ସରପଞ୍ଚ ପଦବୀ ଲାଗି ଦ୍ୱିମୁଖୀ ଲଢେଇ
9:01 amNovember 11, 2019 / 21

ଫୁଲବାଣୀ ଅଫିସ/ଫିରିଙ୍ଗିଆ,୧୧ା୧୧-କନ୍ଧମାଳ ଜିଲା ଫିରିଙ୍ଗିଆ ବ୍ଲକର ୩ ପଞ୍ଚାୟତରୁ ମାତ୍ର ପକାରୀରେ ହିଁ ଆସନ୍ତା ୨୭ରେ ଉପ ନିର୍ବାଚନ ହେବ। କ୍ରାଣ୍ଡିବାଲି ଏବଂ ସୁମରବନ୍ଧରେ ଭୋଟ ଗ୍ରହଣ ହେବନାହିଁ। କାଣ୍ଡ୍ରିବାଲିରେ ସମିତିସଭ୍ୟ ପାଇଁ ଜଣେ ପ୍ରାର୍ଥତ୍ପତ୍ର ଦାଖଲ କରିଥିବାରୁ ସେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇସାରିଛନ୍ତି। ସୁମରବନ୍ଧରେ ୧୧ ନଂ. ୱାର୍ଡର ସଦସ୍ୟ ଭାବେ କେହି ପ୍ରାର୍ଥିପତ୍ର ଦାଖଲ କରିନାହାନ୍ତି। ପକାରୀ ସରପଞ୍ଚ ପଦବୀ ପାଇଁ ଜୋରଦାର ଲଢ଼େଇ ହେବ। ଏଠାରେ ଦୁଇ ପ୍ରତିଦ୍ୱନ୍ଦ୍ୱୀ ଗୋଟିଏ ରାଜନୈତିକ ଦଳର ସମର୍ଥିତ ପ୍ରାର୍ଥୀ। ବସୁଦେବ କହଁର ଖୋଲା ବହି ଓ ମଙ୍ଗୁଳୁ କହଁର ମାଛ ଚିହ୍ନରେ ନିର୍ବାଚନ ଲଢୁଛନ୍ତି। ପକାରୀର ପୂର୍ବତନ ସରପଞ୍ଚ ବିଧାୟକ ଅଙ୍ଗଦ କହଁର ଅଟନ୍ତି। ସେ ବିଧାୟକ ଭାବେ ନିର୍ବାଚିତ ହେବାପରେ ଏହି ପଦବୀ ପାଇଁ ଉପନିର୍ବାଚନ ହେଉଛି। ବସୁଦେବ ଓ ମଙ୍ଗୁଳୁଙ୍କ ମଧ୍ୟରେ କଡା ଟକ୍କର ହେଉଥିବାବେଳେ ଶାସକ ଦଳର ସମର୍ଥନ ଯାହା ସପକ୍ଷରେ ଯିବ, ସେ ହିଁ ଜିତିବ ବୋଲି ଆଲୋଚନା ହେଉଛି। ନିର୍ବାଚନ ଆଉ ଅଳ୍ପ ଦିନ ଥିବାରୁ ପ୍ରାର୍ଥୀମାନେ ସମର୍ଥକଙ୍କୁ ଧରି ପ୍ରଚାର ଆରମ୍ଭ କରି ଦେଲେଣି। ଏହି ପଞ୍ଚାୟତରେ ମୋଟ ୧୨ଟି ୱାର୍ଡ ରହିଛି। ମୋଟ ଭୋଟ ସଂଖ୍ୟା ୧୨୦୯। ସେମାନଙ୍କ ମଧ୍ୟରୁ ମହିଳା ଭୋଟର ୬୪୧ ଓ ପୁରୁଷ ଭୋଟରଙ୍କ ସଂଖ୍ୟା ୫୬୮।
ସୂଚନାଯୋଗ୍ୟ, ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ପକାରୀ ସରପଞ୍ଚ ଭାବେ ଅଙ୍ଗଦ କହଁର ନିର୍ବାଚିତ ହୋଇଥିଲେ। ଚଳିତ ସାଧାରଣ ନିର୍ବାଚନରେ ସେ ବିଜେଡି ବିଧାୟକ ଭାବେ ନିର୍ବାଚିତ ହେବାରୁ ସେହି ପଦବୀ ଖାଲି ପଡିଥିଲା। ସେତବେଳର ନାଏବ ସରପଞ୍ଚ କିସିମତି କହଁର ସରପଞ୍ଚ ଦାୟିତ୍ୱରେ ରହିଥିଲେ। ହେଲେ ଗତ ସେପ୍ଟେମ୍ବରରେ ତାଙ୍କର ମୃତ୍ୟୁ ହୋଇଥିଲା। ଏହାପରେ ଅସ୍ଥାୟୀ ସରପଞ୍ଚ ଭାବେ ୭ ନଂ. ୱାର୍ଡ ମେମ୍ବର ଜନକ କହଁର ଦାୟିତ୍ୱ ନେଇଥିଲେ। କ୍ରାଣ୍ଡିବାଲି ସମିତିସଭ୍ୟ ସସ୍ମିତା କହଁରଙ୍କ ସରକାରୀ ଚାକିରି ହେବାରୁ ତାଙ୍କୁ ପଦବୀ ଛାଡିବାକୁ ପଡିଥିଲା। ଏବେ ଏହି ପଦବୀ ଲାଗି ଜଣେମାତ୍ର ପ୍ରାର୍ଥୀ ଯଶୋଦା କହଁର ନାମାଙ୍କନପତ୍ର ଦାଖଲ କରି ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ସେହିପରି ସୁମରବନ୍ଧ ୧୧ନଂ. ୱାର୍ଡର ସଦସ୍ୟ ଦିଲୀପ କୁମାର ସାହୁଙ୍କୁ ମଧ୍ୟ ସରକାରୀ ଚାକିରି ମିଳିବାରୁ ସେ ଇସ୍ତଫା ଦେଇଥିଲେ। ମାତ୍ର ଏହି ପଦବୀ ପାଇଁ କେହି ନାମାଙ୍କନପତ୍ର ଦାଖଲ କରିନାହାନ୍ତି।