ଗଞ୍ଜାମ,୬ା୬(ଡି.ଏନ୍.ଏ.): ଗଞ୍ଜାମ ବ୍ଲକ ପୋଇରାଶି ପଞ୍ଚାୟତ ବିରୁଳି କାଇଁଚପୁର ଗ୍ରାମରେ ଆମ ଗାଁ ଆମ ବିକାଶ ଯୋଜନା ଠିକ୍ରେ ହୋଇ ନ ଥିବା ଗ୍ରାମବାସୀଙ୍କ ପକ୍ଷରୁ ଅଭିଯୋଗ ହୋଇଛି। ଏନେଇ ଗ୍ରାମ୍ୟ ପରିଚାଳନା କମିଟିର ୫ ଜଣିଆ ପ୍ରତିନିଧି ଦଳ ଗୁରୁବାର ବ୍ଲକ କାର୍ଯ୍ୟାଳୟ ଆସି ବିଡିଓଙ୍କ ଅନୁପସ୍ଥିତିରେ ହେଡ୍ କ୍ଲର୍କ ଭକ୍ତଚରଣ ମାଝୀଙ୍କୁ ଲିଖିତ ଦାବିପତ୍ର ପ୍ରଦାନ କରିଥିଲେ। ଆମ ଗାଁ ଆମ ବିକାଶ ଯୋଜନାରେ ନିର୍ମିତ ସଭାମଣ୍ଡପ ଠିକ୍ ସ୍ଥାନରେ ହୋଇ ନ ଥିବା ନେଇ ଏହି ଦାବିପତ୍ର ପ୍ରଦାନ କରାଯାଇଛି। ଏଥିସହିତ ଗ୍ରାମକୁ ସଂଯୋଗ ହୋଇଥିବା ରାସ୍ତା ମରାମତି, ପୋଖରୀ ଓ ନଳକୂପ ପୁନରୁଦ୍ଧାର ଆଦି କାର୍ଯ୍ୟ ପାଇଁ ବିଡିଓ ଜ୍ୟୋତିଶଙ୍କର ରାଏ କାର୍ଯ୍ୟାଳୟରେ ପହଞ୍ଚିବା ପରେ କମିଟି ସଦସ୍ୟମାନେ ଭେଟି ଉପରୋକ୍ତ ସମସ୍ୟା ସମାଧାନ ନେଇ ଦାବି କରିଥିଲେ। ଏହି ପ୍ରତିନିଧି ଦଳରେ ପୋଇରାଶି ପଞ୍ଚାୟତର ପୂର୍ବତନ ସରପଞ୍ଚ ଅନ୍ତର୍ଯ୍ୟାମୀ ବେହେରା, ଗ୍ରାମ୍ୟ କମିଟି ସଭାପତି ସୁରେନ୍ଦ୍ର ପ୍ରଧାନ,ସମ୍ପାଦକ ମଧୁସୂଦନ ବେହେରା,ସଦସ୍ୟ ପୀତାମ୍ବର ବେହେରା, ସନ୍ତୋଷ ବେହେରା, ବାବୁ ବେହେରା ପ୍ରମୁଖ ସାମିଲ ଥିଲେ।
