ନିଜ ଘରକୁ ବୁଲା ପ୍ରାଣୀଙ୍କ ଆଶ୍ରୟସ୍ଥଳୀ କରିଦେଇଛନ୍ତି କେରଳର ପ୍ରଦୀପ ପାୟୁର। ୨୦ ବର୍ଷ ହେବ ସେ ୧୦୦୦ରୁ ଊର୍ଦ୍ଧ୍ୱ ଦୁର୍ଘଟଣାଗ୍ରସ୍ତ ବୁଲା କୁକୁର ଓ ବିଲେଇଙ୍କୁ ଉଦ୍ଧାର କରିଛନ୍ତି। ଏମାନଙ୍କ ମଧ୍ୟରୁ ଅନେକକୁ ସେମାନଙ୍କ ମାଲିିକଙ୍କୁ ଆବଶ୍ୟକ ପ୍ରମାଣ ରଖି ହସ୍ତାନ୍ତର କରିଛନ୍ତି। ଯେଉଁମାନେ ପୋଷ୍ୟ ଭାବେ ନେବା ଲାଗି ଚାହାନ୍ତି ସେମାନଙ୍କ ପରିଚୟପତ୍ରର ନକଲ ରଖୁଛନ୍ତି ପ୍ରଦୀପ। ସେମାନଙ୍କ ଫୋନ ନମ୍ବର ରଖି ପୋଷାଜନ୍ତୁଙ୍କ ଫଟୋ ନିୟମିତ ବ୍ୟବଧାନରେ ପଠାଇବା ଲାଗି ସର୍ତ୍ତ ରଖୁଛନ୍ତି ବୋଲି କୁହନ୍ତି ୩୫ ବର୍ଷୀୟ ପ୍ରଦୀପ। ଏବେ ତାଙ୍କ ଘରେ କୁକୁର ଓ ବିଲେଇ ମିଶି ରହୁଛନ୍ତି ୪୩ଟି। ସେ ତିନି ବଖରା ଘର ଏମାନଙ୍କ ପାଇଁ ଛାଡିଦେଇଛନ୍ତି। ଖାଦ୍ୟ ଓ ଚିକିତ୍ସା ବାବଦରେ ମାସକୁ ବ୍ୟୟ କରୁଛନ୍ତି ୨୦ ହଜାର ଟଙ୍କା। ରାସ୍ତାରେ ଦୁର୍ଘଟଣାଗ୍ରସ୍ତ ପରେ ଏମାନଙ୍କୁ ଉଦ୍ଧାର କରି ଘରକୁ ଆଣିବା ପାଇଁ ସେ ଏକ ସେକେଣ୍ଡହ୍ୟାଣ୍ଡ୍ କାର୍ କିଣି ସେଥିରେ ଯନ୍ତାଟିଏ ଲଗାଇଛନ୍ତି। ଘରକୁ ଆଣିବା ପରେ ଚିକିତ୍ସା କରୁଛନ୍ତି। ଏଥିପାଇଁ ତାଙ୍କର କେତେଜଣ ପ୍ରାଣୀ ଚିକିତ୍ସକ ବନ୍ଧୁ ସାହାଯ୍ୟ କରୁଛନ୍ତି। ସେ ମଧ୍ୟ ଏଥିପାଇଁ ସ୍ବତନ୍ତ୍ର ପ୍ରଶିକ୍ଷଣ ନେଇଛନ୍ତି। ଗୁରୁବାୟୁରର ଥ୍ରିସୁରରେ ରହନ୍ତି ପ୍ରଦୀପ। ୨୦୦୧ରେ ପ୍ରଦୀପଙ୍କ ପିତା ପ୍ରଥମେ ୧୫ଟି ବୁଲା କୁକୁରଙ୍କୁ ଆଶ୍ରୟ ଦେଇଥିଲେ। ୨୦୧୦ରେ ତାଙ୍କ ପିତାଙ୍କ ଦେହାନ୍ତ ପରେ ସେ ଏହି ସେବା କରିଆସୁଛନ୍ତି। ପ୍ରଦୀପ କୋଏମ୍ବାଟୁରରେ ଏକ ଓ୍ବାଶିଂପାଉଡ଼ର କମ୍ପାନୀରେ ସପ୍ଲାୟର ଭାବେ କାର୍ଯ୍ୟ କରନ୍ତି। ଭୋର୍ରୁ ଉଠି ସେ ପୋଷାଜନ୍ତୁମାନଙ୍କୁ ଚଲାଇବାକୁ ନିଅନ୍ତି ଓ ତାଙ୍କ ମା’ ସୁମାଲ୍ୟା ସେମାନଙ୍କ ଲାଗି ଖାଦ୍ୟ ପ୍ରସ୍ତୁତ କରନ୍ତି।
