ଲଣ୍ଡନ,୨।୪(ଏଏଫ୍ପି)- କରୋନା ଭାଇରସ ସଂକ୍ରମଣରେ ବିଶ୍ୱ ହେଭିଓ୍ବେଟ ଚାମ୍ପିୟନ ଆନ୍ଥୋନୀ ଜୋଶୁଆଙ୍କ ଜଣେ ସମ୍ପର୍କୀୟ ବ୍ୟକ୍ତି ମୃତ୍ୟୁ ବରଣ କରିଛନ୍ତି। ବ୍ରିଟେନର ଏହି ତାରକା ବକ୍ସର ଜୋଶୁଆ ଜୁନ୍ରେ ନିଜର ଟାଇଟଲ ବଜାୟ ରଖିବା ପାଇଁ ଆଇବିଏଫ୍ ମାଣ୍ଟାଟୋରୀ ଚ୍ୟାଲେଞ୍ଜର କୁବ୍ରାଟ ପୁଲେଭଙ୍କୁ ଜୁନ୍ରେ ଭେଟିବାର କାର୍ଯ୍ୟକ୍ରମ ରହିଛି। ତେବେ କୋଭିଡ-୧୯ କାରଣରୁ ଏହି ବାଉଟ୍କୁ ଘୁଞ୍ଚାଯିବା ଏକ ପ୍ରକାର ନିଶ୍ଚିତ ହୋଇଛି। ବକ୍ସିଂ ଜିମ୍ର ଜଣେ ନିକଟତମ ବନ୍ଧୁଙ୍କୁ ହରାଇଛି ବୋଲି ଜୋଶୁଆ ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି। ଜଣେ ବନ୍ଧୁଙ୍କୁ ହରାଇବା ସହ କରୋନ ଭାଇରସ ଯେ ଅତି ନିକଟରେ ପହଞ୍ଚିଲାଣି ବୋଲି ସେ ହୃଦୟଙ୍ଗମ କରିଛନ୍ତି। ତେଣୁ ପରସ୍ଥିତି ନିଶ୍ଚିତ ଭାବେ ସଙ୍କଟଜନକ ବୋଲି ସେ କହିଛନ୍ତି। ବ୍ରିଟେନ୍ରେ ଲକ୍ଡାଉନ ଜାରି ରହିଛି। ଫଳରେ ଡବ୍ଲ୍ୟୁବିଏ, ଆଇବିଏଫ୍, ଡବ୍ଲ୍ୟୁବିଓ ଓ ଆଇବିଓ ଚାମ୍ପିୟନ ଜୋଶୁଆ ତାଙ୍କ ଦୈନନ୍ଦିନ ରୁଟିନ୍ ଅନୁଯାୟୀ କାର୍ଯ୍ୟ କରିପାରୁନାହାନ୍ତି ବୋଲି ସ୍ବୀକାର କରିଛନ୍ତି। ଏବେ ବାହାରକୁ ବାହାରି ବକ୍ସିଂ ଜିମ୍ରେ ଯୋଗ ଦେବା ସହ ମୋ ପିଲାମାନଙ୍କ ସହ ମିଶିବାକୁ ଚାହୁଁଛି। ମୋ ଭଳି ଜଣେ ଅମାନିଆ ଲୋକ ମଧ୍ୟ ସରକାରଙ୍କ ନିର୍ଦ୍ଦେଶନାମ ମାନିବାକୁ ବାଧ୍ୟ ହୋଇଛି। କରୋନା ଭାଇରସ୍କୁ ରୋକିବା ପାଇଁ ଏହା ନିହାତି ଜରୁରୀ ବୋଲି ସେ କହିଛନ୍ତି।
