ବିଜ୍ଞାନ ଈଶ୍ୱରଙ୍କୁ ହତ୍ୟାକରେ ନାହିଁ

”୧୯୯୯ ମସିହାରେ ପଦାର୍ଥ ବିଜ୍ଞାନରେ ନୋବେଲ ପୁରସ୍କାର ପାଇଥିବା ମାର୍ଟିନସ ଜେ.ଜି. ଭେଲ୍‌ମ୍ୟାନ୍‌ଙ୍କ ମତରେ ବିଜ୍ଞାନ ଓ ଆଧ୍ୟାତ୍ମିକତା ମଧ୍ୟରେ ସେତୁବନ୍ଧଟିଏ ନିର୍ମାଣ କରିବା ସଂଗତି ଏବଂ ଅସଂଗତି ମଧ୍ୟରେ ତାହା କରିବା ଭଳି ମନେହୋଇପାରେ, କିନ୍ତୁ ବିଜ୍ଞାନକୁ ସମାଜର ସଂଖ୍ୟାଗରିଷ୍ଠ ଜନସାଧାରଣଙ୍କ ନିକଟରେ ପହଞ୍ଚାଇବା ଏବଂ ତା’ଠାରେ ଅତ୍ୟାବଶ୍ୟକ ବୈଜ୍ଞାନିକ ମନୋଭାବର ସଞ୍ଚାର କରିବାର ଏହା ହେଉଛି ଏକ ନିର୍ଭରଯୋଗ୍ୟ ତଥା ସବୁଠାରୁ ସହଜସାଧ୍ୟ ମାର୍ଗ।“

କିଛିବର୍ଷ ତଳେ ଇଂଲଣ୍ଡର କ୍ୟାଥୋଲିକ ଚର୍ଚ୍ଚଗୁଡ଼ିକ ଦ୍ୱାରା ଅନୁଷ୍ଠିତ ସର୍ବେକ୍ଷଣରୁ ଜଣା ପଡ଼ିଥିଲା ଯେ ସାଧାରଣ ଲୋକଙ୍କ ମଧ୍ୟରୁ ୮୭.୬% ଈଶ୍ୱରଙ୍କ ସ୍ଥିତିକୁ ଦୃଢ଼ ଭାବେ ବିଶ୍ୱାସ କଲାବେଳେ ୧୨.୩%ଙ୍କର ଏଥି ସମ୍ପର୍କରେ ନିର୍ଦ୍ଦିଷ୍ଟ ମତାମତ ନାହିଁ କିମ୍ବା ସେମାନେ ଏହାକୁ ନେଇ ବିଶେଷ ଚିନ୍ତା କରନ୍ତି ନାହିଁ ଏବଂ ଅବଶିଷ୍ଟ ଅର୍ଥାତ୍‌ ଅତି ନଗଣ୍ୟ ହୋଇଥିବା ୦.୧% ସେଥିରେ ଆଦୌ ବିଶ୍ୱାସ କରନ୍ତି ନାହିଁ। ତେବେ, କ୍ରମଶଃ ଈଶ୍ୱରବିଶ୍ୱାସୀଙ୍କ ସଂଖ୍ୟା ହ୍ରାସ ପାଉଛି ଏବଂ ଏ ବିଶ୍ୱାସ ପ୍ରତି ନିଷ୍ଠାପରତା କମିବାରେ ଲାଗିଛି ବୋଲି ଏଥିରୁ ଜଣାପଡ଼ିଛି। ଅନ୍ୟପକ୍ଷରେ, ଈଶ୍ୱର ପ୍ରତି ବିଶ୍ୱାସ ନ ଥିବା ତଥା ତାଙ୍କ ସହିତ ସମ୍ପୃକ୍ତ ନ ଥିବା ଲୋକଙ୍କ ସଂଖ୍ୟା ଧୀରେ ଧୀରେ ବଢ଼ିଚାଲିଛି। ଏଥିପାଇଁ ଅନେକେ ବିଜ୍ଞାନକୁ ଦାୟୀକରନ୍ତି। ଏହା ମଣିଷକୁ ଅଧିକ ଯୁକ୍ତିବାଦୀ ଓ ବସ୍ତୁବାଦୀ କରିଦେଉଥିବାରୁ ଏପରି ଘଟୁଛି ବୋଲି ସେମାନଙ୍କ ମତ। କାରଣ ସେଥିଯୋଗୁ ସେ ଈଶ୍ୱରଙ୍କ ସ୍ଥିତିକୁ ମଧ୍ୟ ଯୁକ୍ତି ମାଧ୍ୟମରେ ତଉଲୁଛି ଏବଂ ସେଥିରେ ସଫଳ ନ ହେବା ଫଳରେ ତାଙ୍କ ପ୍ରତି ତା’ର ବିଶ୍ୱାସ ହ୍ରାସ ପାଉଛି। ଏଣୁ ବିଜ୍ଞାନର ପ୍ରଗତି ଆଧ୍ୟାତ୍ମିକତା ତଥା ଈଶ୍ୱର ବିଶ୍ୱାସର ବିଲୟ ଘଟାଇ ଚାଲିଛି ବୋଲି କୁହାଯାଉଛି।
ଅନ୍ୟପକ୍ଷରେ,୧୯୯୯ମସିହାରେ ପଦାର୍ଥ ବିଜ୍ଞାନରେ ନୋବେଲ ପୁରସ୍କାର ପାଇଥିବା ମାର୍ଟିନସ ଜେ.ଜି. ଭେଲ୍‌ମ୍ୟାନ୍‌ଙ୍କ ମତରେ ବିଜ୍ଞାନ ଓ ଆଧ୍ୟାତ୍ମିକତା ମଧ୍ୟରେ ସେତୁବନ୍ଧଟିଏ ନିର୍ମାଣ କରିବା ସଂଗତି ଏବଂ ଅସଂଗତି ମଧ୍ୟରେ ତାହା କରିବା ଭଳି ମନେହୋଇପାରେ। କିନ୍ତୁ ବିଜ୍ଞାନକୁ ସମାଜର ସଂଖ୍ୟାଗରିଷ୍ଠ ଜନସାଧାରଣଙ୍କ ନିକଟରେ ପହଞ୍ଚାଇବା ଏବଂ ତା’ଠାରେ ଅତ୍ୟାବଶ୍ୟକ ବୈଜ୍ଞାନିକ ମନୋଭାବର ସଞ୍ଚାର କରିବାର ଏହା ହେଉଛି ଏକ ନିର୍ଭରଯୋଗ୍ୟ ତଥା ସବୁଠାରୁ ସହଜସାଧ୍ୟ ମାର୍ଗ। ନିକଟରେ ମର୍ଯ୍ୟାଦାସମ୍ପନ୍ନ ଆନ୍ତର୍ଜାତିକ ଟେମ୍ପଲଟନ ପୁରସ୍କାର ତା’ର ଆଭିମୁଖ୍ୟକୁ ମୁଖ୍ୟତଃ ଏହି ଦିଗାଭିମୁଖୀ କରିଛି।
ଏହି ପୁରସ୍କାରଟି ଆମେରିକାର ଜନ୍‌ ଟେମ୍ପଲଟନଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା ୧୯୭୨ ମସିହାରେ। ତେବେ ୧୯୮୭ ମସିହାରେ ଜନ୍‌ ଟେମ୍ପଲଟନ ଫାଉଣ୍ଡେଶନ ଗଠନ କରାଯାଇ ତାକୁ ଏ ଦାୟିତ୍ୱ ସମର୍ପଣ କରାଯାଇଛି। ପ୍ରଥମେ ଏହାର ଆଭିମୁଖ୍ୟ ଥିଲା ଆଧ୍ୟାତ୍ମିକ ପରିସରକୁ ପ୍ରତିଷ୍ଠିତ କରିବା ଲାଗି ଅସାଧାରଣ ଯୋଗଦାନ ଦେଇଥିବା ବ୍ୟକ୍ତିଙ୍କୁ ସମ୍ମାନିତ କରିବା। ତେଣୁ ପ୍ରାଥମିକ ଅବସ୍ଥାରେ ଏଥିପାଇଁ ବିଚାରକୁ ନିଆଯାଉଥିଲା ଧର୍ମ କ୍ଷେତ୍ରରେ କାର୍ଯ୍ୟ କରୁଥିବା ବ୍ୟକ୍ତିବିଶେଷଙ୍କୁ। ଅତଏବ ଏହାର ପ୍ରଥମ ପ୍ରାପ୍ତକ ଥିଲେ ମଦର ଟେରେସା ଏବଂ ତାଙ୍କ ପରେ ଆର୍କ ବିଶପ ଦେଶମଣ୍ଡ ଟୁଟୁ, ଦଲାଇଲାମା, ସର୍ବପଲ୍ଲୀ ରାଧାକ୍ରିଷ୍ଣନ୍‌ଙ୍କ ଭଳି ଲୋକେ। କିନ୍ତୁ ପରବର୍ତ୍ତୀ ଅବସ୍ଥାରେ ଏହାର ପରିସର ବିସ୍ତାରିତ କରାଗଲା। ଫଳରେ ଫ୍ରିମ୍ୟାନ୍‌ ଡଏସନ (୧୯୯୪), ମାର୍ଟିନ ରିସ (୨୦୧୧)ଙ୍କ ଭଳି ବହୁ ପ୍ରଖ୍ୟାତ ବୈଜ୍ଞାନିକ ଏହା ଲାଭ କରିବାର ଗୌରବ ଅର୍ଜନ କଲେ। ଚଳିତବର୍ଷ (୨୦୧୯)ରେ ଏହି ୧.୪ ନିୟୁତ ଡଲାର ପୁରସ୍କାର ପାଇଁ ମନୋନୀତ ହୋଇଛନ୍ତି ଆମେରିକାର ନିଉହାମ୍ପସାୟାରସ୍ଥିତ ଡାର୍ଟମାଉଥ ମହାବିଦ୍ୟାଳୟର ପଦାର୍ଥ ବିଜ୍ଞାନ ଏବଂ ଜ୍ୟୋତିର୍ବିଜ୍ଞାନ ପ୍ରଫେସର ମାର୍ଶେଲୋ ଗ୍ଲେଇଷ୍ଟର। ସେ ମଧ୍ୟ ଏକକାଳୀନ ଭାବେ ପ୍ରାକୃତିକ ଦର୍ଶନ ବିଭାଗର ଆପଲଟନ ପ୍ରଫେସର ରୂପେ କାର୍ଯ୍ୟନିର୍ବାହ କରୁଛନ୍ତି।
ଗ୍ଲେଇଷ୍ଟର ଜଣେ ତାତ୍ତ୍ୱିକ ପଦାର୍ଥ ବିଜ୍ଞାନୀ। ତାଙ୍କ ଅଧ୍ୟୟନ ଓ ଗବେଷଣାର ପରିସର ଖୁବ୍‌ ପ୍ରଶସ୍ତ। ତାହା ଆଦ୍ୟ ବିଶ୍ୱବ୍ରହ୍ମାଣ୍ଡର ପଦାର୍ଥ ବିଜ୍ଞାନଠାରୁ ଆରମ୍ଭକରି ନଭୋ-ଜୀବବିଜ୍ଞାନ, କଣିକା ପଦାର୍ଥ ବିଜ୍ଞାନ ଏବଂ ବିଶ୍ୱତତ୍ତ୍ୱ ପର୍ଯ୍ୟନ୍ତ ପରିବ୍ୟାପ୍ତ। ସେ ମଧ୍ୟ ଜଣେ ଉତ୍ତମ ଜନପ୍ରିୟ ବିଜ୍ଞାନ ଲେଖକ। ତାଙ୍କ ଲେଖାଗୁଡ଼ିକର ବିସ୍ତୃତ ପରିସର ମଧ୍ୟରେ ଥାଏ ବିଜ୍ଞାନ, ସଂସ୍କୃତି, ଦର୍ଶନ ଏବଂ ଆଧ୍ୟାତ୍ମିକତାର ଅନନ୍ୟ ସମନ୍ବୟ।
ବ୍ରାଜିଲର ରିଓ ଡି’ଜେନିରୋଠାରେ ୧୯୫୯ମାର୍ଚ୍ଚ ୧୯ ତାରିଖରେ ଜନ୍ମଲାଭ କରିଥିବା ଏହି ବୈଜ୍ଞାନିକଙ୍କ ପିତା ଆଇଜାକ ଥିଲେ ଜଣେ ଶିକ୍ଷାବିତ୍‌ ଏବଂ ମାତା ହାଲୁଜା ଜଣେ ଗୃହିଣୀ। ସେ ୧୯୮୧ ମସିହାରେ ସ୍ଥାନୀୟ ପୋଣ୍ଟିଫିକାଲ କ୍ୟାଥୋଲିକ ବିଶ୍ୱବିଦ୍ୟାଳୟରୁ ସ୍ନାତକ, ୧୯୮୨ ମସିହାରେ ସେଠାର ଫେଡେରାଲ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର ଏବଂ ୧୯୮୬ ମସିହାରେ ଲଣ୍ଡନର ସୁପ୍ରସିଦ୍ଧ କିଂଗ୍ସ କଲେଜର ପି.ଏଚ୍‌ଡି. ଉପାଧି ଲାଭ କରିଥିଲେ। ତତ୍ପରେ ସେ ୧୯୮୮ ମସିହା ଯାଏ ଫର୍ମିଂ ବିଜ୍ଞାନାଗାରରେ ଏବଂ ୧୯୯୧ ମସିହା ପର୍ଯ୍ୟନ୍ତ କାଭ୍‌ଲି ଇନ୍‌ଷ୍ଟିଚ୍ୟୁଟ୍‌ ଅଫ୍‌ ଥିଓରିଟିକାଲ ଫିଜିକ୍ସରେ ଗବେଷଣା କରିବାକୁ ଲାଗିଲେ। ବର୍ତ୍ତମାନ ତାଙ୍କର କର୍ମସ୍ଥଳୀ ହେଉଛି ଡାର୍ଟମାଉଥ କଲେଜ। ପଦାର୍ଥ ବିଜ୍ଞାନକୁ ତାଙ୍କର ଅବଦାନ ପାଇଁ ଗ୍ଲେଇଷ୍ଟର ଲାଭ କରିଛନ୍ତି ବହୁ ପୁରସ୍କାର ଓ ସମ୍ମାନ। ଆମେରିକାନ ଫିଜିକାଲ ସୋସାଇଟିର ସେ ହେଉଛନ୍ତି ଜଣେ ପ୍ରାକ୍ତନ ସଦସ୍ୟ ଏବଂ ବର୍ତ୍ତମାନର ଫେଲୋ। ଅନ୍ୟପକ୍ଷରେ, ବ୍ରାଜିଲର ଏକାଡେମୀ ଅଫ୍‌ ଫିଲୋଶଫି ମଧ୍ୟ ତାଙ୍କୁ ସଦସ୍ୟତା ପ୍ରଦାନ କରିଛି। ସେ ଲାଭ କରିଥିବା ପୁରସ୍କାରଗୁଡ଼ିକ ମଧ୍ୟରେ ରହିଛି ଆମେରିକାର ନ୍ୟାଶନାଲ ସାଇନ୍ସ ଫାଉଣ୍ଡେଶନ ଏବଂ ହ୍ବାଇଟ ହାଉସ ଦ୍ୱାରା ପ୍ରଦତ୍ତ ପ୍ରେସିଡେନ୍‌ସିଆଲ ଫାକଲ୍‌ଟି ଫେଲୋ ପୁରସ୍କାର। ବ୍ରାଜିଲିଆନ ସାଇନ୍ସ ରିସର୍ଚ୍ଚ କାଉନସିଲ ଦ୍ୱାରା ପ୍ରଦତ୍ତ ଜୋସ୍‌ ରେଇସ ଆଓ୍ବାର୍ଡ ଫର୍‌ ଦ ପବ୍ଲିକ ଅଣ୍ଡରଷ୍ଟାଣ୍ଡିଂ ଅଫ୍‌ ସାଇନ୍ସ ଏବଂ ବ୍ରାଜିଲିଆନ ଡାଇୟା ସ୍ପୋରା ପ୍ରାଇଜ।
ଗବେଷଣା ଓ ଜନପ୍ରିୟ ବିଜ୍ଞାନ ଲେଖା ଲେଖିବା ବ୍ୟତୀତ ଗ୍ଲେଇଷ୍ଟର ମଧ୍ୟ ଅନେକ ଟେଲିଭିଜନ ଓ ରେଡିଓ କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି। ତହିଁରୁ ପ୍ରମୁଖଗୁଡ଼ିକ ଭିତରେ ରହିଛି ଷ୍ଟିଫେନ ହକିଂଙ୍କ ବିଶ୍ୱବ୍ରହ୍ମାଣ୍ଡ ବିୟଣ୍ଡ ଦ ବିଗ୍‌ବ୍ୟାଙ୍ଗ, ହାଓ ଲାଇଫ ବିଗାନ୍‌, ଫ୍ରେସ୍‌ ଏୟାର, ରେଡିଓଲାବ୍‌ ଇତ୍ୟାଦି। ଏସବୁ ସମଗ୍ର ବିଶ୍ୱର ୧୨୦ଟି ଦେଶରେ ବେଶ୍‌ ଜନାଦୃତ ହୋଇଛି। ବର୍ତ୍ତମାନ ସେ ଟେମ୍ପଲଟନ ପୁରସ୍କାର-୨୦୧୯ ଲାଭ କରିଛନ୍ତି। ବିଜ୍ଞାନ ଈଶ୍ୱରଙ୍କୁ ହତ୍ୟାକରେ ନାହିଁ ବୋଲି ଏକ ବିଜ୍ଞାନ ଓ ଦର୍ଶନ ସମ୍ମିଳିତ ପୃଷ୍ଠଭୂମି ଉପରେ ଆଧାରିତ କାର୍ଯ୍ୟକ୍ରମର ପ୍ରସାର ଲାଗି। ଏଥିରେ ସେ ଦୃଢ଼ ଭାବେ ସାବ୍ୟସ୍ତ କରିଛନ୍ତି ଯେ ବୈଜ୍ଞାନିକ ମାନସିକତା ଏବଂ ଆଧ୍ୟାତ୍ମିକତା ଯେ କେବଳ ଏକତ୍ର ତିଷ୍ଠିପାରିବେ ତା’ ନୁହେଁ ବରଂ ପରସ୍ପରକୁ ଋଦ୍ଧିମନ୍ତ ମଧ୍ୟ କରିପାରିବେ। ଏହାକୁ ସେ ଯୁକ୍ତିସିଦ୍ଧ ଭାବେ ଉପସ୍ଥାପିତ କରିଛନ୍ତି ବିବିଧ ବୈଜ୍ଞାନିକ ତଥ୍ୟର ଅବତାରଣା କରି।

ପ୍ର. ରମେଶ ଚନ୍ଦ୍ର ପରିଡ଼ା
-ଉଷା ନିବାସ, ଖଣ୍ଡଗିରି ବିହାର, ଭୁବନେଶ୍ୱର
ମୋ: ୯୯୩୭୯୮୫୭୬୭


Enter your email to get our daily news in your inbox.

All Right Reserved By Dharitri.Com

ଜିଲାପାଳଙ୍କ ଜନ ଅଭିଯୋଗ ଶୁଣାଣି: ମାତ୍ର ୯୦ଟି ଅଭିଯୋଗରେ ସୀମିତ, ପ୍ରଚାର ଅଭାବ ନା ସମାଧାନ ଉପରୁ ତୁଟିଲାଣି ଭରସା

ଥୁଆମୂଳ ରାମପୁର, ୧୬।୧୧ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲାର ଅତି ଦୁର୍ଗମ ତଥା ଆଦିବାସୀ ବହୁଳ ଥୁଆମୂଳ ରାମପୁର ବ୍ଲକ ବୈଠକ ସଭା ଗୃହ ଠାରେ ସୋମବାର…

ଅମିତାଭ, ଅଭିଷେକ ବଚ୍ଚନଙ୍କୁ ହତ୍ୟା ଧମକ, ଦିଆଗଲା ଏଭଳି ଚେତାବନୀ

ମୁମ୍ବାଇ,୧୬ା୧୧: ଗ୍ୟାଙ୍ଗଷ୍ଟର ଗୋଲ୍ଡି ଧିଲୋନ୍‌ଙ୍କଠାରୁ ମେଗାଷ୍ଟାର ଅମିତାଭ ବଚ୍ଚନ ଏବଂ ଅଭିଷେକ ବଚ୍ଚନଙ୍କୁ ହତ୍ୟା ଧମକ ମିଳିଛି। ନିକଟରେ ଦିଲ୍ଲୀ ପୋଲିସ ଗୋଲ୍ଡି ଗ୍ୟାଙ୍ଗ୍‌ର ୨ ସଦସ୍ୟ…

ଶିକ୍ଷକ ନିଯୁକ୍ତି ଦାବି: ସମାଧାନ ନ ହେଲେ ସ୍କୁଲରେ ତାଲା ପକାଇବାକୁ ଗ୍ରାମବାସୀଙ୍କ ଚେତାବନୀ

ଗୁଡାରି, ୧୬।୧୧ (ପ୍ରମୋଦ କୁମାର ପତି): ଗୋଟିଏ ଶିକ୍ଷୟିତ୍ରୀଙ୍କ ଭରସାରେ ଚାଲିଛି ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠପଢ଼ା। ବିଦ୍ୟାଳୟରେ ଆବଶ୍ୟକ ଶିକ୍ଷକ ନଥିବାରୁ ପିଲାଙ୍କ ପାଠପଢ଼ା…

ସଂସଦ ଭବନରେ ଗୁଞ୍ଜିଲା କଳାହାଣ୍ଡିର ଢାପ ନୃତ୍ୟ: କଳାକାରଙ୍କଠୁ ରାମକାଠି ନେଇ ବଜାଇଲେ ମୋଦି

ଭବାନୀପାଟଣା,୧୬।୧୧(ଉତ୍ତମ କୁମାର ଦାଶ): ଦିଲ୍ଲୀ ସଂସଦ ଭବନରେ ଜାତୀୟ ମଞ୍ଚରେ ଝଲସିଲା କଳାହାଣ୍ଡିର ପାରମ୍ପରିକ ଢାପ ନୃତ୍ୟ। ଜନଜାତୀୟ ଗୌରବ ଦିବସ ଅବସରରେ ଭବାନୀପାଟଣାର ପ୍ରତିଭା ଅନୁଷ୍ଠାନର…

ଯେଉଁଠି ପ୍ରଥମେ ଭେଟିଥିଲେ ସୋନିଆ-ରାଜୀବ, ସେହି ରେଷ୍ଟୁରାଣ୍ଟକୁ ଗର୍ଲଫ୍ରେଣ୍ଡଙ୍କ ସହ ଯାଇଥିଲେ ରାହୁଲ! ନିଜେ କଲେ ଖୁଲାସା

ନୂଆଦିଲ୍ଲୀ,୧୬।୧୧: କଂଗ୍ରେସ ସାଂସଦ ରାହୁଲ ଗାନ୍ଧୀ ତାଙ୍କ ମାଆ ସୋନିଆ ଗାନ୍ଧୀଙ୍କ ପୁସ୍ତକ ‘ବିଲଙ୍ଗିଂ: ଏ ଜର୍ଣ୍ଣି ଅଫ ଲଭ’ର ଉନ୍ମୋଚନ ଅବସରରେ ପରିବାର ସହ ଜଡ଼ିତ…

IPL ନିଲାମୀ ପୂର୍ବରୁ ବଡ଼ ଟ୍ରେଡ୍‌: ବଦଳିବ ଶାମିଙ୍କ ଠିକଣା, ଲକ୍ଷ୍ନୌ ଛାଡ଼ି ଏହି ଦଳକୁ ଯିବେ!

ନୂଆଦିଲ୍ଲୀ,୧୬।୧୧: IPL ନିଲାମୀ ପୂର୍ବରୁ ଖେଳାଳିଙ୍କ ଅଦଳବଦଳ ପ୍ରକ୍ରିୟା ଜୋର୍‌ ଧରିବାରେ ଲାଗିଛି। ଏହି କ୍ରମରେ ଭାରତୀୟ ଦ୍ରୁତ ବୋଲର ମହମ୍ମଦ ଶାମିଙ୍କୁ ନେଇ ଏକ ବଡ଼…

ଥାନାରେ ପଶି ପୋଲିସ ଅଧିକାରୀଙ୍କୁ ହତ୍ୟା ଉଦ୍ୟମ: ଗିରଫ ହୋଇ ଜେଲ ଗଲେ ଅଭିଯୁକ୍ତ

ଦିଗପହଣ୍ଡି,୧୬।୧୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନାରେ ପଶି ଏସ୍‌ଆଇ ରାଜ କିଶୋର ପାତ୍ର ଏବଂ ହୋମଗାର୍ଡ ଲକ୍ଷ୍ମୀକାନ୍ତ ମହାପାତ୍ରଙ୍କୁ ହତ୍ୟା ଉଦ୍ୟମ ଘଟଣାରେ ସମ୍ପୃକ୍ତ…

ସେହୱାଗଙ୍କ ପୁଅ ଆର୍ଯ୍ୟବୀରଙ୍କୁ ଲାଗିଲା ବଡ଼ ଝଟ୍‌କା: ଭଲ ପ୍ରଦର୍ଶନ ସତ୍ତ୍ୱେ ଖେଳିପାରିବେନି ଅଣ୍ଡର-୧୯ ବିଶ୍ୱକପ, ଜାଣନ୍ତୁ କାରଣ…

ନୂଆଦିଲ୍ଲୀ,୧୬।୧୧: ଭାରତର ପୂର୍ବତନ ବିସ୍ଫୋରକ ଓପନର ବ୍ୟାଟର ବୀରେନ୍ଦ୍ର ସେହୱାଗଙ୍କ ପୁଅ ଆର୍ଯ୍ୟବୀର ସେହୱାଗ ନିକଟରେ ଅଣ୍ଡର-୧୯ ଏସିଆ କପରେ ନିଜର ଦମଦାର ପ୍ରଦର୍ଶନ ବଳରେ ସମସ୍ତଙ୍କ…

Advertisement

ଧରିତ୍ରୀ କାର୍ଟୁନ

Archives

 

Dharitri-Rashifala


ଛୁଟିଦିନ
ପିଲାଙ୍କ ଧରିତ୍ରୀ
Trending
Let's Pledge For A 'Plastic Free' Odisha Join The Movement Of 'Plastic Free' Odisha

Akash Das Nayak, supports a Plastic Free Odisha. Do you?