କଣିହାଁ, ୧୯।୮(ଡି.ଏନ.ଏ.) କଣିହାଁ ବ୍ଲକ କାକୁଡିଆ ପଞ୍ଚାୟତ ବାଲିପଟ୍ଟା ଗ୍ରାମର ୨ ସାହିରେ କୋଇଲା ଖଣି ପ୍ରକଳ୍ପ ପାଇଁ ଏନ୍ଟିପିସି ପକ୍ଷରୁ ଜମି ଅଧିଗ୍ରହଣ ନିମନ୍ତେ ବିଜ୍ଞପ୍ତି ପ୍ରକାଶ ପାଇଛି। ଏହାକୁ ଗ୍ରାମବାସୀ ବିରୋଧ କରିବା ସହ ଉପଯୁକ୍ତ କ୍ଷତିପୂରଣ, ନିଯୁକ୍ତି, ଥଇଥାନ ନ ମିଳିଲେ ଖଣି ପାଇଁ ଆଦୌ ଜଗା ଛଡାଯିବନି ବୋଲି ନିଷ୍ପତ୍ତି ନିଆଯାଇଛି। ଏହାକୁ ନେଇ ରବିବାର ଗ୍ରାମର ଭଣେଶ୍ୱରୀ ପୀଠରେ ଏକ ବୈଠକ ବସିଥିଲା। ଏଥିରେ ଗ୍ରାମର ଉପର ସାହି ଓ ତଳ ସାହିର ସଭାପତି ଯୋଗଦେଇ କହିଥିଲେ, ଗ୍ରାମର ଜାଗାକୁ ମନ୍ଦାକିନୀ (ଖ) କୋଇଲା ଖଣି ପ୍ରକଳ୍ପ ଏନ୍ଟିପିସି ଲିମିଟେଡ ଅଧିଗ୍ରହଣ କରିବାକୁ ୨୦୧୬ ଏପ୍ରିଲରେ ନୋଟିସ ପ୍ରକାଶ କରିଥିଲା। ଏହି ଜମି ଅଧିଗ୍ରହଣ ହେଲେ କଲ୍ୟାଣପୁର ମୌଜା ସହିତ ବାଲିପଟା ଗ୍ରାମର ଉପର ସାହି ଓ ତଳସାହିର ୨ ଶହରୁ ଊର୍ଦ୍ଧ୍ୱ ପରିବାର ଜମିବାଡି, ଜଙ୍ଗଲ ଓ ବାସଗୃହ ହରାଇବେ ବୋଲି ଜଣାପଡିବା ପରେ ଗ୍ରାମବାସୀଙ୍କ ୧୨ ଦଫା ଦାବି ସମ୍ପର୍କରେ ପ୍ରଶାସନ ଓ ପ୍ରକଳ୍ପର ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିଲେ। ଏ ପର୍ଯ୍ୟନ୍ତ ପ୍ରଶାସନ ତରଫରୁ କୌଣସି ଉତ୍ତର ମିଳି ନ ଥିବାବେଳେ ୨୦୧୯ ଅଗଷ୍ଟ ୧୦ରେ ଗ୍ରାମ ସଭାପତିଙ୍କୁ କୋଇଲା ଖଣି ପ୍ରକଳ୍ପ, ଏନ୍ଟିପିସି ତରଫରୁ ନୋଟିସ ଜାରି କରାଯାଇଛି। ହେଲେ ଦାବି ପୂରଣ ନ ହେବା ପର୍ଯ୍ୟନ୍ତ କମ୍ପାନୀକୁ ଗ୍ରାମରେ ପୂରାଇ ଦିଆଯିବ ନାହିଁ ବୋଲି ୨ ସାହି ସଭାପତି ସୁଶାନ୍ତ ପ୍ରଧାନ, ବାବୁଲି ସାହୁ, କମିଟି ସଦସ୍ୟ ଦୁର୍ଯ୍ୟୋଧନ ଜେନା, ଦେବରାଜ ରାଉଳ ପ୍ରମୁଖ ପ୍ରକାଶ କରିଛନ୍ତି।
