ଭଞ୍ଜନଗର,୧୮।୫(ଡି.ଏନ.ଏ)-ଭଞ୍ଜନଗର ଓଏସ୍ଆରଟିସି ଜୋନରୁ ସମସ୍ତ ବସ୍ ଅନ୍ୟ ଜୋନକୁ ସ୍ଥାନାନ୍ତର ପାଇଁ ପ୍ରଶାସନ କଡା ଆଭିମୁଖ୍ୟ ଆପଣାଇଛି। ବସ୍ ସ୍ଥାନାନ୍ତର ସମୟରେ ବିବାଦ ଉପୁଜିବା ଆଶଙ୍କାରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଶୁକ୍ରବାର ଭଞ୍ଜନଗର ପୋଲିସର ସହାୟତା ନେଇଛନ୍ତି। ଅପରପକ୍ଷେ ବସ୍ ନଛାଡିବା ପାଇଁ ଆନ୍ଦୋଳନରତ ଅସ୍ଥାୟୀ କର୍ମଚାରୀମାନେ ଓଏସଆରଟିସି ବସ୍ ଡିପୋ ସମ୍ମୁଖରେ ଧାରଣାରେ ବସିଛନ୍ତି। ଏଥିସହ ସନ୍ଧ୍ୟାରେ ସହରର ବିଭିନ୍ନ ଅନୁଷ୍ଠାନ ଓ ବ୍ୟକ୍ତିଙ୍କୁ ନେଇ ବୈଠକ ହୋଇଥିଲା। ବୈଠକରେ ଆଗାମୀ ରଣନୀତି ପ୍ରସ୍ତୁତି ପାଇଁ ଏକ କ୍ରିୟାନୁଷ୍ଠାନ କମିଟି ଗଠନ ହୋଇଥିଲା। ଏଥିରେ ଆସନ୍ତା ମଙ୍ଗଳବାର ଦିନ ଭଞ୍ଜନଗର ବନ୍ଦ ଡାକରା ଦିଆଯାଇଛି। ଶନିବାର ସହରରେ ଏକ ଶୋଭାଯାତ୍ରା କରାଯିବ। ଅପରପେକ୍ଷ ଆନ୍ଦୋଳନରେ ସାମିଲ ୨ଜଣ କର୍ମଚାରୀ ଶୁକ୍ରବାର ଦିନ ୧ଟାରେ ଅଶୁଂଘାତର ଶିକାର ହୋଇଥିଲେ। ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। କ୍ରିୟାନୁଷ୍ଠାନ କମିଟିରେ ସଂଘର ସଭାପତି ବଟକୃଷ୍ଣ ପଣ୍ଡା, ଆଇନଜୀବୀ ଏମ୍. ତାଜ୍. ଆଦେନୀ, ସୋମନାଥ ନାୟକ, ଅଭିମନ୍ୟୁ ଗୌଡ, ଅଶୋକ ଜେନା, ମୁରଲି ପଣ୍ଡା, ସନ୍ତୋଷ ନାୟକ, ସୁଶାନ୍ତ ମହାପାତ୍ର, ଡି. ଚେଲପତି ରାଓ, ହରିକୃଷ୍ଣ ସାହୁ, ମନୋଜ ପଟ୍ଟନାୟକ, ସନ୍ତୋଷ ତିଆଡି ପ୍ରମୁଖ ଥିଲେ।ପ୍ରକାଶ ଯେ, ଭଞ୍ଜନଗର ଓଏସ୍ଆରଟିସି ଜୋନ୍ ବିଗତ ୭ମାସ ହେବ କ୍ଷତିରେ ଚାଲିଥିଲା। ତେଣୁ କର୍ମଚାରୀଙ୍କୁ ଦରମା ବାବଦକୁ ପ୍ରାୟ ୫୪ଲକ୍ଷ ଟଙ୍କା ପ୍ରଦାନ କରାଯାଇ ପାରିନଥିଲା। ଏହାର ପ୍ରତିବାଦରେ କର୍ମଚାରୀମାନେ ବିଗତ ଏକ ସପ୍ତାହ ହେବ ଆନ୍ଦୋଳନକୁ ଓହ୍ଲାଇଥିଲେ। ଫଳରେ ଏଠାରୁ ଯାଉଥିବା ସମସ୍ତ ରୁଟ୍ରେ ବସ୍ ଚଳାଚଳ ବନ୍ଦ ହୋଇଯାଇଥିଲା। ତେଣୁ ବିଭାଗୀୟ ଉଚ୍ଚ କର୍ତୃପକ୍ଷ ଏଠାରେ ଥିବା ୨୨ଟି ବସ୍ ମଧ୍ୟରୁ ସଚଳ ଥିବା ୧୮ ବସ୍କୁ ରାଜ୍ୟର ବିଭିନ୍ନ ଜୋନ୍କୁ ସ୍ଥାନାନ୍ତର କରିବା ପାଇଁ ନିଷ୍ପତି ନେଇଥିଲେ। ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଏଭଳି ନିଷ୍ପତି ଦ୍ୱାରା ଅନେକ କର୍ମଚାରୀ ନିଯୁକ୍ତି ହରାଇବା ସହ କେତକ ରୁଟ୍ରେ ବସ୍ ସେବା ସମ୍ପୁର୍ଣ୍ଣ ବନ୍ଦ ହୋଇଯିବା ପରିସ୍ଥିତି ଦେଖାଦେଇଛି। ଏନେଇ ଅସ୍ଥାୟୀ ବସ୍ କର୍ମଚାରୀ ସଂଘ ପକ୍ଷରୁ ଆନ୍ଦୋଳନକୁ ସମର୍ଥନ କରିବା ପାଇଁ ବିଭିନ୍ନ ବ୍ୟକ୍ତି ଓ ଅନୁଷ୍ଠାନର ସହଯୋଗ ଲୋଡାଯାଇଥିଲା। ଅନେକ ଅନୁଷ୍ଠାନ ଆନ୍ଦୋଳନକୁ ସମର୍ଥନ ଜଣାଇ ସାମିଲ ହୋଇଛନ୍ତି। ଶୁକ୍ରବାର ଜିଲା ଶ୍ରମ ଅଧିକାରୀ ଧାରଣାସ୍ଥଳରେ ପହଞ୍ଚତ୍ ସମସ୍ୟାର ସମାଧାନ ପାଇଁ ଚେଷ୍ଠା କରିଥିଲେ ମଧ୍ୟ ତାହା ସଫଳ ହୋଇପାରିନାହିଁ। ଏହାପରେ ଅପରାହ୍ନରେ ବ୍ରହ୍ମପୁରରୁ ଓଏସ୍ଆରଟିସିର ଜଣେ ଅଧିକାରୀ ୨ଜଣ ଡ୍ରାଇଭରଙ୍କୁ ଧରି ଆସିଛନ୍ତି ଏହି ଜୋନରୁ ୨ଟି ବସ୍ ନେବାପାଇଁ। ଯାହାକୁ ନେଇ ବିବାଦ ଦେଖାଦେଇଛି।
