ଖଣ୍ଡପଡ଼ା,୨୫।୧୦(ସ୍ବ.ପ୍ର.): ଅବିଶ୍ରାନ୍ତ ବର୍ଷା ଲାଗି ରହିବା ଫଳରେ ବାଘମାରୀ-କଣ୍ଟିଲୋ ୪୮ ନଂ. ରାଜପଥର ନୟାଗଡ଼ ଜିଲା କଣ୍ଟିଲୋ ପଲଟନ ପଡ଼ିଆ ନିକଟରେ ନିର୍ମିତ ଗାର୍ଡୱାଲଟି ଗୁରୁବାର ମୂଳରୁ ସମ୍ପୂର୍ଣ୍ଣ ଧସିପଡିଛି। ଗତ ୨ବର୍ଷ ପୂବେ ଏହା ନିର୍ମିତ ହୋଇଥିଲା। ପୂର୍ତ୍ତ ବିଭାଗ ପକ୍ଷରୁ ୪୮ ନଂ ରାଜ୍ୟ ରାଜପଥ ବାଘମାରୀଠାରୁ ଦଶପଲ୍ଲା ମୁଖ୍ୟ ପୂର୍ତ୍ତ ବିଭାଗ ରାସ୍ତାକୁ ସମ୍ପ୍ରସାରଣ କରାଯାଇ ନୀଳମାଧବ ବିଦ୍ୟାପୀଠ ପଲଟନ ପଡିଆ ପାଖରେ ଗାର୍ଡୱାଲଟି ନିର୍ମାଣ କରାଯାଇଥିଲା। ତେବେ ନିମ୍ନମାନର କାର୍ଯ୍ୟ ଯୋଗୁ ସନ୍ଧ୍ୟାରେ ଏହା ଧସି ପଡିଥିବା ଅଭିଯୋଗ ହେଉଛି।
ଅନ୍ୟପକ୍ଷେ ଲଗାଣ ବର୍ଷା ଯୋଗୁ ଖଣ୍ଡପଡ଼ା ଅଞ୍ଚଳରେ କଚ୍ଚା ଓ ଝାଟିମାଟି ଚାଳ, ଟିଣ ଓ ଆଜବେଷ୍ଟସ ଛପରଘରେ ବସବାସ କରୁଥିବା ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ତଳିଆ ଅଞ୍ଚଳରେ ବାସ କରୁଥିବା ଝୁମ୍ପୁଡି ଘର ବାସିନ୍ଦାଙ୍କ ଦୁଃଖ ବଳିପଡିଛି । ଘର ମଧ୍ୟରେ ବର୍ଷାପାଣି ପଶିଯାଇଥିବା ଯୋଗୁ ଅନେକ ପରିବାର ଏବେ ଚିନ୍ତାରେ ପଡିଯାଇଛନ୍ତି। ଅପରପକ୍ଷେ ଗତ କିଛିଦିନ ହେଲା କଣ୍ଟିଲୋ ବିଦ୍ୟୁତ୍ ସେକ୍ସନ ଅଧୀନରେ ଥିବା ସମସ୍ତ ଅଞ୍ଚଳରେ ଅଘୋଷିତ ବିଦ୍ୟୁତ୍ କାଟ ଲୋକମାନଙ୍କୁ ଅତିଷ୍ଠ କରି ଦେଇଛି। ଗୁରୁବାର ସକାଳୁ ଲଘୁଚାପଜନିତ ଲଗାଣ ବର୍ଷା ଲାଗିରହିଥିବା ବେଳେ ଦିନ ତମାମ ବିଦ୍ୟୁତ୍ ସରବରାହ ବିଚ୍ଛିନ୍ନ ହେଉଥିବାରୁ ଖଣ୍ଡପଡ଼ା ବିଦ୍ୟୁତ୍ ଉପଖଣ୍ଡ ଅଧୀନ କଣ୍ଟିଲୋ, ବାଣପୁର, ସିଧାମୂଳା, ବଳରାମପ୍ରସାଦ, ବେଣାଗାଡିଆ, ପଥରଚକଡା, ମାଧପୁର, ଧାନଚେଙ୍ଗଡା, ଲକ୍ଷ୍ମୀପ୍ରସାଦ ଆଦି ଅଞ୍ଚଳର ଲୋକେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତ। ଏହି ସମୟ ମଧ୍ୟରେ ଖଣ୍ଡପଡା ସହରାଞ୍ଚଳରେ ବିଦ୍ୟୁତ୍ ସରବରାହ ସ୍ବାଭାବିକ ରହିଥିବା ବେଳେ ବିଭିନ୍ନ ସମୟରେ କଣ୍ଟିଲୋ ସେକ୍ସନ ଅଧୀନରେ ଥିବା ସମସ୍ତ ଗ୍ରାମରେ ବିଦ୍ୟୁତ୍ ସରବରାହ ବନ୍ଦ ରହୁଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି ।
