ ବିବେଚିତ ହେଉଥିବା ୨୦୨୦ ବିଶ୍ୱ ଟିଟି ଇଭେଣ୍ଟ ସହିତ ଏକାଧିକ ପ୍ରତିଯୋଗିତା କରୋନା ଭାଇରସ ସଂକମ୍ରଣ କାରଣରୁ ସ୍ଥଗିତ ରହିଛି। ଆଇଟିଟିଏଫ୍ର କାର୍ଯ୍ୟକାରୀ କମିଟି ବୈଠକରେ ଏହି ଇଭେଣ୍ଟର ପ୍ରୋଭିଜନାଲ ତାରିଖ ଜୁନ୍ ୨୧ରୁ ୨୮ ତାରିଖ ରଖାଯିବା ନେଇ ପ୍ରସ୍ତାବ ଗୃହୀତ ହୋଇଥିଲା। ତେବେ ଶେଷରେ ଜୁନ୍ ୩୦ ପର୍ଯ୍ୟନ୍ତ ସବୁପ୍ରକାର ଆଇଟିଟିଏଫ୍ ଇଭେଣ୍ଟ ଓ କାର୍ଯ୍ୟକଳାପକୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଥିଲା।
ବିଶ୍ୱ ଚାମ୍ପିୟନଶିପ୍ର ନୂଆ ତାରିଖ ସେପ୍ଟେମ୍ବର ୨୭ରୁ ଅକ୍ଟୋବର ୪କୁ ନେଇ ମଧ୍ୟ ଆଇଟିଟିଏଫ୍ ଓ କେଟିଟିଏ (କୋରିଆନ ଟିଟି ଆସୋସିଏଶନ) ନଜର ରଖିଛି। ଯଦି ଅନୁକୂଳ ପରିସ୍ଥିତି ନ ହୁଏ ତାହାଲେ ବିକଳ୍ପ ବ୍ୟବସ୍ଥା ଗ୍ରହଣ କରାଯାଇପାରେ। କାରଣ ଖେଳାଳି, କୋଚ୍, ପ୍ରଶଂସକ ଓ ଅଫିସିଆଲଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଦୃଷ୍ଟିରେ ରଖି ଯାହାକିଛି ନିଷ୍ପତ୍ତି ନିଆଯିବ ବୋଲି କୁହାଯାଇଛି। ଉଲ୍ଲେଖଥାଉ କି, କୋଭିଡ-୧୯ ମହାମାରୀ କାରଣରୁ ବିଶ୍ୱରେ ଏପର୍ଯ୍ୟନ୍ତ ୭୦,୦୦୦ ଲୋକଙ୍କ ପ୍ରାଣହାନି ହୋଇଛି।
