ହିଞ୍ଜିଳିକାଟୁ,୨୪ା୧୨(ଡ଼ି.ଏନ୍.ଏ.)- ଜଣେ ଠିକାଦାର ଓ ତାଙ୍କ ୩ ସହଯୋଗୀଙ୍କ କଥାରେ ଅଧିକ ଅର୍ଥ ଲୋଭରେ ପଡ଼ି ଜିଲାର ବିଭିନ୍ନ ଅଞ୍ଚଳରୁ ୬୦ରୁ ଉର୍ଦ୍ଧ୍ୱ ଶ୍ରମିକ କର୍ନାଟକ ରାଜ୍ୟକୁ ଦାଦନ ଖଟିବାକୁ ଯାଇଥିଲେ। ଏକ ରେଲ୍ ସ୍ଲିପର (ରେଳ ଧାରଣା ତଳେ ପଡୁଥିବା ସିମେଣ୍ଟ ଖୁଣ୍ଟ) ତିଆରି କମ୍ପାନୀରେ ୩ ମାସରୁ ଉର୍ଦ୍ଧ୍ୱ କାମ କରିଥିଲେ। ତେବେ ସେମାନଙ୍କୁ କେବଳ ଠିକାଦାର ଖାଇବାଖର୍ଚ୍ଚ ଦେଇ ବାକି ଟଙ୍କା ଦେଇ ନ ଥିଲେ। ଫଳରେ ଏମାନେ ବହୁ କଷ୍ଟରେ ଓଡ଼ିଶା ଫେରିଥିବା ସୋମବାର ହିଞ୍ଜିଳି ଥାନାରେ ଅଭିଯୋଗ ହୋଇଛି। ହିଞ୍ଜିଳିଥାନା ଆଡ଼ପଡ଼ା ଫାଣ୍ଡି ପେଣ୍ଡୁରୁଲୁଣ୍ଡିର କାଳିଆ ଭୋଳଙ୍କ ଏତଲା କ୍ରମେ ନଂ.୩୭୨/୧୯ରେ ମାମଲା ରୁଜୁ ହୋଇଛି। ପ୍ରକାଶ ଯେ, ହିଞ୍ଜିଳି ଥାନା ଓ ଜିଲାର ଅନ୍ୟାନ୍ୟ ଅଞ୍ଚଳରୁ ୬୦ରୁ ଉର୍ଦ୍ଧ୍ୱ ନିର୍ମାଣ ଶ୍ରମିକ ହିଞ୍ଜିଳି ଥାନା ଅଞ୍ଚଳର ଜଣେ ଠିକାଦାର ଓ ତାଙ୍କ ୩ ସହଯୋଗୀଙ୍କ ଦ୍ୱାରା ପ୍ରଭାବିତ ହୋଇ ଉକ୍ତ କମ୍ପାନୀରେ କାମ କରିବାକୁ କର୍ନାଟକ ଯାଇଥିଲେ। ନିର୍ଯାତିତ ହେବାପରେ କମ୍ପାନୀ କର୍ତ୍ତୃପକ୍ଷ ଓ ସେଠାକାର ଶ୍ରମ ଅଧିକାରୀଙ୍କ ସହଯୋଗରେ ଶ୍ରମିକମାନେ ଓଡ଼ିଶା ଫେରିଛନ୍ତି।
