ବାସୁଦେବପୁର, ୧୪ା୮(ଡି.ଏନ୍.ଏ.)- ଯୁବ ସମାଜ ଉପରେ ଦେଶର ଭବିଷ୍ୟତ ନିର୍ଭର କରେ । ସେମାନେ ନିଜର ଦକ୍ଷତା କାର୍ଯ୍ୟ ବଳରେ ସମାଜକୁ ନୂତନ ଦିଗ୍ଦର୍ଶନ ଦେଇ ପାରିବେ ବୋଲି ଭଦ୍ରକ ଜିଲା ବାସୁଦେବପୁରସ୍ଥିତ ତୃପ୍ତି ମହିଳା ମହାବିଦ୍ୟାଳୟ ପରିସରରେ ମଙ୍ଗଳବାର ପାଳିତ ବିଶ୍ୱ ଯୁବ ଦିବସ ସମାରୋହରେ ମତ ବ୍ୟକ୍ତ କରାଯାଇଛି। ଏହି କାର୍ଯ୍ୟକ୍ରମରେ ବାସୁଦେବପୁର ଅଞ୍ଚଳର ୬ଟି ମହାବିଦ୍ୟାଳୟର ଛାତ୍ରୀଛାତ୍ର ଯୋଗଦେଇ ବିଶ୍ୱ ଯୁବ ଦିବସର ଗୁରୁତ୍ୱ ଓ ସମାଜ ଗଠନରେ ଯୁବକଙ୍କ ଭୂମିକା ସମ୍ପର୍କରେ ବକ୍ତବ୍ୟ ରଖିଥିଲେ। ଏହି ଅବସରରେ ୫୫ ଜଣ ଛାତ୍ରୀଛାତ୍ର ପ୍ରତିଯୋଗିତାରେ ଅଂଶଗ୍ରହଣ କରି ବକ୍ତବ୍ୟ ରଖିଥିଲେ।
ପୂର୍ବାହ୍ନରେ ପ୍ରାୟ ୩ ଶହରୁ ଊର୍ଦ୍ଧ୍ୱ ଛାତ୍ରୀଛାତ୍ର ଏକ ଶୋଭାଯାତ୍ରାରେ ନିକଟସ୍ଥ ଗାଁ ଓ ସହର ପରିକ୍ରମା କରିଥିଲେ। ଆୟୋଜିତ ସଭାରେ ମୁଖ୍ୟଅତିଥି ଭାବରେ ତୃପ୍ତି ମହିଳା ମହାବିଦ୍ୟାଳୟର ପରିଚାଳନା କମିଟି ସଭାପତି ସୁରେଶ ଚନ୍ଦ୍ର ମହାନ୍ତି ଯୋଗ ଦେଇ ଯୁବ ସମାଜ ଉପରେ ଦେଶର ଭବିଷ୍ୟତ କିପରି ନିର୍ଭର କରୁଛି, ସେ ନେଇ ବକ୍ତବ୍ୟ ରଖିଥିଲେ। ରେଡ୍ରିବନ କ୍ଲବ ଆନୁକୂଲ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ କାଉନସିଲର ଶୈଳବାଳା ଦାଶ ଅତିଥି ପରିଚୟ ପ୍ରଦାନ କରିଥିଲେ। ତୃପ୍ତି ମହିଳା ମହାବିଦ୍ୟାଳୟ ଡିଗ୍ରୀ ବିଭାଗ ଭାରପ୍ରାପ୍ତ ଅଧ୍ୟକ୍ଷ ପଙ୍କଜିନୀ ଦାଶ ସ୍ବାଗତ ଭାଷଣ ଦେଇଥିଲେ। ତୃପ୍ତି ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟ ଅଧ୍ୟକ୍ଷ ସ୍ନିଗ୍ଧା ମହାନ୍ତି ସଭାରେ ସଂଯୋଜନା କରିଥିଲେ। ଏହି କାର୍ଯ୍ୟକ୍ରମରେ ତୃପ୍ତି ମହିଳା ଡିଗ୍ରୀ ମହାବିଦ୍ୟାଳୟ, ତୃପ୍ତି ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟ, ଶହୀଦ ସ୍ମୃତି ଇରମ କନିଷ୍ଠ ମହାବିଦ୍ୟାଳୟ, ବାରାପୁର ଡିଗ୍ରୀ କଲେଜ, ବାରାପୁର କନିଷ୍ଠ କଲେଜ, ନବଘନ ମହାବିଦ୍ୟାଳୟ କରଞ୍ଜଆଡ଼ିଆର ଛାତ୍ରୀଛାତ୍ର ଅଂଶଗ୍ରହଣ କରିଥିଲେ।
