ନୂଆଦିଲ୍ଲୀ,୨୨।୭- ଚଳିତ ମାସରେ ଗୋଟିଏ ପରେ ଗୋଟିଏ ସ୍ବର୍ଣ୍ଣିମ ସଫଳତା ପାଇ ଚାଲିଥିବା ଭାରତୀୟ ସ୍ପ୍ରିଣ୍ଟର ହିମା ଦାସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଇଛନ୍ତି। ନିକଟରେ ହିମା ଚଳିତ ମାସରେ ୫ମ ସ୍ବର୍ଣ୍ଣ ଜିତିବା ପରେ ରବିବାର ପ୍ରଧାନମନ୍ତ୍ରୀ ମୋଦି ଟୁଇଟର ଜରିଆରେ ଶୁଭେଚ୍ଛା ଜଣାଇଥିଲେ। ହିମା ତୁମ ପାଇଁ ଭାରତ ଗର୍ବିତ। କିଛିଦିନ ମଧ୍ୟରେ ବିଭିନ୍ନ ଟୁର୍ନାମେଣ୍ଟରେ ୫ମ ସ୍ବର୍ଣ୍ଣ ଜିତି ପ୍ରତ୍ୟେକଙ୍କୁ ଆଶ୍ଚର୍ଯ୍ୟ ଚକିତ କରି ଦେଇଛ। ଏଥିନେଇ ତମକୁ ଶୁଭେଚ୍ଛା ବୋଲି ମୋଦି ଟୁଇଟ୍ କରିଥିଲେ। ଏହାର ପ୍ରତିକ୍ରିୟାରେ ଶୁଭକାମନା ଲାଗି ମୋଦିଙ୍କୁ ଧନ୍ୟବାଦ। ମୁଁ ଆହୁରି କଠିନ ପରିଶ୍ରମ କରିବି ଓ ଦେଶ ପାଇଁ ଆହୁରି ପଦକ ଆଣିବି ବୋଲି ହିମା କହିଛନ୍ତି। ପୂର୍ବରୁ ରାଷ୍ଟ୍ରପତି ରାମନାଥ କୋବିନ୍ଦ, କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକର, ଭେଟେରାନ ବଲିଉଡ୍ ଅଭିନେତା ଅମିତାଭ ବଚନ, ଅଭିନେତ୍ରୀ ଅନୁଷ୍କା ଶର୍ମା ଓ ସୋନମ କପୁର ମଧ୍ୟ ୩ ସପ୍ତାହ ମଧ୍ୟରେ ୫ ପଦକ ଜିତିଥିବା ହିମାଙ୍କୁ ଶୁଭେଚ୍ଛା ଜଣାଇଥିଲେ। ଗତ ୨୦ ତାରିଖରେ ଚେକ୍ ଗଣତନ୍ତ୍ରଠାରେ ହିମା ୫ମ ସ୍ବର୍ଣ୍ଣ ଜିତିଥିଲେ। ସେ ୪୦୦ ମିଟର ଦୌଡ଼କୁ ୫୨.୪୯ ସେକେଣ୍ଡରେ ଶେଷ କରିଥିଲେ। ୧୭ ତାରିଖରେ ତାବୋର ଆଥ୍ଲେଟିକ୍ସ ପ୍ରତିଯୋଗିତାର ୨୦୦ ମି. ଇଭେଣ୍ଟରେ ୪ର୍ଥ ସ୍ବର୍ଣ୍ଣ ଜିତିଥିବାବେଳେ ୧୩ ତାରିଖରେ କ୍ଲାଡ୍ନୋ ଆଥ୍ଲେଟିକ୍ସରେ ସମାନ ଇଭେଣ୍ଟରେ ୩ୟ ଶୀର୍ଷ ସଫଳତା ପାଇଥିଲେ। ଚଳିତ ମାସର ୨ ଓ ୮ ତାରିଖରେ ପୋଲାଣ୍ଡର ଦୁଇଟି ପ୍ରତିଯୋଗିତାରେ ସେ ପ୍ରଥମ ଦୁଇ ସ୍ବର୍ଣ୍ଣପଦକ ହାତେଇଥିଲେ।
