ଖୋର୍ଦ୍ଧା ଅଫିସ,୨୦।୩: ଖୋର୍ଦ୍ଧା ଜିଲା ଜଙ୍କିଆ ଥାନା ଟାଙ୍ଗୀ ବନ ବିଭାଗ ରମ୍ଭାବିଲି ନିକଟ ବଘେଇପୁଟ ମୌଜାରୁ ବୁଧବାର ଅସୁସ୍ଥ ଅବସ୍ଥାରେ ଏକ ମାଈହାତୀକୁ ଉଦ୍ଧାର କରାଯାଇଥିଲା। ପ୍ରାୟ ୪୮ ଘଣ୍ଟାର ସଂଘର୍ଷ ପରେ ଗୁରୁବାର ବିଳମ୍ବିତ ରାତିରେ ତା’ର ମୃତ୍ୟୁ ଘଟିଛି ।
ପ୍ରକାଶ ଯେ, ଗତ ବୁଧବାର ହାତୀକୁ ଅସୁସ୍ଥ ଅବସ୍ଥାରେ ଉଦ୍ଧାର କରାଯାଇଥିଲା। ନିକଟରେ ଏକ ଦନ୍ତାହାତୀ ତାକୁ ଜଗି ରହିଥିଲା। କିଛି ସମୟ ବାଦ୍ ହାତୀ ଜଙ୍ଗଲକୁ ଯିବାପରେ ଅଗ୍ନିଶମ କର୍ମଚାରୀ ପହଞ୍ଚି ହାତୀ ଉପରକୁ ପାଣି ଛିଞ୍ଚନ କରିଥିଲେ। ପରେ ବନ ବିଭାଗ ଓ ଟାଙ୍ଗୀ ପ୍ରାଣୀଧନ ଚିକିତ୍ସାଳୟ ଟିମ୍ ପ୍ରାଥମିକ ଚିକିତ୍ସା କରିଥିଲେ। ପରେ ହାତୀ ଠିଆହୋଇ ୨ଶହ ମିଟର ଆଗକୁ ଯିବା ପରେ ତଳେ ପଡ଼ିଯାଇଥିଲା। ବନ ବିଭାଗ ଓ ସ୍ଥାନୀୟ ବାସିନ୍ଦା ହାତୀକୁ ଜଗି ରହିଥିଲେ। ଗୁରୁବାର ରାତିରେ ତା’ର ପ୍ରାଣ ଚାଲିଯାଇଥିବା ଟାଙ୍ଗୀ ବନ ଅଧିକାରୀ ଅଜୟ ଜଗଦ୍ଦେବ ସୂଚନା ଦେଇଛନ୍ତି।
ବିଷଯୁକ୍ତ ପରିବା ଖାଇବା ପରେ ହାତୀର ମୃତ୍ୟୁ ଘଟିଥିବା ଅଭିଯୋଗ ହୋଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ବନ ଅଧିକାରୀ ଜଗଦ୍ଦେବ କହିଛନ୍ତି।
