ମୁମ୍ବାଇ,୧୮।୫- ଭାରତୀୟ ଦଳର ମଧ୍ୟକ୍ରମର ବ୍ୟାଟ୍ସମ୍ୟାନ ଓ କାମଚଳା ସ୍ପିନର କେଦାର ଯାଦବଙ୍କ ବିଶ୍ୱକପ୍ରେ ଖେଳିବା ନେଇ ଲାଗି ରହିଥିବା ଅନିଶ୍ଚିତତାର ଅନ୍ତ ହୋଇଛି। ତାଙ୍କୁ ଶନିବାର ଫିଟ୍ ଘୋଷିତ କରାଯାଇଛି। ଫଳରେ ଆସନ୍ତା ୨୨ ତାରିଖରେ ବଳକା ଭାରତୀୟ ଦଳର ଖେଳାଳିଙ୍କ ସହ ଲଣ୍ଡନ ଗସ୍ତ କରିବେ ବୋଲି ସ୍ପଷ୍ଟ ହୋଇଛି। ଚେନ୍ନାଇ ସୁପର କିଙ୍ଗ୍ସର ଅନ୍ତିମ ଲିଗ୍ ମ୍ୟାଚ୍ରେ ୩୪ ବର୍ଷୀୟ ଅଲରାଉଣ୍ଡରଙ୍କ କାନ୍ଧରେ ଆଘାତ ଲାଗିଥିଲା। ଟିମ୍ ଇଣ୍ଡିଆ ଫିଜିଓ ପାର୍ଟିକ ଫରହାର୍ଟଙ୍କ ତତ୍ତ୍ୱାବଧାନରେ କେଦାର ସମ୍ପୂର୍ଣ୍ଣ ଫିଟ୍ନେସ ହାସଲ କରିଛନ୍ତି। ଏ ନେଇ ଫିଜିଓ ପାର୍ଟିକ ଫିଟନେସ ରିପୋର୍ଟ ଦାଖଲ କରିଛନ୍ତି। ଭାରତୀୟ ଦଳର ଫିଜିଓ ଓ କେଦାର ଗତ ସପ୍ତାହରେ ମୁମ୍ବାଇ ଏକ ପଞ୍ଚ ତାରକା ହୋଟେଲକୁ ଆସିଥିଲେ। ଏମ୍ସିଏର ବି.କେ.ସି. ଫାସିଲିଟରେ କିଛି ଟ୍ରେନିଂ ସେସନ ପରେ ଯାଦବ ଫିଟ୍ନେସ ଟେଷ୍ଟ ଦେଇ ଉତ୍ତୀର୍ଣ୍ଣ ହୋଇଥିଲେ। ଯାଦବ ଏପର୍ଯ୍ୟନ୍ତ ୫୯ ଦିନିକିଆ ମ୍ୟାଚ୍ ଖେଳି ୪୩.୫୦ ଆଭରେଜରେ ୧୧୭୪ ରନ୍ କରିଛନ୍ତି। ତାଙ୍କ ଛୋଟିଆ କ୍ୟାରିୟରରେ ୨ ଶତକ ଓ ୫ ଅର୍ଦ୍ଧଶତକୀୟ ଇନିଂସ ରହିଛି। ବୋଲିଂରେ ମଧ୍ୟ ତାଙ୍କର ଦକ୍ଷତା ରହିଛି। ସେ ୩୪.୭୦ ହାରରେ ୨୭ ଉଇକେଟ ନେଇଛନ୍ତି। ଏଥିଯୋଗୁ ଭାରତୀୟ ଦଳର ସେ ଜଣେ ଗୁରୁତ୍ୱପୂର୍ଣ୍ଣ ସଦସ୍ୟ।
