ଯୋଡ଼ା, ୮।୭(ଡି.ଏନ.ଏ.)-କେନ୍ଦୁଝର ଜିଲା ଯୋଡା ସହରର ଜୀବନରେଖା ସୁନାନଦୀ। ଏଥିରେ ବେଆଇନ୍ ବନ୍ଧ ନିର୍ମାଣ ଉପରେ ସମୀକ୍ଷା କରିବା ପାଇଁ ରମନ ମାଗସେସ୍ ପୁରସ୍କାରପ୍ରାପ୍ତ ଜଳମାନବ ଡ. ରାଜେନ୍ଦ୍ର ସିଂ ରବିବାର ଯୋଡ଼ା ଗସ୍ତ କରିଛନ୍ତି। ଅପରାହ୍ନ ୫ଟାରେ ଯୋଡା ବ୍ଲକ ଭୂୟାଁରୋଇଡା ପଞ୍ଚାୟତର ଖଣ୍ଡବନ୍ଧ ନିକଟରେ ଥିବା ଟାଟା କମ୍ପାନୀର ଚୋରମାଲଦା ୧୦ନଂ ଖଣି ନିକଟସ୍ଥ ସୁନା ନଦୀ ଉପରେ ଟାଟା କମ୍ପାନୀ ନିର୍ମାଣ କରିଥିବା ବନ୍ଧ ନିକଟରେ ପହଞ୍ଚିଥିଲେ। ତାଙ୍କ ସହିତ ମହାନଦୀ ବଞ୍ଚାଅ ଆନ୍ଦୋଳନର ଆବାହକ ସୁଦର୍ଶନ ଦାଶ, ସଂଯୋଜକ ବିଜୟ ପ୍ରଧାନ, ଅନ୍ତର୍ଜାତୀୟ ବୁଡାଳି ସବୀର ବକ୍ସ , ସୁନାନଦୀ ଓ କାରୋ ନଦୀ ବଞ୍ଚାଅ ଆନ୍ଦୋଳନର ଆବାହକ ଅଶୋକ ଠକ୍କର, ସଦସ୍ୟ ଦେବକାନ୍ତ ଦାସ, କାହ୍ନୁ ଓରାମ୍ ପ୍ରମୁଖ ପହଞ୍ଚିି ସ୍ଥାନୀୟ ଅଞ୍ଚଳବାସୀଙ୍କୁ ସୁନାନଦୀ ଉପରେ ଟାଟା କମ୍ପାନୀ ନିର୍ମାଣ କରିଥିବା ବେଆଇନ୍ ବନ୍ଧ ଉପରେ ପଚାରି ବୁଝିଥିଲେ। ଏହି ନଦୀର ସୁରକ୍ଷା ପାଇଁ ସେ ସ୍ଥାନୀୟ ଯୁବକମାନଙ୍କୁ ଆଗେଇ ଆସିବା ସହିତ ଏହାକୁ ତୀବ୍ର ବିରୋଧ କରିବା ପାଇଁ ଆହ୍ବାନ ଦେଇଥିଲେ। ସମସ୍ତେ ସଙ୍ଗଠିତ ହୋଇ ସୁନାନଦୀର ଜଳକୁ ରକ୍ଷା କରିବା ଲାଗି ଅଣ୍ଟା ଭିଡ଼ିବା ପାଇଁ କହିଥିଲେ। ଏଥିପାଇଁ ସେ ସମ୍ପୂର୍ଣ୍ଣ ରୂପେ ସ୍ଥାନୀୟ ଅଞ୍ଚଳବାସୀଙ୍କୁ ସହଯୋଗ କରିବେ ବୋଲି ଆଶ୍ୱାସନା ଦେଇଥିଲେ। ସେ ଗତ ୩୫ ବର୍ଷ ହେଲା ଦେଶର ନଦୀ ଗୁଡ଼ିକର ସୁରକ୍ଷା ପାଇଁ କାର୍ଯ୍ୟ କରିଆସୁଛନ୍ତି। ମହାନଦୀ ବଞ୍ଚାଅ ଆନ୍ଦୋଳନ ପକ୍ଷରୁ ନିବେଦନ ପରେ ସେ ଭୁବନେଶ୍ୱରକୁ ଆସିଥିଲେ। ସେ ସରକାର କିମ୍ବା କମ୍ପାନୀଙ୍କ ବିନା ସହଯୋଗରେ ସ୍ଥାନୀୟ ଲୋକମାନଙ୍କ ଶକ୍ତି, ଏକତାରେ ଏହି କାର୍ଯ୍ୟ କରିପାରିଥିବା ଏବଂ ସୁନାନଦୀକୁ ମଧ୍ୟ ଲୋକମାନଙ୍କ ସହଯୋଗରେ ପୂର୍ଣ୍ଣ ସୁରକ୍ଷା ଦେଇପାରିବେ ବୋଲି ଉପସ୍ଥିତ ସ୍ଥାନୀୟ ଅଞ୍ଚଳବାସୀଙ୍କୁ କହିଥିଲେ। ଟାଟା କମ୍ପାନୀ ଯେଉଁଠାରେ ରହିଛି ସେଠାରେ ନଦୀର ହତ୍ୟା କରୁଛି ା ତେଣୁ ସ୍ଥାନୀୟ ଆଦିବାସୀମାନେ ସଙ୍ଗଠିତ ହୋଇ କମ୍ପାନୀ ବିରୋଧରେ ଦୃଢ ସ୍ବର ଉତ୍ତୋଳନ କରିବା ଲଗି ସିଂ ଚେତାବନୀ ଦେଇଥିଲେ। ଓଡିଶାରେ ଥିବା ନଦୀର ସୁରକ୍ଷା ପାଇଁ ସେ ମୁଖ୍ୟମନ୍ତ୍ରୀଙ୍କୁ ଭେଟି ଏକ ସ୍ମାରକପତ୍ର ଦେଇଥିବା ଡ. ରାଜେନ୍ଦ୍ର ସିଂ ତାଙ୍କ ପ୍ରତିକ୍ରିୟାରେ ଗଣମାଧ୍ୟମକୁ କହିଥିଲେ ା
