କୋଲକାତା,୨୫।୬: ଚଳିତ ଦିନରେ ଶାଶୁ ବୋହୂଙ୍କ କଳି ସବୁବେଳେ ଶୁଣିବାକୁ ମିଳୁଥିବା ବେଳେ ପଶ୍ଚିମ ବଙ୍ଗରେ ଜଣେ ଶାଶୁ ବୋହୂ ସମସ୍ତଙ୍କ ପାଇଁ ଉଦାହରଣ ପାଲଟିଛନ୍ତି। ହାଓ୍ବଡା ଜିଲାର ସାଲିକାରେ ଜଣେ ଶାଶୁ ବୋହୂକୁ ବଞ୍ଚାଇବାକୁ ଯାଇ ନିଜ ପୁଅକୁ ଗୁଳି ମାରିଛନ୍ତି। ସୂଚନାଯୋଗ୍ୟ, ଉକ୍ତ ଅଞ୍ଚଳରେ ରେଣୁ ଶର୍ମା (୬୦), ପୁଅ ମନୋଜ(୩୧) ଓ ବୋହୂ ଦେବୀ ରୁହନ୍ତି। ମନୋଜ ଉଭୟ ଟ୍ରକ ଓ ଟ୍ୟାକ୍ସି ଚଲାନ୍ତି। ରାତିରେ ଟ୍ରକ ଚଲାଉଥିବାରୁ ସେ ନିଜ ସୁରକ୍ଷା ପାଇଁ ପାଖରେ ୨ଟି ବନ୍ଧୁକ ରଖିଥାନ୍ତି। ପ୍ରତିଦିନ ମନୋଜ ନିଶା ଅବସ୍ଥାରେ ଘରକୁ ଫେରି ମା’ ଓ ପତ୍ନୀଙ୍କୁ ଗାଳିଗୁଳଜ କରିବା ସହ ମାଡ଼ ମାରିଥାନ୍ତି। ତେବେ ସୋମବାର ମଧ୍ୟ ମନୋଜ ନିଶା ଅବସ୍ଥାରେ ଘରକୁ ଆସି ୨ହାତରେ ୨ଟି ବନ୍ଧୁକ ଧରି ଦେବୀଙ୍କ ସହ ମାଡ଼ପିଟ୍ କରିଥିଲେ। ସେହି ସମୟରେ ରେଣୁ ପହଞ୍ଚି ଦେବୀଙ୍କୁ ବଞ୍ଚାଇବାକୁ ଉଦ୍ୟମ କରିଥିଲେ। ହେଲେ ମନୋଜ ୨ଜଣଙ୍କୁ ଜୀବନରୁ ମାରିଦେବାକୁ ଧମକ ଦେଇଥିଲେ। ଏହାପରେ ରେଣୁ ପୁଅ ମନୋଜଠାରୁ ଏକ ବନ୍ଧୁକ ଛଡ଼ାଇ ତାଙ୍କୁ ଗୁଳି ମାରିଥିଲେ ବୋଲି ଦେବୀ କହିଛନ୍ତି। ତେବେ ମନୋଜଙ୍କୁ ଗୁରୁତର ଅବସ୍ଥାରେ ପ୍ରଥମେ ହାଓ୍ବଡା ଓ ପରେ କୋଲକାତାର ଏସ୍ଏସ୍କେଏମ୍ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଏହି ଘଟଣାରେ ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଥିବା ବେଳେ ଅଭିଯୁକ୍ତ ରେଣୁ ଗିରଫ କରିଛି। ଏଥିସହ ମନୋଜଙ୍କ ୨ଟି ବନ୍ଧୁକକୁ ଜବତ କରିଛି ପୋଲିସ।
