ମିରଟ,୧।୫: କରୋନା ଭୂତାଣୁ ସଂକ୍ରମଣ ରୋକିବା ପାଇଁ ଜାରି ଲକ୍ଡାଉନ୍ ଯୋଗୁ ଯାନବାହନ ଚଳାଚଳ ବନ୍ଦ ଥିବାରୁ ପ୍ରଦୂଷଣ ହ୍ରାସ ପାଇଛି। ଉତ୍ତରପ୍ରଦେଶର ସାହରନପୁରରେ ଏୟାର କ୍ୱାଲିଟି ଇଣ୍ଡେକ୍ସ (ଏକ୍ୟୁଆଇ) ୫୦ ତଳକୁ ଖସିଥିବାରୁ ସେଠାରୁ ଗଙ୍ଗୋତ୍ରିର ହିମ ଆଚ୍ଛାଦିତ ଗିରିଶୃଙ୍ଗ ଦୃଶ୍ୟମାନ ହେଉଛି।
ଦୀର୍ଘ ୩ ଦଶନ୍ଧି ପରେ ପ୍ରଥମଥର ପାଇଁ ସାହରନପୁରରୁ ଗଙ୍ଗୋତ୍ରିକୁ ଦେଖିହେଉଛି। ପୂର୍ବରୁ ସହରବାସୀ ବୟୋଜ୍ୟେଷ୍ଠଙ୍କଠାରୁ କେବଳ ଏହାର କାହାଣୀ ଶୁଣିଆସୁଥିଲେ। ହେଲେ ଏବେ ବର୍ତ୍ତମାନର ପିଢ଼ି ସାହରନପୁରରୁ ହିମାଳୟର ଗିରିଶୃଙ୍ଗ ଦେଖି ବିସ୍ମିତ ହୋଇଯାଇଛନ୍ତି। ସ୍ଥାନୀୟ ଲୋକେ ଏବେ ସୋସିଆଲ ମିଡିଆରେ ପର୍ବତମାଳାର ଫଟୋ ପୋଷ୍ଟ କରି ଖୁସିବ୍ୟକ୍ତ କରୁଛନ୍ତି। ଇନ୍କମ୍ ଟାକ୍ସ ଇନ୍ସ୍ପେକ୍ଟର ଦୁଷ୍ୟନ୍ତ କୁମାର ଓ ତାଙ୍କ ସ୍ତ୍ରୀ ନିଧି ସାଇନି ରବିବାର ଆଭ୍ୟନ୍ତରୀଣ ହିମାଳୟର ବନ୍ଦରପୁଞ୍ଚ ଓ ଗଙ୍ଗୋତ୍ରିର ଫଟୋ ଉଠାଇ ଟୁଇଟରରେ ଶେୟାର କରିଥିଲେ। ଭାରତୀୟ ଜଙ୍ଗଲ ସେବା ଅଧିକାରୀ ତଥା ରାଜ୍ୟ ଜୈବବିବିଧତା ବୋର୍ଡ ସଚିବ ରମେଶ ପାଣ୍ଡେ ଉକ୍ତ ଫଟୋକୁ ଶେୟାର କରିବା ପରେ ଏହା ଭାଇରାଲ ହୋଇଛି। ସେ ପୂର୍ବରୁ କେବେ ଏଭଳି ଦୃଶ୍ୟ ଦେଖି ନ ଥିବା ନିଜ ପୋଷ୍ଟରେ ଉଲ୍ଲେଖ କରିଛନ୍ତି। ସେହିପରି ସାହରନପୁର ଡିଭିଜନର ଜଙ୍ଗଲ ମୃତ୍ତିକା ସଂରକ୍ଷକ ଭି.କେ. ଜୈନ କହିଛନ୍ତି, ୩ ଦଶନ୍ଧି ପରେ ଏହି ବିରଳ ଦୃଶ୍ୟ ଦେଖିବାକୁ ମିଳିଛି। ଏହା କେବଳ ମସୌରିରୁ ଦୃଶ୍ୟମାନ ହେଉଥିଲା। ସାହରନପୁରରୁ ଗଙ୍ଗୋତ୍ରି ଗିରିଶୃଙ୍ଗର ଦୂରତା ପ୍ରାୟ ୨୦୦ କି.ମି.। ସାହରନପୁର ଓ ମୁଜାଫରନଗରର ଏକ୍ୟୁଆଇ ପ୍ରାୟତଃ ସମାନ ରହିଥାଏ। ତେବେ ମୁଜାଫରନଗରରେ ଅଫିସଗୁଡ଼ିକ ବନ୍ଦ ଥିବାରୁ ସେଠାରୁ ରିପୋର୍ଟ ମିଳିପାରି ନାହିଁ। ଏହା ପୂର୍ବରୁ ଜଳନ୍ଧରରୁ ମଧ୍ୟ ଧଉଲଧାର ପର୍ବତମାଳା ଦୃଶ୍ୟମାନ ହେଉଥିବା ଖବର ଆସିଥିଲା।
