ଢେଙ୍କାନାଳ ଅଫିସ,୨୮ା୧ କିଛି ଦିନ ତଳେ ତାଳଚେରରେ ଉପଦ୍ରବ କରୁଥିବା ନରହନ୍ତା ଦନ୍ତାକୁ କପିଳାସ କପିଳାସ ଚିଡିଆଖାନା ପରିସରରେ ଥିବା ଏଲିଫ୍ୟାଣ୍ଟ ରେସକ୍ୟୁ ସେଣ୍ଟରକୁ ଅଣାଯାଇଥିବାବେଳେ ଏବେ ଆଉ ଏକ ଦନ୍ତାକୁ ସେଠାକୁ ଅଣାଯିବାକୁ ମସୁଧା କରାଯାଉଥିବା ସୂଚନା ମିଳିଛି। ଉଗ୍ର ସ୍ବଭାବର ହାତୀକୁ ସେଠାରେ ରଖିବାକୁ ଭିତ୍ତିଭୂମି ନ ଥିବାବେଳେ ବନ ବିଭାଗର ଏପରି ନିଷ୍ପତ୍ତିକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଯାଜପୁର ଜିଲାର ଦାନଗଦି ଅଞ୍ଚଳରେ ଉପଦ୍ରବ କରୁଥିବା ନରହନ୍ତା ହାତୀକୁ କପିଳାସ ଅଣାଯିବାକୁ ଯୋଜନା ହେଉଥିବା ବିଶ୍ୱସ୍ତ ସୂତ୍ରରୁ ଜଣାପଡିଥିବାବେଳେ ଏହାକୁ ନେଇ ରେସକ୍ୟୁ ସେଣ୍ଟର ଦାୟିତ୍ୱରେ ଥିବା ବନବିଭାଗ ଅଧିକାରୀ ଓ କର୍ମଚାରୀଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି।
ଗତ ୨୨ ତାରିଖରେ ତାଳଚେରରେ ଉପଦ୍ରବ କରୁଥିବା ନରହନ୍ତା ଦନ୍ତାକୁ କପିଳାସ ରେସକ୍ୟୁ ସେଣ୍ଟରକୁ ଅଣାଯାଇଥିଲା। ହାତୀଟିକୁ ରେସକ୍ୟୁ ସେଣ୍ଟର ପରିସରରେ ଏକ ଖୋଲା ମଣ୍ଡପରେ ୪ଟି ଚେନ ବାନ୍ଧି ରଖାଯାଇଥିବା ବେଳେ ସେଥିରୁ ୩ଟି ଚେନ୍ ଛିଣ୍ଡାଇ ଦେଇଥିଲା। ବିପଦ ଆଶଙ୍କା କରି ରେଞ୍ଜ କର୍ତ୍ତୃପକ୍ଷ ଗୋଟିଏ ଦିନ ଚିଡିଆଖାନାକୁ ବନ୍ଦ ରଖିଥିଲେ ା ଏଥିସହିତ ପୂର୍ବରୁ ରେସକ୍ୟୁ ସେଣ୍ଟର ପରିସରରେ ଥିବା ୪ଟି ହାତୀକୁ ଚିଡିଆଖାନା ପରିସରରେ ଥିବା ଅନ୍ୟ ଏକ ସ୍ଥାନକୁ ସ୍ଥାନାନ୍ତର କରାଯାଇଥିଲା। ପୁଣିଥରେ ହାତୀଟିକୁ ଚେନ୍ରେ ବନ୍ଧାଯାଇ ଏହାର ଚତୁଃପାର୍ଶ୍ୱରେ ଟ୍ରେଞ୍ଚ୍ ଖୋଳାଯାଇଛି ା ଏହାପରେ ହାତୀଟି ଅଧିକ ଉଗ୍ର ହୋଇଥିବା ଦେଖାଯାଇଛି। ପାଣି କୁଣ୍ଡକୁ ହାତୀ ଭାଙ୍ଗି ଦେଇଥିବା ବେଳେ ପାଟ୍ରୋଲିଂ କରୁଥିବା ବନ କର୍ମଚାରୀ ଏବଂ ଖାଇବାକୁ ଦେବାକୁ ଯାଉଥିବା କର୍ମଚାରୀମାନଙ୍କ ଉପରକୁ ହାତୀଟି ମାଟି ଏବଂ ଅନ୍ୟାନ୍ୟ ଜିନିଷ ଶୁଣ୍ଢରେ ଉଠାଇ ଫିଙ୍ଗୁଥିବା ଦେଖାଯାଇଛି ା ଏଭଳି ପରିସ୍ଥିତିରେ ଯାଜପୁର ଜିଲା ଦାନଗଦିରେ ୨ଜଣଙ୍କୁ ମାରିବା ପରେ ଘରଦ୍ୱାର ଭଙ୍ଗାରୁଜା କରିଥିବା ହାତୀକୁ କପିଳାସ ରେସକ୍ୟୁ ସେଣ୍ଟରରେ ଆଣି ରଖିବା ଯୋଜନା ଆଲୋଚନାର ବିଷୟ ହୋଇଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ବିମଳ ପ୍ରସନ୍ନ ଆଚାର୍ଯ୍ୟ କୁହନ୍ତି, ବର୍ତ୍ତମାନ ସୁଦ୍ଧା ବନ୍ୟପ୍ରାଣୀ ବିଭାଗ ପକ୍ଷରୁ ଆମ ପାଖକୁ ଏ ନେଇ କୌଣସି ପତ୍ର ଆସିନାହିଁ ା ଯଦି ଏଭଳି ନିର୍ଦ୍ଦେଶନାମା ଆସେ ତେବେ କପିଳାସ ରେସକ୍ୟୁ ସେଣ୍ଟରରେ ଭିତ୍ତିଭୂମିର ଅଭାବ ଏବଂ ଆଉ ଏକ ଏଭଳି ହାତୀକୁ ରଖିବା ସମ୍ଭବପର ନୁହେଁ ବୋଲି ଦର୍ଶାଇ ମନା କରାଯିବ ବୋଲି ସେ କହିଛନ୍ତି।
