ପୁରୁଷୋତ୍ତମପୁର,୫ା୧୦(ଡି.ଏନ.ଏ.)-ପୁରୁଷୋତ୍ତମପୁର ଥାନା ଅରଖପୁର ଛକ ନିକଟରେ ପୁଣି ଦୁର୍ବୃତ୍ତମାନେ ଲୁଟିଥିବା ଅଭିଯୋଗ ହୋଇଛି। ଗ୍ରାହକ ସେବାକେନ୍ଦ୍ର ପରିଚାଳକ ସୁଦାମ ଗୌଡଙ୍କ ମୁଣ୍ଡରେ ବନ୍ଧୁକ ଲଗାଇବା ସହ ଛୁରି ଦେଖାଇ ହତ୍ୟା ଧମକ ଦେଇ ଗୁରୁବାର ୧ ଲକ୍ଷ ୨୨ ହଜାର ଟଙ୍କା, ମୋବାଇଲ ଓ ରେକର୍ଡପତ୍ର ଦୁର୍ବୃତ୍ତ ଲୁଟି ନେଇଛନ୍ତି। ସୁଦାମଙ୍କ ଏତଲା କ୍ରମେ ପୋଲିସ ନଂ. ୨୩୦/୧୯ରେ ମାମଲା ରୁଜୁ କରି ତଦନ୍ତ ଚଲାଇଛି। ମାତ୍ର ଲୁଟେରାଙ୍କ ପତ୍ତା ପାଇପାରିନାହିଁ। ଶିକୁଳା ଗ୍ରାମର ସୁଦାମ ଅରଖପୁର ଗ୍ରାମରେ ଗ୍ରାହକ ସେବା କେନ୍ଦ୍ର ମିନିବ୍ୟାଙ୍କ କରିଥିଲେ। ଗୁରୁବାର ସକାଳେ ସେ ନିଜ ଗ୍ରାମରୁ ଟଙ୍କା ଓ ରେକର୍ଡ ପତ୍ର ଧରି ବାଇକ୍ ଯୋଗେ ଯିବା ବେଳେ ୩ ଜଣ ଦୁର୍ବୃତ୍ତ ହଠାତ୍ ଆସି ତାଙ୍କୁ ଅଟକାଇଥିଲେ। ପରେ ମୁଣ୍ଡରେ ବନ୍ଧୁକ ଲଗାଇ ଛୁରି ଦେଖାଇ ଟଙ୍କା, ମୋବାଇଲ, ରେକର୍ଡ ଲୁଟି ନେଇଛନ୍ତି। ସୂଚନାଯୋଗ୍ୟ, ଗତ କିଛି ଦିନ ତଳେ ଅରଖପୁର ପଞ୍ଚାୟତର ନିର୍ବାହୀ ଅଧିକାରୀ ଭତ୍ତା ଟଙ୍କା ବାଣ୍ଟିବା ଲାଗି ଯିବା ବେଳେ ତାଙ୍କ ଠାରୁ ମଧ୍ୟ ଟଙ୍କା, ବାଇକ୍, ରେକର୍ଡ ପତ୍ର ଲୁଟି ନେଇଥିଲେ।
