ଅନୁଗୋଳ ଅଫିସ, ୨୧।୫
ହେମସୁରପଡ଼ା ଛକରେ ରବିବାର ବିଳମ୍ବିତ ରାତିରେ ଡକାୟତି ଯୋଜନା ବେଳେ ୯ ଜଣିଆ ଏକ ଗ୍ୟାଙ୍ଗକୁ କାବୁ କରିଛି ଅନୁଗୋଳ ପୋଲିସ। ଏମାନଙ୍କ ମଧ୍ୟରେ ୩ଜଣ ନାବାଳକ ଥିବା ପୋଲିସ ସୂଚନା ଦେଇଛି। ଉକ୍ତ ଗ୍ୟାଙ୍ଗଠାରୁ ବନ୍ଧୁକ, ଛୁରି ଓ ନଗଦ ଟଙ୍କା ଜବତ କରାଯାଇଛି। ଗିରଫ ୬ଜଣଙ୍କୁ ସୋମବାର କୋର୍ଟଚାଲାଣ କରାଯାଇଥିବା ବେଳେ ଅନ୍ୟ ୩ଜଣଙ୍କୁ ବାଳସୁଧାର ଗୃହକୁ ପଠାଇ ଦିଆଯାଇଛି।
ପୋଲିସ କହିବା ଅନୁଯାୟୀ, ଗିରଫ ଡକାୟତମାନେ ମୁଖ୍ୟତଃ ଟ୍ରକ୍ ଚାଳକମାନଙ୍କୁ ହିଁ ଟାର୍ଗେଟ୍ କରୁଥିଲେ। ଶନିବାର ବିଳମ୍ବିତ ରାତିରେ ଜିନ୍ଦଲକୁ ମାଲ ନେଇ ଯାଉଥିବା ଏକ ଟ୍ରକ୍ (ନଂ.ଓଡ଼ି୧୯-ଏଲ-୦୦୮୯)ର ଚାଳକ ରେଙ୍ଗାଲି ଡ୍ୟାମ୍ ଥାନା ସୁସୁବା ଗ୍ରାମର ଜୟନ୍ତ ସାହୁଙ୍କୁ ହେମସୁରପଡ଼ା ଛକରେ ୮ରୁ ୯ଜଣ ଡକାୟତ ଅଟକାଇ ମାଡ଼ ମାରି ମୋବାଇଲ ଓ ୭ ହଜାର ୫ ଶହ ଟଙ୍କା ଲୁଟି ନେଇଥିଲେ। ଜଣେ ଚାଳକଙ୍କ ବେକରେ ଛୁରି ଲଗାଇଥିବା ବେଳେ ଅନ୍ୟଜଣେ ବନ୍ଧୁକ ଦେଖାଇଥିଲେ। ଏହାପରେ ଡକାୟତମାନେ ଅନ୍ୟ ଏକ ଟ୍ରକ୍ ଚାଳକଙ୍କଠାରୁ ମଧ୍ୟ ଲୁଟ୍ପାଟ କରିଥିଲେ। ଏ ନେଇ ଜୟନ୍ତ ଥାନାରେ ଅଭିଯୋଗ କରିଥିଲେ। ଉକ୍ତ ଅଭିଯୋଗ ଆଧାରରେ ଅନୁଗୋଳ ପୋଲିସ ରବିବାର ରାତିରେ ହେମସୁରପଡ଼ା ଛକ ସହ ବିଭିନ୍ନ ସ୍ଥାନରେ ସାଦା ପୋଷାକରେ ଜଗି ରହିଥିଲା। ଏହି ସମୟରେ ରାଜକିଶୋରପଡ଼ାର ବାପି ଓରଫ ପ୍ରକାଶ ବେହେରା(୨୩), ସୌଭାଗ୍ୟନଗରର ଦୀପୁ ଓରଫ ଦୀପକ ବେହେରା, ହେମସୁରପଡ଼ା ମୋଚି ସାହିର ପାପୁଲ ବାରିକ(୧୯), ସୁଇପର କଲୋନୀର ମନ ମୁଖୀ(୨୧), ସୌଭାଗ୍ୟନଗରର ବାରୁଦ ଓରଫ ବିଷ୍ଣୁ ବେହେରା(୨୪) ଓ ଜରାସିଂହାର ଜଗା ଓରଫ ଜଗନ୍ନାଥ ସାହୁ(୨୯)ଙ୍କ ସହ ହେମସୁରପଡ଼ାର ୩ ନାବାଳକ ଟ୍ରକ୍ ଚାଳକଙ୍କ ଠାରୁ ଲୁଟ୍ କରିବାକୁ ଯୋଜନା ଚଲାଇଥିବା ବେଳେ ଜଗି ରହିଥିବା ପୋଲିସ ସେମାନଙ୍କୁ ମାଡ଼ି ବସିଥିଲା। ସେମାନଙ୍କ ନିକଟରୁ ଏକ ଦେଶୀ ବନ୍ଧୁକ ସହ ଛୁରି, ଦୁଇଟି ମୋବାଇଲ ଓ ନଗଦ ୭ ହଜାର ୫ ଶହ ଟଙ୍କା ପୋଲିସ ଜବତ କରିଥିଲା। ଏ ସଂକ୍ରାନ୍ତରେ ନଂ.୩୬୧/୧୯ରେ ଏକ ମାମଲା ରୁଜୁ କରାଯାଇଥିବା ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି॥
