ନୂଆଦିଲ୍ଲୀ,୩୧-୭: ଦୀର୍ଘ ୫୩ ବର୍ଷ ଧରି ଓ୍ବିପ୍ରୋ ଚେୟାରମ୍ୟାନ୍ ଭାବେ ଦାୟିତ୍ୱ ସମ୍ଭାଳିବା ପରେ ଅଜିମ ପ୍ରେମଜୀ ମଙ୍ଗଳବାର ଅବସର ନେଇଛନ୍ତି। ଆଜିର ଦିନରେ ସେ ଅବସର ନେବେ ବୋଲି ପୂର୍ବରୁ ସେ ଘୋଷଣା କରିସାରିଥିଲେ। ବୁଧବାର ତାଙ୍କ ପୁତ୍ର ରିଷଦ କମ୍ପାନୀର ଚେୟାରମ୍ୟାନ ଭାବେ ଦାୟିତ୍ୱ ସମ୍ଭାଳିବେ। ତେବେ ଅଜିମ କମ୍ପାନୀର ଅଣ କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ପ୍ରତିଷ୍ଠାତା ଅଧ୍ୟକ୍ଷ ଭାବେ ନିଜ ଦାୟିତ୍ୱ ସମ୍ଭାଳିବେ ବୋଲି ଜଣାପଡିଛି। ଅଜିମ ଆଇଟି ଇଣ୍ଡଷ୍ଟ୍ରିରେ ଜଣେ ବିଜନେସ୍ ଟାଇକୁନ ଭାବେ ପ୍ରସିଦ୍ଧ ହେବା ସହ ପରୋପକାର କାର୍ଯ୍ୟରେ ମଧ୍ୟ ବିଶ୍ୱରେ ତାଙ୍କର ସ୍ବତନ୍ତ୍ର ପରିଚୟ ରହିଛି। ପରୋପକାର ମାମଲାରେ ସେ ଏସିଆରେ ଏକ ନମ୍ବର ଉଦ୍ୟୋଗପତି ଓ ବିଶ୍ୱର ଶୀର୍ଷ ୫ ଜଣଙ୍କ ମଧ୍ୟରେ ରହିଛନ୍ତି। ତାଙ୍କର ମୋଟ ସମ୍ପତ୍ତିର ମୂଲ୍ୟ ପ୍ରାୟ ୧.୫୫ ଲକ୍ଷ କୋଟି ଟଙ୍କା ହେବ। ମାର୍ଚ୍ଚରେ ସେ ୫୨,୭୫୦ କୋଟି ଟଙ୍କାର ଶେୟାର ଦାନ କରିଦେଇଛନ୍ତି। ସେ ଅଦ୍ୟାବଧି ୧.୪୫ ଲକ୍ଷ କୋଟି ଟଙ୍କା ଦାନରେ ଦେଇସାରିଛନ୍ତି। ତାଙ୍କର ପରୋପକାର ଓ ଦାନ ସମ୍ପର୍କରେ ମାଇକ୍ରୋସଫ୍ଟ ସହ ପ୍ରତିଷ୍ଠାତା ବିଲ୍ ଗେଟ୍ସ ପ୍ରଶଂସା କରିସାରିଛନ୍ତି।
