ଭୁବନେଶ୍ୱର,୩୧।୮: ଜାଲ କାଗଜପତ୍ର କରି ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠି(ସିଏମ୍ଆର୍ଏଫ୍)ରୁ ଅର୍ଥ ଆତ୍ମସାତ୍ ଉଦ୍ୟମ କରିଥିବା ଅଭିଯୋଗରେ କମିଶନରେଟ୍ ପୋଲିସ ସୋମବାର ଏକ ଘରୋଇ ହସ୍ପିଟାଲର କର୍ମଚାରୀଙ୍କୁ ଗିରଫ କରିଛି। ଅଭିଯୁକ୍ତ ହେଉଛନ୍ତି ପୁରୀ ଜିଲା କୃଷ୍ଣପ୍ରସାଦ ଥାନା ଅନ୍ତର୍ଗତ ବୁଦ୍ଧିବାର ଅଞ୍ଚଳର ଦିଲୀପ କୁମାର ବେହେରା(୩୮)।
ଦିଲୀପ ରାଜଧାନୀର ଭରତପୁର ଥାନା ଅଧୀନରେ ଥିବା ଏକ ଘରୋଇ ହସ୍ପିଟାଲର ଏମ୍ଆର୍ଡି ସେକ୍ସନର ସହକାରୀ ପରିଚାଳକ ଭାବେ କାର୍ଯ୍ୟ କରୁଥିଲେ। କିଛି ଦିନ ତଳେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଜଣେ ଅଧିକାରୀ ଜାଲିଆତି ସଂକ୍ରାନ୍ତରେ ଭରତପୁର ଥାନାରେ ଅଭିଯୋଗ କରିବା ପରେ ଘଟଣା ପଦାକୁ ଆସିଛି। ମିଳିଥିବା ସୂଚନା ଅନୁଯାୟୀ, ଦିଲୀପ ଓ ଏହି ରାକେଟ୍ରେ ସମ୍ପୃକ୍ତ ଆଉ କେତେ ଜଣ ବ୍ୟକ୍ତି ଘରୋଇ ହସ୍ପିଟାଲରେ ଉତ୍ତମ ଚିକିତ୍ସା ସୁବିଧା ଯୋଗାଇ ଦେବା କଥା କହି ରାଜ୍ୟର ବିଭିନ୍ନ ଅଞ୍ଚଳରୁ ରୋଗୀଙ୍କୁ ଆଣି ରାଜଧାନୀରେ ପହଞ୍ଚାଇଥାଆନ୍ତି। ଦିଲୀପ ସେହି ରୋଗୀଙ୍କ ଅସଲ ଡାକ୍ତରୀ କାଗଜପତ୍ର ଓ ଅନ୍ୟାନ୍ୟ ପରିଚୟପତ୍ର ସଂଗ୍ରହ କରିଥାଆନ୍ତି। ପରେ ପ୍ରକୃତ ରୋଗୀଙ୍କ ନାମ ଓ ଠିକଣା ବଦଳାଇ ସେଥିରୁ ନକଲି କାଗଜପତ୍ର ପ୍ରସ୍ତୁତ କରନ୍ତି। ପରବର୍ତ୍ତୀ ସମୟରେ ସିଏମ୍ଆର୍ଏଫ୍ରୁ ମିଳୁଥିବା ଅର୍ଥର କିଛି ଅଂଶ ରୋଗୀଙ୍କୁ ଦେବା ପରେ ଅବଶିଷ୍ଟ ଏହି ଦଲାଲମାନେ ଭାଗ କରି ନେଇଥାଆନ୍ତି। ନିକଟରେ ଦିଲୀପ ତିନିଜଣ ରୋଗୀ ରବୀନ୍ଦ୍ର କୁମାର ବରାଡ଼, ପାର୍ବତୀ ସାହୁ ଓ ଦାମ ମୁଦୁଲିଙ୍କଠାରୁ ଡାକ୍ତରୀ କାଗଜପତ୍ର ସଂଗ୍ରହ କରି ସେମାନଙ୍କୁ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ। ପରବର୍ତ୍ତୀ ସମୟରେ ସେ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ୫ ଲକ୍ଷ ୪୩ ହଜାର ଟଙ୍କାର ଆର୍ଥିକ ସହାୟତା ପାଇବା ପାଇଁ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗରେ ସେହି ନକଲି କାଗଜପତ୍ର ଦାଖଲ କରିଥିଲେ। ତେବେ ହସ୍ପିଟାଲ କର୍ତ୍ତୃପକ୍ଷ କାଗଜପତ୍ର ଜାଲିଆତି ଥିବା ଦର୍ଶାଇ ସମ୍ପୃକ୍ତ ବିଭାଗକୁ ଜଣାଇଥିଲେ। ସୋମବାର ପୋଲିସ ଦିଲୀପଙ୍କ ନାମରେ ଏକ ମାମଲା (୨୮୬/୨୧) ରୁଜୁ କରି ଗିରଫ କରିଥିଲା। ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ରାକେଟରେ ସମ୍ପୃକ୍ତ ଦିଲୀପଙ୍କ ଅନ୍ୟ ସହଯୋଗୀମାନଙ୍କୁ ଗିରଫ କରିବା ଲାଗି ପୋଲିସ ତନାଘନା ଚଳାଇଛି। ତେବେ ଏହି ଘଟଣାରେ ଅନ୍ୟ ପ୍ରମୁଖ ହସ୍ପିଟାଲର କର୍ମଚାରୀମାନେ ସମ୍ପୃକ୍ତ ଅଛନ୍ତି କି ନାହିଁ, ସେ ନେଇ ପୋଲିସ ଖୋଳତାଡ଼ କରୁଛି।
