ଯୋଡ଼ା, ୪।୬ (ଡି.ଏନ.ଏ.)-କେନ୍ଦୁଝର ଜିଲା ଯୋଡା ଖଣି ମଣ୍ଡଳର ରାଜ୍ୟ ରାଜପଥ ନଂ ୨ ର ଜୁରୁଡି-ବାମେବାରୀ ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି। ଦୈନିକ ଏହି ରାସ୍ତା ଦେଇ ବିଭିନ୍ନ ଖଣି କମ୍ପାନୀ ମାନଙ୍କର ଖଣିଜ ବୋଝେଇ ଶହ ଶହ ଟ୍ରକ ଓ ଡମ୍ପର ପରିବହନ କରୁଛନ୍ତି। ଫଳରେ ଜୁରୁଡି ଲାଲଗେଟ ଠାରୁ ହାଟପଦା ଛକ ପର୍ଯ୍ୟନ୍ତ ଥିବା ରାସ୍ତାର ବିଭିନ୍ନ ସ୍ଥାନରେ ଖାଲଖମା ସୃଷ୍ଟି ହୋଇଛି। ରାସ୍ତାର ମରାମତି କାର୍ଯ୍ୟ ହୋଉନଥିବାରୁ ତାହା ଧିରେଧିରେ ବଡ ବଡ ଗର୍ତ୍ତ ସୃଷ୍ଟି କରୁଛି। ଏହି ରାସ୍ତା ଦେଇ ଯାଉଥିବା ସାଧାରଣ ପଥଚାରୀ, ବାଇକ ଚାଳକ, ଛୋଟ ଯାନବାହାନ ଅନେକ ସମୟରେ ଦୁର୍ଘଟଣାଗ୍ରସ୍ତ ହେଉଛି।
ରାଜ୍ୟ ସରକାର ଏହି ରାସ୍ତା ନିର୍ମାଣ କରିବା ପାଇଁ ଟେଣ୍ଡର ଜରିଆରେ ଏକ ଠିକାସଂସ୍ଥାକୁ ଦେଇଛନ୍ତି। ସମ୍ପୃକ୍ତ ଠିକାସଂସ୍ଥାର ରାସ୍ତା ନିର୍ମାଣରେ ବିଳମ୍ବ ଓ ମନ୍ଥର ଗତି ହେତୁ ରାସ୍ତା ସମ୍ପୂର୍ଣ୍ଣ ହୋଇପାରୁନାହିଁ। ଏପରିକି ପରିବହନ ଯୋଗୁ ଧୂଳିଧୂଆଁରେ ଅତିଷ୍ଠ ଅଞ୍ଚଳବାସୀଙ୍କ ରାସ୍ତାରେ ଜଳସିଞ୍ଚନ ପାଇଁ ଦାବି କରାଯାଉଥିଲେ ହେଁ ଦିନେ ଦୁଇଦିନ ରାସ୍ତାରେ ପାଣି ସିଞ୍ଚନ କରାଯିବା ପରେ ତାହା ବନ୍ଦ ହୋଇଯାଉଛି। ବାମେବାରୀଠାରୁ ବାଂଶପାଣି ପର୍ଯ୍ୟନ୍ତ ଏ ରାସ୍ତାର ସ୍ଥାନେ ସ୍ଥାନେ ରାସ୍ତା ନିର୍ମାଣ କରାଯାଇ ରାସ୍ତାରେ ଛୋଟ ଚଡ ଚିପ୍ସି ପଡିରହୁଛି ା ଯାହା ଫଳରେ ଏହି ରାସ୍ତା ଦେଇ ଯାତାୟତ କରିବା ଅତି ବିପଜ୍ଜନକ ହୋଇପଡିଛି। ସଂପୃକ୍ତ ଠିକାସଂସ୍ଥା ପକ୍ଷରୁ ଏହି ରାସ୍ତା ନିର୍ମାଣରେ ବିଳମ୍ବ କରାଯାଉଥିବାରୁ ଏହି ରାସ୍ତା ଦେଇ ଯୋଡା ବ୍ଲକର ଜଜାଙ୍ଗ, ଜୁରୁଡି, ଜଲହରି, ପଳସା, କାଳିମାଟି ସମେତ ଝୁମ୍ପୁରା ବ୍ଲକ ମହକୁମାର ଲୋକଙ୍କ ପାଇଁ ଯାତାୟତ କରିବା ଦୁର୍ବିସହ ହୋଇପଡିଛି। ଏ ସମ୍ପର୍କରେ ଟେଣ୍ଡର ଜରିଆରେ କାର୍ଯ୍ୟ ପାଇଥିବା ଏକ କମ୍ପାନୀର କନିଷ୍ଠ ଯନ୍ତ୍ରୀ ହିମାଂଶୁ ଚୌଧୁରୀଙ୍କୁ ପଚାରିବାରୁ ସେ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଡିଷ୍ଟ୍ରିକ ମିନେରାଲ ଫଣ୍ଡ (ଡିଏମ୍ଏଫ୍) ପକ୍ଷରୁ ୪୭ କୋଟି ଟଙ୍କା ବ୍ୟୟ ଅଟକଳରେ ବାମେବାରୀଠାରୁ ବାଂଶପାଣି ପର୍ଯ୍ୟନ୍ତ ୧୩ କି.ମି. ଦୂରତା ବିଶିଷ୍ଟ ଏହି ରାସ୍ତା ନିର୍ମାଣ କାର୍ଯ୍ୟ ଏହି ଠିକାସଂସ୍ଥା ପାଇଛି ା ପିଡବ୍ଲ୍ୟୁଡି ସହିତ ୨୦୨୦ ମସିହା ମଧ୍ୟରେ ଏହି ରାସ୍ତା ନିର୍ମାଣ ଶେଷ କରିବା ପାଇଁ ଚୁକ୍ତି ହୋଇଅଛି ା ତେବେ ଏପର୍ଯ୍ୟନ୍ତ ଶତକଡା ୫୦ ପ୍ରତିଶତ ମଧ୍ୟ କାର୍ଯ୍ୟ ଶେଷ ହୋଇପାରିନାହିଁ। ଏହି ରାସ୍ତା ନିର୍ମାଣର ବିଳମ୍ବ କାରଣ ସମ୍ପର୍କରେ ସେ ଅଧିକ ସୂଚନା ଦେଇ କହିଛନ୍ତି ଯେ, ବିଭିନ୍ନ ସ୍ଥାନରେ ଥିବା ଇଲେକ୍ଟ୍ରିକ ଖୁଣ୍ଟ ସ୍ଥାନାନ୍ତର ହୋଇପାରିନାହିଁ ା ଜିଲା ପ୍ରଶାସନ ପକ୍ଷରୁ ଜମି ଅଧିଗ୍ରହଣ ମଧ୍ୟ ଶେଷ ହୋଇପାରିନାହିଁ , ବିଭିନ୍ନ ସ୍ଥାନରେ ଗଛକଟା ମଧ୍ୟ ସମ୍ପୂର୍ଣ୍ଣ ହୋଇପାରିନାହିଁ ା ଏହା ସହିତ ଏହି ରାସ୍ତା ଦେଇ ଯାଇଥିବା ପାଇପ୍ଲାଇନ ମଧ୍ୟ ସ୍ଥାନାନ୍ତର ହୋଇପାରିନାହିଁ। ଏହି ସବୁ କାରଣରୁ ରାସ୍ତା ନିର୍ମାଣରେ ବିଳମ୍ଭ ହେଉଥିବା ସେ କହିଛନ୍ତି।
