ଯୋଡ଼ା, ୮।୯(ଡି.ଏନ.ଏ.)- କେନ୍ଦୁଝର ଜିଲା ଯୋଡ଼ା ସହରରେ ଟାଟା କମ୍ପାନୀ ପକ୍ଷରୁ ବିଦ୍ୟୁତ୍ କେବୁଲ ସଂଯୋଗ ପାଇଁ ମାଟି ଖୋଳାଯାଉଥିବାବେଳେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ବିଛା ଯାଇଥିବା ପାଣି ପାଇପ୍ ଫାଟି ଯାଇଛି। ଫଳରେ ଗତ ୩ଦିନ ହେବ ସହରବାସୀ ପାନୀୟଜଳ ଯୋଗାଣରୁ ବଞ୍ଚତ୍ତ ହୋଇଛନ୍ତି। ଏଥିପାଇଁ ଲୋକମାନେ ନାହିଁ ନ ଥିବା ହଇରାଣ ମଧ୍ୟ ହେଉଥିବା ଦେଖିବାକୁ ମିଳିଛି। ଅପରପକ୍ଷରେ ଜନସ୍ବାସ୍ଥ୍ୟ ବିଭାଗର ନିର୍ଦ୍ଦେଶ ଅନୁସାରେ ପାଇପ ଫାଟିଥିବା ସ୍ଥାନକୁ ଚିହ୍ନଟ କରାଯାଇଛି। ଖୁବ୍ ଶୀଘ୍ର ଏହାର ମରାମତି କରାଯିବ ବୋଲି ଟାଟା କମ୍ପାନୀ ପକ୍ଷରୁ କୁହାଯାଇଛି।
ମିଳିଥିବା ସୂଚନା ଅନୁସାରେ ଟାଟା କମ୍ପାନୀ ପକ୍ଷରୁ ୩୩କେଭିର ଦୁଇଟି କେବୁଲ ଓ ୧୧ କେଭିର ଦୁଇଟି ବିଦ୍ୟୁତ୍ କେବଲ ସଂଯୋଗ ପାଇଁ ଜେସିବିରେ ମାଟି ଖୋଳାଯାଉଥିବାବେଳେ ସହରର ମଙ୍ଗଳା ମନ୍ଦିର ଛକ ନିକଟରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ମାଟି ତଳେ ବିଛା ଯାଇଥିବା ପାଣି ପାଇପ୍ ଫାଟି ଯାଇଥିଲା। ବିଭିନ୍ନ ସ୍ଥାନରେ ପାଇପ୍ ଫାଟି ଯାଇଥିବାରୁ ଗୁରୁବାରଠାରୁ ସହରରେ ଜଳ ଯୋଗାଣ ଏକ ପ୍ରକାର ଠପ୍ ହୋଇଯାଇଛି। ଏହା ଜଣାପଡ଼ିବା ପରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଯୋଡା ଟାଟାଷ୍ଟିଲ ମୁଖ୍ୟଙ୍କୁ ଲିଖିତ ଭାବେ ଚିଠି ଦିଆଯାଇଛି। କମ୍ପାନୀ ପକ୍ଷରୁ ଫଟା ଯାଇଥିବା ପାଇପ୍ ଓ ଅନ୍ୟାନ୍ୟ ସାମଗ୍ରୀର କ୍ଷତିଭରଣା ଯୋଗାଇ ଦିଆଗଲେ ଖୁବ୍ଶୀଘ୍ର ପାଇପ ସଂଯୋଗୀକରଣ କରାଯାଇ ପାନୀୟ ଜଳ ଯୋଗାଣର ବ୍ୟବସ୍ଥା କରାଯିବ ବୋଲି ଜନସ୍ବାସ୍ଥ୍ୟ ବିଭାଗର ଏସଡିଓ ମନୋଜ କୁମାର ପଣ୍ଡା କହିଛନ୍ତି। ଏଫରି କି ଯୋଡ଼ା ପୌରାଞ୍ଚଳରେ ବିଭିନ୍ନ ଓ୍ବାର୍ଡରେ ଜଳସଙ୍କଟ ଦେଖାଦେବାରୁ ଯୋଡା ପୌରପାଳିକା ପକ୍ଷରୁ ମଧ୍ୟ ଚିଠି ନଂ ୬୯୬୪ /୬।୯।୨୦୧୯ରେ ଏହାର ଶୀଘ୍ର ମରାମତି କରିବା ପାଇଁ ଟାଟା କମ୍ପାନୀର ବିଦ୍ୟୁତ ବିଭାଗୀୟ ଅଧିକାରୀ ଦିନେଶ ପ୍ରସାଦଙ୍କୁ ଚିଠି କରାଯାଇଥିବା ପୌର କାର୍ଯ୍ୟନିର୍ବାହୀ ଅଧିକାରୀ ସୂର୍ଯ୍ୟମଣୀ ପାଟ୍ଟଯୋଶୀ ସୂଚନା ଦେଇଛନ୍ତି। ଏନେଇ ଟାଟା କମ୍ପାନୀର କର୍ପୋରେଟ କମ୍ୟୁନିକେଶନ ଅଧିକାରୀ ଆଶିଷ ଆଚାର୍ଯ୍ୟଙ୍କ ସହ ଯୋଗାଯୋଗ କରିବାରୁ ସମସ୍ତ ସରକାରୀ ଅନୁମୋଦନ ସହିତ ମାଟି ଖୋଳା କାର୍ଯ୍ୟ କମ୍ପାନୀ ପକ୍ଷରୁ କରାଯାଉଥିଲା। ତେବେ ମାଟି ତଳେ ଯାଇଥିବା ପାଇପ ଲାଇନ୍ ଗୁଡିକ ୫୦ରୁ ୬୦ ବର୍ଷ ପୁରୁଣା ହୋଇଥିବାରୁ ମାଟି ଖୋଳିବାବେଳେ ଏହା ଫାଟି ଯାଇଥିଲା। ଶନିବାର ପାଇପ୍ ଫାଟିଥିବା ସ୍ଥାନକୁ ଚିହ୍ନଟ କରାଯାଇ କାର୍ଯ୍ୟ ଆରମ୍ଭ ଟାଟା କମ୍ପାନୀ ପକ୍ଷରୁ କରାଯାଇଛି। ଏଥିପାଇଁ ଆବଶ୍ୟକ ହେଉଥିବା ମରାମତି ସାମଗ୍ରୀ ସ୍ଲେଜ ଓ ଲିଡ୍ ଧାତୁ ଭୁବନେଶ୍ୱରରୁ ଅଣାଯାଇଛି। ରବିବାର ଅପରାହ୍ନ ସୁଦ୍ଧା ଏହି ପାଇପ୍ର ମରାମତି କରାଯାଇ ଜଳ ଯୋଗାଣକୁ ସ୍ବାଭାବିକ କରାଯିବ ବୋଲି ଆଚାର୍ଯ୍ୟ କହିଛନ୍ତି।
