ନୂଆଦିଲ୍ଲୀ, ୧୧ା୧୦:ସୁପ୍ରିମକୋର୍ଟ କଲେଜିୟମରେ ବିଚାରପତି ନିଯୁକ୍ତି ପ୍ରକ୍ରିୟାକୁ ନେଇ ବିବାଦ ଘନେଇବାରେ ଲାଗିଛି। ପଦୋନ୍ନତି ପାଇ ସୁପ୍ରିମକୋର୍ଟରେ ନିଯୁକ୍ତ ହେବାକୁ ଥିବା ସମ୍ଭାବ୍ୟ ପ୍ରାର୍ଥୀମାନଙ୍କୁ ଚୂଡ଼ାନ୍ତ କରିବା ସକାଶେ ସିଜେଆଇ ୟୁ.ୟୁ. ଲଲିତ ନିଷ୍ପତ୍ତି ନେଇଥିଲେ। ଏହାକୁ ନେଇ ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଏସ୍. ଅବଦୁଲ୍ ନାଜିର ଆପତ୍ତି ଉଠାଇଥିଲେ। ଏକ ଅପ୍ରତ୍ୟାଶିତ ଘଟଣାକ୍ରମରେ କଲେଜିୟମ ୨ ବିଚାରପତିଙ୍କ ନାମ ପ୍ରଘଟ କରିଛି। ଅକ୍ଟୋବର ୯ରେ ସ୍ବାକ୍ଷରିତ ଉକ୍ତ ବିବୃତି ସୋମବାର ସାର୍ବଜନୀନ କରାଯାଇଛି। କଲେଜିୟମ ବୈଠକଗୁଡ଼ିକ ସାଧାରଣତଃ ବିଚାରପତିମାନଙ୍କ ବ୍ୟକ୍ତିଗତ ଉପସ୍ଥିତିରେ ଅନୁଷ୍ଠିତ ହୋଇଥାଏ। ନିଯୁକ୍ତି ପାଇବାକୁ ଥିବା ପ୍ରାର୍ଥୀଙ୍କ ନାମକୁ ନେଇ କୌଣସି ମତଭେଦ ଦେଖାଦେଲେ ଚୂଡ଼ାନ୍ତ ତାଲିକା ପ୍ରକାଶ ପୂର୍ବରୁ ପ୍ୟାନେଲ ତାକୁ ଆପୋସ ଆଲୋଚନା ଜରିଆରେ ଦୂର କରିଥାଏ। ତେବେ ସେପ୍ଟେମ୍ବର ୩୦ ବୈଠକରେ ବ୍ୟକ୍ତିଗତଭାବେ ଉପସ୍ଥିତ ହୋଇପାରି ନ ଥିବା କଲେଜିୟମ ସଦସ୍ୟଙ୍କ ମତାମତ ପତ୍ର ଜରିଆରେ ଗ୍ରହଣ କରିବା ପାଇଁ ସିଜେଆଇ ନିଷ୍ପତ୍ତି ନେଇଥିଲେ। ଏହି ‘ଲେଟର ରୁଟ୍’ ପ୍ରସ୍ତାବ ସପକ୍ଷରେ କଲେଜିୟମ ସଦସ୍ୟ ଜଷ୍ଟିସ୍ ସଞ୍ଜୟ କିଷାନ କୌର ଏବଂ କେ.ଏମ୍. ଜୋସେଫ୍ ସହମତି ପ୍ରକାଶ କରିଥିବାବେଳେ ଜଷ୍ଟିସ୍ ଚନ୍ଦ୍ରଚୂଡ଼ ଏବଂ ନାଜିର୍ ବିରୋଧ କରିଥିଲେ। ଆପତ୍ତି ଉଠାଇଥିବା ଦୁଇ ବିଚାରପତିଙ୍କ ନାମ କଲେଜିୟମ ପକ୍ଷରୁ ପ୍ରଘଟ କରାଯିବା ପରେ ବର୍ତ୍ତମାନର ସିଜେଆଇ ଲଲିତ ଏବଂ ତାଙ୍କ ଉତ୍ତରାଧିକାରୀ ଜଷ୍ଟିସ୍ ଚନ୍ଦ୍ରଚୂଡ଼ ଏକପ୍ରକାର ମୁହଁାମୁହିଁ ଅବସ୍ଥାକୁ ଆସିଯାଇଛନ୍ତି। ଆଇନ ମନ୍ତ୍ରଣାଳୟ ନଭେମ୍ବର ୮ରେ ଅବସର ନେବାକୁ ଥିବା ଜଷ୍ଟିସ୍ ଲଲିତଙ୍କୁ ନିକଟରେ ନୂଆ ସିଜେଆଇଙ୍କ ନାମ ପ୍ରସ୍ତାବ ମାଗିଥିବାବେଳେ କଲେଜିୟମର ଏଭଳି ଆଭିମୁଖ୍ୟ ଉଚିତ ପରମ୍ପରା ସୃଷ୍ଟି କରିନାହିଁ ବୋଲି ଆଇନ ବିଷାରଦମାନେ ମତ ଦେଇଛନ୍ତି।
