ନୂଆଦିଲ୍ଲୀ, ୧୭ା୪: ନିଜ ସମୟରେ ଯେ କୌଣସି ପରିବେଶ ଓ ପଡ଼ିଆରେ ବ୍ୟାଟ୍ସମ୍ୟାନଙ୍କ ମନରେ ଭୀତି ସଞ୍ଚାର କରି ପାରୁଥିବା ସ୍ପିଡ୍ଷ୍ଟର ହେଲେ ଅଷ୍ଟ୍ରେଲିଆର ଗ୍ଲେନ ମ୍ୟାକଗ୍ରାଥ। ବ୍ୟକ୍ତିଗତ ପ୍ରଦର୍ଶନ ମାଧ୍ୟମରେ ଅଷ୍ଟ୍ରେଲିଆକୁ ଅନେକ ସଫଳତାର ସ୍ବାଦ ଚଖାଇଛନ୍ତି ଏହି କିମ୍ବଦନ୍ତୀ ବୋଲର । ତାଙ୍କ ବୋଲିଂକୁ ଖେଳିବା ବ୍ୟାଟ୍ସମ୍ୟାନଙ୍କ ପାଇଁ ସହଜ ହୋଇ ନ ଥାଏ। ସେଥିପାଇଁ ସେ ନିଜ ସମୟର ସବୁଠାରୁ ଦ୍ରୁତ ବୋଲରର ମାନ୍ୟତା ପାଇଥିଲେ। ଲାଇନ୍ ଓ ଲେନ୍ଥ୍ ସହ ସେ ଦୀର୍ଘଦିନଧରି ପ୍ରଦର୍ଶନରେ ସ୍ଥିରତା ରଖି ପାରିଥିଲେ। ବିଶ୍ୱରେ ତାଙ୍କ ବିପକ୍ଷରେ ପ୍ରଭାବୀ ପ୍ରଦର୍ଶନ କରିଥିବା ବ୍ୟାଟ୍ସମ୍ୟାନଙ୍କ ସଂଖ୍ୟା ବହୁତ କମ୍। କ୍ୟାରିୟରରେ ଅନେକ ଥର ହ୍ୟାଟ୍ରିକ ଅର୍ଜନ କରିଥିବା ମ୍ୟାକଗ୍ରା ନିଜ ମନକଥା ପ୍ରକାଶ କରିଛନ୍ତି। ବିଶ୍ୱର କେଉଁ ୩ ଜଣ ବ୍ୟାଟ୍ସମ୍ୟାନଙ୍କୁ ଆଉଟ କରି ହ୍ୟାଟ୍ରିକ ଅର୍ଜନ କଲେ ତାଙ୍କୁ ମାନସିକ ଶାନ୍ତି ମିଳିିବ ବୋଲି ପ୍ରଶ୍ନର ଉତ୍ତରରେ ସେ ୩ ଜଣଙ୍କ ନାମ ନେଇଛନ୍ତି। ତାଙ୍କ ସ୍ବପ୍ନର ହ୍ୟାଟ୍ରିକ ଲାଇନ୍ଅପ୍ରେ ସେ ବ୍ରାଏନ ଲାରା, ସଚିନ ତେନ୍ଦୁଲକର ଓ ରାହୁଲ ଡ୍ରାଭିଡଙ୍କ ନାମ ନେଇଛନ୍ତି। ମ୍ୟାକଗ୍ରାଙ୍କ ମତରେ ବ୍ୟାଟ୍ସମ୍ୟାନଙ୍କ ଅପେକ୍ଷା ବୋଲରମାନେ ଅଧିକ ପରିଶ୍ରମ କରିଥାନ୍ତି ।
କିଛିଦିନ ତଳେ ମ୍ୟାକଗ୍ରା-ତେନ୍ଦୁଲକର ଓ ସୋଏବ ଅଖତର-ତେନ୍ଦୁଲକରଙ୍କ ମଧ୍ୟରେ ଲଢ଼େଇର ଭିନ୍ନତା ଦର୍ଶାଇଥିଲେ ପୂର୍ବତନ ଅଷ୍ଟ୍ରେଲୀୟ ସ୍ପିନର ବ୍ରାଡ୍ ହଗ୍। ଟୁଇଟରରେ ଜଣେ ପ୍ରଶଂସକଙ୍କ ପ୍ରଶ୍ନର ଉତ୍ତରରେ ହଗ୍ କହିଥିଲେ ଯେ, ସଚିନଙ୍କ ବିପକ୍ଷରେ ମ୍ୟାକଗ୍ରା ଧୈର୍ଯପୂର୍ଣ୍ଣଭାବେ ବିଜୟ ଚାହିଁଥାନ୍ତି । ତାଙ୍କର ଏପରି କୌଶଳ ଦୀର୍ଘଦିନ ପଯର୍ୟନ୍ତ ଚାଲିଥିଲା। ଅନ୍ୟପକ୍ଷରେ ସଚିନଙ୍କ ବିପକ୍ଷରେ ଅଖତରଙ୍କ ଲଢ଼େଇ ଭିନ୍ନ ଥିଲା। ଅଖତର ନିଜ ପେସ୍ ମାଧ୍ୟମରେ ସଚିନଙ୍କୁ ନିୟନ୍ତ୍ରଣରେ ରଖିବାକୁ ଚେଷ୍ଟା କରିଥାନ୍ତି। ଏହା ସେତେବେଳେ ଭାରତ-ପାକିସ୍ତାନ ଲଢ଼େଇକୁ ଅଧିକ ରୋମାଞ୍ଚକ କରିଥିଲା ।
