ନୂଆଦିଲ୍ଲୀ,୨୩ା୧(ପି.ଟି.): କେନ୍ଦ୍ର ସରକାରଙ୍କ ଯୁକ୍ତି ନ ଶୁଣି ନାଗରିକତ୍ୱ ସଂଶୋଧନ ଆଇନ (ସିଏଏ) ଉପରେ ସ୍ଥଗିତାଦେଶ ଜାରି କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ସିଏଏର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ସର୍ବୋଚ୍ଚ ଅଦାଲତରେ ୧୪୩ ପିଟିଶନ ଦାଏର ହୋଇଥିବାବେଳେ ଏହା ଉପରେ ୪ ସପ୍ତାହ ମଧ୍ୟରେ ଜବାବ ରଖିବାକୁ କେନ୍ଦ୍ରକୁ ନିର୍ଦ୍ଦେଶ ଦିଆଯାଇଛି। ୫ ଜଣିଆ ସାମ୍ବିଧାନିକ ପୀଠରେ ଏହି ମାମଲାର ଶୁଣାଣି ହେବ। ପିଟିଶନଗୁଡ଼ିକର ଶୁଣାଣି କରି ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କେନ୍ଦ୍ରକୁ ନୋଟିସ ଜାରି କରିବା ସହ ବିଚାର ନ ସରିବା ପର୍ଯ୍ୟନ୍ତ ଏଭଳି ମାମଲାର ଶୁଣାଣିରୁ ହାଇକୋର୍ଟଗୁଡ଼ିକ ବିରତ ରହିବାକୁ କହିଛନ୍ତି। ସେହିପରି ଦେଶର ଅନ୍ୟଭାଗ ତୁଳନାରେ ଆସାମ ଓ ତ୍ରିପୁରାରେ ସିଏଏକୁ ନେଇ ଭିନ୍ନ ସମସ୍ୟା ରହିଥିବାରୁ ଉକ୍ତ ଦୁଇ ରାଜ୍ୟର ପିଟିଶନ ଅଲଗା ଶୁଣାଣି କରିବାକୁ ଖଣ୍ଡପୀଠ କହିଥିଲେ।
ମାମଲାକୁ ସାମ୍ବିଧାନିକ ପୀଠକୁ ପଠାଇବା ସହ ଏନ୍ପିଆର୍ କାର୍ଯ୍ୟକ୍ରମକୁ ଦୁଇମାସ ପାଇଁ ବନ୍ଦ ରଖିବାକୁ କେତେଜଣ ପିଟିଶନରଙ୍କ ତରଫରୁ ଅଦାଲତରେ ପ୍ରତିନିଧିତ୍ୱ କରୁଥିବା ବରିଷ୍ଠ ଆଇନଜୀବୀ କପିଲ ଶିବଲ କହିଥିଲେ। ସେହିପରି ସିଏଏର କାର୍ଯ୍ୟକାରିତାକୁ ମଧ୍ୟ ସ୍ଥଗିତ ରଖିବା ପାଇଁ ସେ ଅଦାଲତଙ୍କୁ ଅନୁରୋଧ କରିଥିଲେ। ତେବେ କେନ୍ଦ୍ର ସରକାରଙ୍କ ଜବାବ ନ ଶୁଣି ସିଏଏ ଏବଂ ଜାତୀୟ ଜନସଂଖ୍ୟା ପଞ୍ଜିକା (ଏନ୍ପିଆର୍) ଉପରେ ସ୍ଥଗିତାଦେଶ ଦିଆଯିବ ନାହଁ ବୋଲି ଖଣ୍ଡପୀଠ କହିବା ସହ ୪ ସପ୍ତାହ ପରେ ଆବେଦନକାରୀମାନଙ୍କ ପାଇଁ କୌଣସି ଅନ୍ତରୀଣ ବ୍ୟବସ୍ଥା କରିବାକୁ କହିଥିଲେ। ୪ ସପ୍ତାହ ପରେ ମାମଲାର ଦୈନନ୍ଦିନ ଶୁଣାଣି ସମ୍ପର୍କରେ ଖଣ୍ଡପୀଠ ନିଷ୍ପତ୍ତି ନେବେ। ସରକାରଙ୍କ ପକ୍ଷରୁ ଆଟର୍ନି ଜେନେରାଲ କେ.କେ. ବେଣୁଗୋପାଳ କୋର୍ଟଙ୍କୁ କହିଥିଲେ, ମୋଟ ୧୪୩ ପିଟିଶନ ମଧ୍ୟରୁ କେନ୍ଦ୍ରକୁ ୬୦ଟି ଆବେଦନର ନକଲ ମିଳିଛି। ସବୁ ଆବେଦନ ଉପରେ ଜବାବ ଦେବା ଲାଗି ସମୟ ଦରକାର ବୋଲି ସେ କହିଥିଲେ।
୨୦୧୪ ଡିସେମ୍ବର ୩୧ ପୂର୍ବରୁ ଭାରତକୁ ଚାଲିଆସିଥିବା ପଡୋଶୀ ପାକିସ୍ତାନ, ବାଂଲାଦେଶ, ଆଫଗାନିସ୍ତାନର ଅଣମୁସଲମାନ ଶରଣାର୍ଥୀମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ ପାଇଁ କେନ୍ଦ୍ର ସରକାର ସିଏଏ ଆଣିଛନ୍ତି। ୨୦୧୯ ଡିସେମ୍ବର ୧୨ରେ ରାଷ୍ଟ୍ରପତି ରାମନାଥ କୋବିନ୍ଦ ଏହି ବିଲ୍କୁ ମଞ୍ଜୁରୀ ପ୍ରଦାନ କରିଥିଲେ। ଆଇନର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ଇଣ୍ଡିଆନ ୟୁନିୟନ ମୁସ୍ଲିମ୍ ଲିଗ୍ (ଆଇୟୁଏମ୍ଏଲ୍), କଂଗ୍ରେସ ନେତା ଜୟରାମ ରମେଶ, ଆର୍ଜେଡି ନେତା ମନୋଜ ଝା, ତୃଣମୂଳ କଂଗ୍ରେସ ଏମ୍ପି ମହୁଆ ମୈତ୍ର ଏବଂ ଏଆଇଏମ୍ଆଇଏମ୍ ନେତା ଅସାଦୁଦ୍ଦିନ ଓଓ୍ବାଇସି ପ୍ରମୁଖ ସୁପ୍ରିମକୋର୍ଟରେ ପିଟିଶନ ଦାଏର କରିଥିଲେ।
