ଭୁବନେଶ୍ୱର, ୧୬।୩(କ୍ରୀଡ଼ା ପ୍ରତିନିଧି)-
କରୋନା ଭାଇରସ ସଂକ୍ରମଣ ପ୍ରଭାବରେ ବିଶ୍ୱସ୍ତରରେ କ୍ରୀଡ଼ା ପ୍ରଭାବିତ ହୋଇଥିବାବେଳେ ବ୍ୟକ୍ତିଗତଭାବେ ତାରକା ଆଥଲେଟ୍ମାନେ ବହୁତ କ୍ଷତିର ସମ୍ମୁଖୀନ ହେଉଛନ୍ତି। ଭାରତୀୟ ସ୍ପ୍ରିଣ୍ଟ କୁଇନ୍ ଓଡ଼ିଶାର ଦୂତୀ ଚାନ୍ଦ ମଧ୍ୟ ଏହାର ଶିକାର ହୋଇଛନ୍ତି। ଅଲିମ୍ପିକ୍ସ ଯୋଗ୍ୟତା ନେଇ ଏବେ ଆଶା ଓ ଆଶଙ୍କାରେ ଦୂତୀ। ବିଦେଶ ଯାଇ ବଡ଼ ପ୍ରତିଯୋଗିତାରେ ଭାଗ ନେବାକୁ ସୁଯୋଗ ମିଳୁନାହିଁ। ଭାରତରେ ବଡ଼ ଟୁର୍ନାମେଣ୍ଟ କିଛି ନାହିଁ। ଏପରି ଏକ ସନ୍ଦିକ୍ଷଣରେ ଦୋଦୁଲ୍ୟମାନ ପରିସ୍ଥିତିରେ ରହିଛନ୍ତି ଏହି ଜାତୀୟ ରେକର୍ଡଧାରିଣୀ। ”ମୁଁ ଏବେ ଜର୍ମାନୀ ଯାଇ ସେଠାରେ ୩ ମାସ ଟ୍ରେନିଂ ନେବା ସହ ପ୍ରତିଯୋଗିତାରେ ଭାଗନେବା କାର୍ଯ୍ୟକ୍ରମ ରହିଥିଲା। ସେଥିପାଇଁ ମୋତେ ଭିଜା ମଧ୍ୟ ମିଳି ଯାଇଥିଲା। ମାତ୍ର କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଜର୍ମାନୀ ସରକାର ବିଭିନ୍ନ କଟକଣା ଲଗାଇଲେ। ସେଠାରେ ବର୍ତ୍ତମାନ କୌଣସି ବଡ଼ ପ୍ରତିଯୋଗିତା ହେବନାହିଁ। ଟ୍ରେନିଂ ପାଇଁ ବାହାର ଦେଶର ଆଥଲେଟଙ୍କୁ ଅନୁମତି ମଧ୍ୟ ନାହିଁ। ଫଳରେ ମୁଁ ଜର୍ମାନୀ ଯାଇ ପାରିଲିନି। ଅଲିମ୍ପିକ୍ସ କ୍ୱାଲିଫାଇଂ ପାଇଁ ହାତରେ ମାତ୍ର ୨ ମାସ ସମୟ। ଭାରତରେ ସେପରି ବଡ଼ ମେଗା ପ୍ରତିଯୋଗିତା ମଧ୍ୟ ନାହିଁ। ଇଣ୍ଡିଆନ ଗ୍ରାଁ ପ୍ରିରେ ମୁଁ ଭାଗ ନେବାକୁତ୍ବା ଇଭେଣ୍ଟରେ ମାତ୍ର ୮ ପ୍ରତିଯୋଗୀ ଅଛନ୍ତି। ତେଣୁ ସେଥିରେ ଭଲ ପ୍ରତିଦ୍ୱନ୍ଦ୍ୱିତା ହେବା ପ୍ରଶ୍ନ ଉଠୁନି। ବଡ଼ ପ୍ରତିଯୋଗିତା କହିଲେ ସିନିୟର ଫେଡେରେଶନ କପ୍। ତାହା ଯାଇ ଏପ୍ରିଲ ୧୦ରେ ହେବାର ଅଛି। ଅଲିମ୍ପିକ୍ କ୍ୱାଲିଫାଇଂ ପାଇଁ ଭାରତରେ ସେପରି ମେଗା ପ୍ରତିଯୋଗିତା କିଛି ନାହିଁ। ୧୧.୧୫ ଟାଇମିଂ ହାସଲ କରିବା ଏତେ ସହଜ ନୁହେଁ। ସେଥିପାଇଁ ୧୧ ସେକେଣ୍ଡରୁ କମ୍ ସମୟ ନେଉଥିବା ପିଲାଙ୍କ ସହ ପ୍ରତିଦ୍ୱନ୍ଦ୍ୱିତା କରିବାକୁ ହେବ। ମୋ ପାଇଁ ବହୁତ ବଡ଼ କ୍ଷତି। ଭାରତରେ ବଡ଼ ପ୍ରତିଯୋଗିତା ନ ଥିବାବେଳେ ବାହାର ଦେଶକୁ ମୁଁ ଯାଇ ପାରୁନାହିଁ। ତେଣୁ ମୁଁ ଆଶଙ୍କା ମଧ୍ୟରେ ରହିଛି“ ବୋଲି ସମ୍ପ୍ରତି ଭୁବନେଶ୍ୱରରେ ଟ୍ରେନିଂ ଜାରି ରଖିଥିବା ଦୂତୀ ପ୍ରକାଶ କରିଛନ୍ତି।
ମାର୍ଚ୍ଚ ୨୦ରେ ଆରମ୍ଭ ହେବାକୁ ଯାଉଥିବା ଇଣ୍ଡିଆନ ଗ୍ରାଁ ପ୍ରିରେ ଭାଗନେବେ ବୋଲି ଦୂତୀ କହିଛନ୍ତି। ”ଇଣ୍ଡିଆନ ଗ୍ରାଁ ପ୍ରିରେ ଭାଗ ନେବାକୁ ମୁଁ ଏଣ୍ଟ୍ରି ଦେଇଛି। ପଟିଆଲା ଯିବା ପାଇଁ ସମସ୍ତ ପ୍ରସ୍ତୁତି ସରିଛି। ପ୍ରତିଯୋଗିତା ହେଲେ ନିଶ୍ଚିତ ଭାଗନେବି। କରୋନା ଭାଇରସର ପ୍ରଭାବ ଖେଳ ପଡ଼ିଆ ଭିତରେ ଏବଂ ବାହାରେ ଗୁରୁତର ପ୍ରଭାବ ପକାଇଛି। ଅଲିମ୍ପିକ୍ସ ଯିବାକୁ ଇଚ୍ଛା ରଖିଥିବା ଆଥଲେଟଙ୍କ ପାଇଁ ଦକ୍ଷତା ପ୍ରଦର୍ଶନର ସୁଯୋଗ ନାହିଁ। ଯେଉଁ ପ୍ରତିଯୋଗିତାରେ ଭାଗନେଲେ ଅଲିମ୍ପିକ୍ସ ସୁଯୋଗ ସୃଷ୍ଟି ହେବ ସେଠାକୁ ଯିବାକୁ ଅନୁମତି ନାହିଁ। ତେଣୁ ମୁଁ ବହୁତ ଅସୁବିଧାର ସମ୍ମୁଖୀନ ହେଉଛି। ଟ୍ରେନିଂ ଅନୁସାରେ ମୁଁ ଏପ୍ରିଲ-ମେ’ ମଧ୍ୟରେ ଯୋଗ୍ୟତା ପାଇଯିବି ବୋଲି ଆଶା ରଖିଥିଲି। ମାତ୍ର ଏବେ କିଛି ବଡ଼ ପ୍ରତିଯୋଗିତା ହେଉ ନ ଥିବାରୁ ଆଶଙ୍କାରେ ରହିଛି। ଅଧିକ ପ୍ରତିଯୋଗିତାରେ ଭାଗନେଲେ ର଼୍ୟାଙ୍କିଙ୍ଗ ଅନୁସାରେ ମୋତେ ଅଲିମ୍ପିକ୍ସ ଯୋଗ୍ୟତା ମିଳିବା ସମ୍ଭାବନା ଥିଲା। ମାତ୍ର ତାହା ସମ୍ଭବ ହେଉନି। ତେଣୁ ଅଲିମ୍ପିକ୍ସକୁ ନେଇ ମୁଁ ସନ୍ଦିହାନ ବୋଲି ପ୍ରକାଶ କରିଛନ୍ତି“ ଏହି ଦ୍ରୁତତମ ଧାବିକା।
