କୃଷ୍ଣପ୍ରସାଦ,୩୦ା୭(ଡି.ଏନ.ଏ.)-ପୁରୀ ଜିଲା କୃଷ୍ଣପ୍ରସାଦ ଥାନା ଅଞ୍ଚଳରେ ଗତ କିଛିମାସ ହେବ ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏଠାରେ ଦିନକୁ ଦିନ ବେଆଇନ ନିଶା କାରବାର, ଚୋରି, ଡକାୟତି, ହତ୍ୟା ଆଦି ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଥିବାରୁ ଲୋକେ ନିଜକୁ ସୁରକ୍ଷିତ ମନେ କରୁ ନ ଥିବା ଜଣାପଡ଼ିଛି। ଏହି ପରିସ୍ଥିତିରେ ପୋଲିସର ନୀରବ ଓ ନିଷ୍କ୍ରିୟତା ଜନସାଧାରଣଙ୍କୁ ଅଧିକ ଚିନ୍ତିତ ଓ ଭୟଭୀତ କରୁଛି। ସୂଚନାଯୋଗ୍ୟ, କୃଷ୍ଣପ୍ରସାଦ ଥାନା ଅଞ୍ଚଳରେ ରହିଛି ମାଲୁଦ ଫାଣ୍ଡି। ଚିଲିକା, ନୂଆପଡ଼ାରେ ରହିଛି ଗୋଟିଏ ଫାଣ୍ଡି ା ତେବେ ୨ ଫାଣ୍ଡିରେ ବର୍ଷେ ହେବ କୌଣସି ଅଧିକାରୀ ନାହାନ୍ତି ।
ବଜ୍ରକୋଟର ଫଳ ଦୋକାନ, ମାଲୁଦର ଜଗତେଶ୍ୱର ଡ୍ରେସ୍ହାଉସ, ମିଟୁ ପୃଷ୍ଟି ରାଶନ ଦୋକାନ ଓ ପିଣ୍ଟୁ ପୃଷ୍ଟି ମୋବାଇଲ ଦୋକାନରୁ ହୋଇଥିବା ଚୋରି ଘଟଣାରେ ପୋଲିସ କୌଣସି ଅଭିଯୁକ୍ତଙ୍କୁ ଗିରଫ କରିବାରେ ଏ ପର୍ଯ୍ୟନ୍ତ ସକ୍ଷମ ହୋଇପାରିନି। ଶିଆଳ ଗାଁରେ ବଧୂହତ୍ୟା ଘଟଣା ନେଇ ଅଭିଯୁକ୍ତଙ୍କୁ ଗିରଫ ଦାବିରେ ଶତାଧିକ ଗ୍ରାମବାସୀ ଥାନା ସମ୍ମୁଖରେ ଧାରଣାରେ ବସିଥିଲେ ମଧ୍ୟ କାହାକୁ ଗିରଫ କରାଯାଇନାହିଁ। କହ୍ନେଇପୁର ଗୋଷ୍ଠୀକନ୍ଦଳ ଘଟଣାରେ ପୋଲିସ ପକ୍ଷରୁ ବିଶେଷ ପଦକ୍ଷେପ ଗ୍ରହଣ କରା ନ ଯିବାରୁ ଶେଷରେ ଶାନ୍ତି କମିଟି ଦ୍ୱାରା ସମାଧାନ କରାଯାଇଥିଲା। କୃଷ୍ଣପ୍ରସାଦ ଥାନା ଚତୁଃପାର୍ଶ୍ୱରେ ବେଆଇନ ମଦ ଭଳି ନିଶା କାରବାର ବୃଦ୍ଧି ନେଇ ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଥାନାରେ ଅଭିଯୋଗ କରାଯିବାର ୧ ମାସ ବିତିଯାଇଥିଲେ ସୁଦ୍ଧା ପୋଲିସର କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ମାଲୁଦ ଫାଣ୍ଡି ନିକଟ ରାଜାବଜାର ଅଞ୍ଚଳର ଗାଁଦାଣ୍ଡ, ଗଳି ଓ କନ୍ଦିରେ ଚୋରାମଦ କାରବାର, ଗୋରୁଚାଲାଣ ଆଦି କାରବାର ହେଉଛି। ମାଲିକମାନେ ନିଜ ଗୋରୁଗୁଡ଼ିକୁ ଗୁହାଳରେ ନ ରଖି ମାଲୁଦ, ପାରିକୁଦ ବଜାରକୁ ଛାଡିଦେବା ଯୋଗୁ ଦୁର୍ଘଟଣା ଘଟୁଛି। ଏଥିପ୍ରତି ପୋଲିସର କୌଣସି ପଦକ୍ଷେପ ନାହିଁ। ରାତିରେ ପୋଲିସ ପାଟ୍ରୋଲିଂ ହେଉ ନ ଥିବାରୁ ବିଭିନ୍ନ ଅସାମାଜିକ କାର୍ଯ୍ୟକଳାପ ବଢ଼ିଚାଲିଛି। ତେଣୁ ପୋଲିସ ପ୍ରତି ଲୋକଙ୍କ ଦିନକୁ ଦିନ ଭରସା ତୁଟିବାରେ ଲାଗିଛି।
ବଜ୍ରକୋଟ ଷ୍ଟେଟ ବ୍ୟାଙ୍କ ଏଟିଏମ୍ ଭାଙ୍ଗି ଟଙ୍କା ଲୁଟ୍ ଉଦ୍ୟମ ଘଟଣାର ୨ ମାସ ବିତିଯାଇଥିଲେ ସୁଦ୍ଧା ଏହାର ପର୍ଦ୍ଦାଫାଶ କରିବାରେ ପୋଲିସ ସଫଳ ହୋଇପାରିନି। ଏ ନେଇ ବ୍ୟାଙ୍କ ପରିଚାଳକ ଶ୍ରୀକାନ୍ତ ସାହୁଙ୍କୁ ପଚାରିବାରୁ ସେ କହିଥିଲେ, ଆମେ ଲିଖିତ ଅଭିଯୋଗ କରିଥିଲୁ। କିନ୍ତୁ ପୋଲିସ ଏ ପର୍ଯ୍ୟନ୍ତ ଫୁଟେଜ ଦେଖି ତଦନ୍ତ ଆରମ୍ଭ କରିନାହାନ୍ତି । ଏଟିଏମ୍ ବନ୍ଦ ରହିବା ଯୋଗୁ ଗ୍ରାହକ ହଇରାଣ ହେଉଛନ୍ତି।
ମାଲୁଦ ଏବଂ ଚିଲିକା ନୂଆପଡ଼ା ଫାଣ୍ଡିରେ ଅଧିକାରୀ ନିଯୁକ୍ତି ପ୍ରସଙ୍ଗ ନେଇ କୃଷ୍ଣପ୍ରସାଦ ଆରକ୍ଷୀ ନିରୀକ୍ଷକ ସୁଧୀର ସାହୁଙ୍କୁ ପଚାରିବାରୁ ଫାଣ୍ଡିରେ ଅଧିକାରୀ ନିଯୁକ୍ତି ଘଟଣା ନେଇ ସେ ଆରକ୍ଷୀ ଅଧୀକ୍ଷକଙ୍କୁ ଅବଗତ କରିଥିବା ପ୍ରକାଶ କରିଥିଲେ।
କୃଷ୍ଣପ୍ରସାଦ ବ୍ଲକ ୯ ନମ୍ବର ଜୋନ୍ ଜିଲା ପରିଷଦ ସଭ୍ୟା ପ୍ରଭାତୀ ପ୍ରଧାନ ଉପରୋକ୍ତ ସମସ୍ୟା ନେଇ କହିଥିଲେ, ୨୫ ବର୍ଷ ମଧ୍ୟରେ ଆଇନଶୃଙ୍ଖଳାକୁ ସଜାଡିବାରେ ବିଫଳ, ଅପାରଗ ହୋଇଥିବା ଏଭଳି କେହି ଆରକ୍ଷୀ ନିରୀକ୍ଷକ ଆମ ଥାନାର ଦାୟିତ୍ୱ ଗ୍ରହଣ କରି ନ ଥିଲେ। ବର୍ତ୍ତମାନ ଚୋରି, ବେଆଇନ ମଦ କାରବାର ବୃଦ୍ଧି ପାଉଛି। ଏହି ଥାନା ଅଞ୍ଚଳରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି । ତେଣୁ ସ୍ଥାନୀୟ ଲୋକେ ଦାୟିତ୍ୱରେ ଥିବା ଆରକ୍ଷୀ ନିରୀକ୍ଷକଙ୍କ ବଦଳି ଦାବି କରିଛନ୍ତି ।
