ଉପେନ୍ଦ୍ର ରାଉତ
ବଅଁରପାଳ, ୧୭।୫
ଅକ୍ଷୟ ତୃତୀୟାଠାରୁ ଆରମ୍ଭ ହୋଇଛି ଖରିଫ ଚାଷକାର୍ଯ୍ୟ। ମୁଖ୍ୟତଃ ଉଚ୍ଚ ତଥା ଜଳସେଚନ ସୁବିଧା ନ ଥିବା ଜମିରେ ଚାଷୀମାନେ ଧାନ ବୁଣା ଚଳାଇଛନ୍ତି। ଆଗାମୀ ମାସରେ ମୌସୁମୀ ବର୍ଷା ଆସିବା ପରେ ଚାଷ କାର୍ଯ୍ୟ ଜୋର ଧରିବ। ଏହାକୁ ନଜରରେ ରଖି କୃଷି ବିଭାଗ ପକ୍ଷରୁ ମଧ୍ୟ ପ୍ରକ୍ରିୟା ଆରମ୍ଭ ହୋଇଯାଇଛି। ଚଳିତବର୍ଷ ଅନୁଗୋଳ କୃଷି ଜିଲା ଅନ୍ତର୍ଗତ ବଅଁରପାଳ ବ୍ଲକର ମୋଟ୍ ୨୪ ହଜାର ୮୧୦ ହେକ୍ଟର ଜମିରେ ଖରିଫ ଫସଲ ପାଇଁ ସରକାରୀସ୍ତରରେ ଲକ୍ଷ୍ୟ ଧାର୍ଯ୍ୟ କରାଯାଇଛି।
ଲକ୍ଷ୍ୟ ଧାର୍ଯ୍ୟ କରାଯାଇଥିବା ମୋଟ୍ ୨୪ ହଜାର ୮୧୦ ହେକ୍ଟର ଜମି ମଧ୍ୟରୁ ୧୦ ହଜାର ୯୪୫ ହେକ୍ଟରରେ କେବଳ ଧାନ ଚାଷ କରାଯିବ। ସେଥିରୁ ୧୦ ହଜାର ୫୮୫ ହେକ୍ଟରରେ ଅଧିକ ଅମଳକ୍ଷମ ଧାନ ଓ ୩୬୦ ହେକ୍ଟରରେ ଦେଶୀ ଧାନ ଫସଲ କରାଯିବାକୁ ସ୍ଥିର କରାଯାଇଛି। ସେହିପରି ମୋଟ୍ ୫,୩୪୬ ହେକ୍ଟର ଜମିରେ ଡାଲି ଜାତୀୟ ଫସଲ ହେବ। ସେଥିରୁ ୫୬୫ ହେକ୍ଟରରେ ମକା, ୧,୯୦୫ ହେକ୍ଟରରେ ମୁଗ, ୧,୮୧୧ ହେକ୍ଟରରେ ବିରି, ୧,୪୧୦ ହେକ୍ଟର ଜମିରେ ହରଡ଼ ଓ ୨ ଶହ ହେକ୍ଟରରେ ଅନ୍ୟାନ୍ୟ ଡାଲି ଜାତୀୟ ଚାଷ କରାଯିବ। ୨,୬୧୫ ହେକ୍ଟର ଜମିରେ ତୈଳବୀଜ ଜାତୀୟ ଫସଲ କରାଯିବ। ସେଥିରୁ ୧,୬୬୦ ହେକ୍ଟର ଜମିରେ ଚିନାବାଦାମ, ୯୫୪ ହେକ୍ଟର ଜମିରେ ରାଶି କରାଯିବ। ସେହିପରି ୮୩୮ ହେକ୍ଟର ଜମିରେ ହେବାକୁ ଥିବା ମସଲା ଜାତୀୟ ଫସଲ ମଧ୍ୟରୁ ୫୬୦ ହେକ୍ଟରରେ ଲଙ୍କା, ୧୫୦ ହେକ୍ଟର ଜମିରେ ହଳଦୀ, ୧୨୮ ହେକ୍ଟରରେ ଅଦା ଚାଷ କରାଯିବା ପାଇଁ ଲକ୍ଷ୍ୟ ରଖାଯାଇଛି। ଏଥିସହ ୪,୫୦୦ ହେକ୍ଟର ଜମିରେ ପରିବା ଚାଷ କରାଯିବ। ତେବେ ଚାଷ କାର୍ଯ୍ୟ ହେବାକୁ ଥିବା ମୋଟ୍ ୨୪,୮୧୦ ହେକ୍ଟର ଜମି ମଧ୍ୟରୁ ୮,୨୮୯ ହେକ୍ଟର ଜମି ପାଇଁ ଜଳସେଚନର ସୁବିଧା ରହିଛି। ଡେରଜାଙ୍ଗ ମଧ୍ୟମ ଜଳସେଚନ ପ୍ରକଳ୍ପରୁ ୪,୪୨୦ ହେକ୍ଟରକୁ ଜଳସେଚନ କରାଯାଉଥିବା ବେଳେ କୁଇଓ କ୍ଷୁଦ୍ର ଜଳସେଚନରୁ ୧୬୨ ହେକ୍ଟର, ଉଠା ଜଳସେଚନରୁ ୧,୬୧୪ ହେକ୍ଟର, ସେଚକୂପରୁ ୯୯୦ ହେକ୍ଟର ଓ ଅନ୍ୟାନ୍ୟ ଉତ୍ସରୁ ୮୧୦ ହେକ୍ଟର ଜମିକୁ ଜଳ ଯୋଗାଇ ଦିଆଯିବାର ବ୍ୟବସ୍ଥା ରହିଛି। ବାକି ୧୬,୫୨୧ ହେକ୍ଟର ଜମି ବର୍ଷା ଜଳ ଉପରେ ସମ୍ପୂର୍ଣ୍ଣ ନିର୍ଭରଶୀଳ। ତେବେ ଧାନ ବୁଣା ଆରମ୍ଭ ହୋଇଯାଇଥିଲେ ବି ଏଯାଏ ବ୍ଲକ ଅଞ୍ଚଳରେ ଥିବା ଅନେକ ଚାଷ ଜମିକୁ ଜଳସେଚନ ପାଇଁ ପାଣି ଯାଇପାରିନାହିଁ। କେତେକ ଅଞ୍ଚଳରେ କେନାଲ ଶୁଖିଲା ପଡ଼ିଥିବାବେଳେ ବହୁ ସ୍ଥାନରେ ଉଠା ଜଳସେଚନ ପଏଣ୍ଟ ଗୁଡ଼ିକ ଅଚଳ ଅବସ୍ଥାରେ ପଡ଼ିଛି।
ଏ ସମ୍ପର୍କରେ ବ୍ଲକ ସହକାରୀ କୃଷି ଅଧିକାରୀ ସୁମନ୍ତ ନାୟକ କୁହନ୍ତି, ଚଳିତ ବର୍ଷ ୨୪,୮୧୦ ହେକ୍ଟର ଜମିରେ ଖରିଫ ଫସଲ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ୧୩ଟି କୃଷି ସମବାୟ ସମିତି ଜରିଆରେ ଚାଷୀମାନଙ୍କୁ ବିହନ ଯୋଗାଇ ଦିଆଯିବ। ୮,୨୮୯ ହେକ୍ଟର ଜମି ପାଇଁ ଜଳସେଚନର ବ୍ୟବସ୍ଥା ରହିଛି।
