ନୂଆଦିଲ୍ଲୀ, ୧୮ା୫ (ପି.ଟି.)-କରୋନାଭାଇରସ୍ ଯୋଗୁ ଚତୁର୍ଥ ପର୍ଯ୍ୟାୟ ଲକ୍ଡାଉନ୍ କରିବା ଲାଗି ସରକାର ବାଧ୍ୟ ହୋଇଛନ୍ତି। ତେବେ କେନ୍ଦ୍ର ଗୃହ ମନ୍ତ୍ରଣାଳୟ କ୍ରୀଡ଼ା କମ୍ପ୍ଲେକ୍ସ ଖୋଲିିବା ଲାଗି ଅନୁମତି ଦେଇଛନ୍ତି। ଫଳରେ ମାର୍ଚ୍ଚ ମଧ୍ୟଭାଗରୁ ବନ୍ଦ ରହିଥିବା ଆଥଲେଟ୍ମାନଙ୍କ ଟ୍ରେନିଂ କାର୍ଯ୍ୟ ପୁଣି ଆରମ୍ଭ ହୋଇ ପାରିବ। ସ୍ପୋଟର୍ସ କମ୍ପ୍ଲେକ୍ସ ଏବଂ ଷ୍ଟାଡିୟମ ଖୋଲିବା ଲାଗି ଅନୁମତି ଦିଆଯାଇଥିଲେ ହେଁ ଦର୍ଶକମାନଙ୍କୁ ବାରଣ କରାଯାଇଛି। ସରକାରଙ୍କ ଗାଇଡ୍ଲାଇନ୍ ମାନି ଚଳିବାକୁ ହେବ। ଲକ୍ ଡାଉନ୍ ମିଆଦ ୧୭ ତାରିଖରେ ଶେଷ ହେଉଥିଲେ ମଧ୍ୟ ଏହାର ମିଆଦକୁ ସରକାର ପୁଣି ମେ ୩୧ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଭାରତରେ କୋଭିଡ୍-୧୯ ରୋଗୀଙ୍କ ସଂଖ୍ୟା ୯୦,୦୦୦ରୁ ଅଧିକ ହୋଇଥିବାବେଳେ ଇତିମଧ୍ୟରେ ୩୦୦୦ ପାଖାପାଖି ମୃତ୍ୟୁବରଣ କରିସାରିଲେଣି। ମାର୍ଚ୍ଚ ମଧ୍ୟ ଭାଗରେ ଲକ୍ଡାଉନ୍ ଲାଗୁ କରାଯାଇଥିଲା। ପଟିଆଲାସ୍ଥିତ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) କମ୍ପ୍ଲେକ୍ସଠାରେ ବର୍ତ୍ତମାନ ଅବସ୍ଥାନ କରୁଥିବା ଏଲିଟ୍ ଆଥଲେଟ୍ମାନେ ପୁନର୍ବାର ଟ୍ରେନିଂ ଆରମ୍ଭ କରିବା ଲାଗି ଦାବି କରିଥିଲେ। କ୍ରୀଡ଼ାମନ୍ତ୍ରୀ କିରେନ ରିଜିଜୁ ଗତ ସପ୍ତାହରେ ଭିଡିଓ କନଫରେନ୍ସ ଜରିଆରେ ଏ ବିଷୟରେ ଆଥ୍ଲେଟମାନଙ୍କ ମତାମତ ଜାଣିବାକୁ ଚାହିଁଥିଲେ। ଚଳିତମାସ ଶେଷ ଭାଗରେ କିଛି ନ ହେଲେ ଅଲିମ୍ପିକ ପାଇଁ ଯୋଗ୍ୟତା ଅର୍ଜନ କରିଥିବା ଆଥଲେଟମାନଙ୍କ ଲାଗି ପୁଣି ଜାତୀୟ କ୍ୟାମ୍ପ ଆରମ୍ଭ କରିବା ଲକ୍ଷ୍ୟ ରଖାଯାଇଥିବା ମନ୍ତ୍ରଣାଳୟ ପକ୍ଷରୁ ମେ ୩ ତାରିଖରେ ଘୋଷଣା କରାଯାଇଥିଲା।
