ମୁମ୍ବାଇ: ବିଗ୍ ବି ଅମିତାଭ ବଚ୍ଚନଙ୍କୁ ସାଧାରଣ ଅର୍ଥରେ ବଲିଉଡ୍ ମହାନାୟକ କୁହାଯାଏ ନାହିଁ। ସେ ପ୍ରକୃତରେ ବଲିଉଡ୍ର ମହାନାୟକ। ଦଶନ୍ଧି ଦଶନ୍ଧି ଧରି ନିଜ ଅତୁଳନୀୟ ଅଭିନୟର ଯାଦୁରେ ଦର୍ଶକଙ୍କ ହୃଦୟରେ ଘର କରିଛନ୍ତି। ସବୁ ପିଢ଼ିର ହିରୋଇନ୍ଙ୍କ ସହ ସେ ପରଦାରେ ଅଭିନୟ କରିଛନ୍ତି। ସବୁ ପିଢ଼ିର ହିରୋଙ୍କୁ ପଛରେ ପକାଇ ଦେଇଛନ୍ତି। ଭିନ୍ନ ଭିନ୍ନ ସ୍ବାଦର ଫିଲ୍ମ କରି ଅଦ୍ୱିତୀୟ ଅଭିନେତା ଭାବେ ପରିଚୟ ସୃଷ୍ଟି କରିପାରିଛନ୍ତି। ଏବେ ବି, ୭୭ ବଷର୍ର୍ ବୟସରେ ସେ କଠିନ ପରିଶ୍ରମ କରୁଛନ୍ତି। ଶୁଟିଂ ସେଟ୍ରେ ସମୟାନୁବର୍ତ୍ତୀ ହେବା ସହ ସଂକଳ୍ପବଦ୍ଧ ହୋଇ ଉତ୍ସର୍ଗୀକୃତ ଭାବନା ନେଇ କାମ କରୁଛନ୍ତି। ପିଢ଼ି ପରେ ପିଢ଼ି ତାଙ୍କୁ ଗ୍ରହଣ କରିଛନ୍ତି ଏବଂ ତାଙ୍କ ଅଭିନୟ ଦକ୍ଷତାକୁ ଅନୁସରଣ ମଧ୍ୟ କରିଛନ୍ତି। ସେଥିପାଇଁ ତ ବିଗ୍ ବି ହେଉଛନ୍ତି ହିନ୍ଦୀ ସିନେମାର ମହାନାୟକ। ହେଲେ ବଲିଉଡ୍ ଫ୍ୟାନ୍ମାନଙ୍କ ପାଇଁ ରହିଛି ଏକ ଦୁଃଖ ଖବର। ଫିଲ୍ମ ଦୁନିଆରୁ ଅବସର ନେବାକୁ ଇଚ୍ଛା ପ୍ରକାଶ କରିଛନ୍ତି ମହାନାୟକ ଅମିତାଭ ବଚ୍ଚନ।
ଫିଲ୍ମ ‘ଚେହ୍ରେ’ ଏବଂ ‘କୌନ୍ ବନେଗା କରୋଡ୍ପତି’ର ଶୁଟିଂରେ ବ୍ୟସ୍ତ ଅଛନ୍ତି ବିଗ୍ ବି। ତେବେ ବର୍ତ୍ତମାନ ସେ ଫିଲ୍ମ ‘ବ୍ରହ୍ମାସ୍ତ୍ର’ର ଶୁଟିଂ ପାଇଁ ମନାଲୀ ଯାଇଛନ୍ତି। ଏହାଛଡ଼ା ଫିଲ୍ମ ‘ଝୁଣ୍ଡ୍’ ଏବଂ ‘ଗୁଲାବୋ ସିତାବୋ’ରେ ମଧ୍ୟ ସେ ନଜରକୁ ଆସିବେ। ହେଲେ ଲାଗୁଛି ଏହି ଫିଲ୍ମଗୁଡ଼ିକ ପରେ ଅମିତାଭ ନେଇପାରନ୍ତି ଅବସର। ମନାଲୀରୁ ନିଜ ଅଫିସିଆଲ୍ ବ୍ଲଗ୍ରେ କିଛି ଏଭଳି ଇଚ୍ଛା ପ୍ରକାଶ କରିଛନ୍ତି। ସେ ଲେଖିଛନ୍ତି, “ମସ୍ତିଷ୍କ କିଛି କହୁଛି, ହେଲେ ଆଙ୍ଗୁଠି କିଛି ଅଲଗା କହୁଛି, ଏହା ଏକ ସୂଚନା, ମୋତେ ଅବସର ନେଇଯିବା ଉଚିତ।”
ଏହାସହ ମନାଲୀରେ ଶୁଟିଂ କରିବାର ଅନୁଭୂତି ମଧ୍ୟ ଶେୟାର କରିଛନ୍ତି ଅମିତାଭ । ସେ ସ୍ଥାନୀୟ ଲୋକଙ୍କୁ ଅତି ସରଳ, ନିରୀହ ଏବଂ ସଚ୍ଚୋଟ ବୋଲି ଦର୍ଶାଇଛନ୍ତି। ସେମାନଙ୍କ ସହ ସମୟ ବିତାଇଥିବାରୁ ଖୁସିବ୍ୟକ୍ତ କରିଛନ୍ତି। ଅନ୍ୟପକ୍ଷରେ ତାଙ୍କ ସ୍ବାସ୍ଥ୍ୟାବସ୍ଥା ଆଜିକାଲି ଠିକ୍ ରହୁନାହିଁ। କିଛିଦିନ ପୂର୍ବେ ବିଗ୍ ବି ଫିଲ୍ମ ଦୁନିଆରୁ ଏକ ଲମ୍ବା ବ୍ରେକ୍ ନେବେ ବୋଲି ଆମେ ଆପଣଙ୍କୁ ଜଣାଇଥିଲୁ। କିନ୍ତୁ ଏବେ ସେ ଅବସର ନେଇପାରନ୍ତି। ପ୍ରାୟ ଏକମାସ ପୂର୍ବରୁ ବିଗ୍ ବି ରୁଟିନ୍ ଚେକ୍ଅପ୍ ପାଇଁ ମୁମ୍ବାଇର ନାନାବତୀ ହସ୍ପିଟାଲ ଯାଇଥିଲେ। ତା’ ପରେ ପରେ ସେ ବ୍ରେକ୍ ନେବା ଖବର ଚର୍ଚ୍ଚା ହେଉଥିଲା। ଏବେ ବ୍ଲଗ୍ରେ ଏଭଳି ଇଚ୍ଛା ପ୍ରକାଶ କରିବା ପରେ ଲାଗୁଛି ଅମିତାଭ ବ୍ରେକ୍ରେ ନୁହେଁ, ଅବସର ନେବାକୁ ହିଁ ଚାହୁଁଛନ୍ତି। ଏହା ନିଶ୍ଚିତ ଭାବେ ବଲିଉଡ୍ପ୍ରେମୀଙ୍କ ପାଇଁ ଏକ ଦୁଃଖଦ ଖବର ହୋଇଥିବାବେଳେ ବିଗ୍ ବି ନିରୋଗ ଏବଂ ଦୀର୍ଘାୟୁ ହୁଅନ୍ତୁ ଏହା ସମସ୍ତଙ୍କ କାମନା।
