ଭୁବନେଶ୍ୱର, ୧୭।୧(କ୍ରୀଡ଼ା ପ୍ରତିନିଧି)- ଇଣ୍ଡିଆନ ସୁପରଲିଗ୍ ଫ୍ରାଞ୍ଚାଇଜ୍ ଓଡ଼ିଶା ଏଫସି ଅନ୍ତର୍ଜାତୀୟ ଖେଳାଳି ଭିନିତ ରାୟଙ୍କ ଚୁକ୍ତି ମିଆଦ ବୃଦ୍ଧି କରିଛି। ସେ ୨୦୨୩ ପର୍ଯ୍ୟନ୍ତ ଦଳସହ ରହିବେ ବୋଲି ଶୁକ୍ରବାର ଭୁବନେଶ୍ୱର ଭିତ୍ତିକ ଆଇଏସଏଲ କ୍ଲବ ପକ୍ଷରୁ ପ୍ରକାଶ କରାଯାଇଛି। ”ଭିନିତ ଜଣେ ଦକ୍ଷ ଖେଳାଳି। ସେ ଓଡ଼ିଶା ଏଫସିର ସଫଳତାରେ ବଡ଼ ଅଂଶୀଦାର। ଗତ ୩ ବର୍ଷ ମଧ୍ୟରେ ସେ ନିଜ ଖେଳରେ ବହୁ ଉନ୍ନତି ଆଣିଛନ୍ତି। ତେଣୁ ଆମେ ଆଗାମୀ ୩ ବର୍ଷ ପାଇଁ ତାଙ୍କ ଚୁକ୍ତି ମିଆଦ ବଢ଼ାଇବାକୁ ନିଷ୍ପତ୍ତି ନେଇଛୁ“ ବୋଲି ଓଡ଼ିଶା ଏଫସି ମାଲିକା ରୋହନ ଶର୍ମା ପ୍ରକାଶ କରିଛନ୍ତି। ନିଜ ଚୁକ୍ତିର ନବୀକରଣରେ ଖୁସି ଜାହିର କରିଛନ୍ତି ଭିନିତ। ଏହି କ୍ଲବ ପକ୍ଷରୁ ମୁଁ କ୍ରମାଗତ ଆଇଏସଏଲ ମ୍ୟାଚ ଖେଳିବାକୁ ସୁଯୋଗ ଦେଇଛି। ଜଣେ ଖେଳାଳିଭାବେ ମଧ୍ୟ ମୁଁ ଅନେକ କିଛି ଶିଖିବାକୁ ପାଇଛି। ଚଳିତ ସିଜନରେ ଆମେ ପ୍ଲେ-ଅଫ୍କୁ ଉନ୍ନିତ ହେବାର ଯଥେଷ୍ଟ ସମ୍ଭାବନା ରହିଛି“ ବୋଲି ୨୨ ବର୍ଷୀୟ ଭିନିତ କହିଛନ୍ତି।
