ଓ୍ବାୟାନାଡ୍,୧୮ା୪(ପି.ଟି.): କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ନିଜ ନିର୍ବାଚନ ମଣ୍ଡଳୀର କେରଳର ଓ୍ବାୟାନାଡ୍ ଯାଇ ବୁଧବାର ତିନୋଟି ନିର୍ବାଚନୀ ସଭାରେ ଉଦ୍ବୋଧନ ଦେଇଥିଲେ। ଏହି ଅବସରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତୀବ୍ର ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ ଯାହା କହୁଛନ୍ତି ସବୁ ମିଛ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ ଗରିବଙ୍କ ପାଇଁ ଉଦ୍ଦିଷ୍ଟ ଅର୍ଥକୁ ଚୋରି କରିଛନ୍ତି। ପୁଲ୍ଓ୍ବାମା ଆକ୍ରମଣ ଦିନ ମୋଦି ତାଙ୍କ ବନ୍ଧୁ ଆଦାନିଙ୍କୁ ୬ଟି ବିମାନ ବନ୍ଦର ଦେଇଛନ୍ତି। ବିମୁଦ୍ରୀକରଣକୁ ପ୍ରଧାନମନ୍ତ୍ରୀ କଳାଧନ ବିରୋଧରେ ଲଢ଼େଇ ବୋଲି କହୁଛନ୍ତି। ପ୍ରକୃତରେ ବିମୁଦ୍ରୀକରଣ ଯୋଗୁ ଭାରତର ଅର୍ଥନୀତି ବିପର୍ଯ୍ୟସ୍ତ ହୋଇପଡିଛି ବୋଲି କଂଗ୍ରେସ ଅଧ୍ୟକ୍ଷ କହିଥିଲେ। ନୋଟବନ୍ଦୀ ପରେ ଦେଶରେ ୫୦ ଲକ୍ଷ ଲୋକ ନିଯୁକ୍ତ ହରାଇଛନ୍ତି। ଉତ୍ତରପ୍ରଦେଶର ଅମେଠି ସମେତ ଓ୍ବାୟାନାଡ୍ ଆସନରୁ ପ୍ରାର୍ଥୀ ହୋଇଥିବା ରାହୁଲ ଉକ୍ତ ନିର୍ବାଚନ ମଣ୍ଡଳୀକୁ ଉଚ୍ଚ ପ୍ରଶଂସା କରିଛନ୍ତି। ବିଭିନ୍ନ ସଂସ୍କୃତି ଓ ଚିନ୍ତାଧାରା ପ୍ରତୀକ ଏହି ସୁନ୍ଦର ସ୍ଥାନର ପ୍ରତିନିଧିତ୍ୱ କରିବା ପାଇଁ ସେ ଚାହିଁଥିଲେ ବୋଲି କହିଛନ୍ତି।
ଏହି ଅବସରରେ ରାହୁଲ ତାଙ୍କ ପିତା ରାଜୀବ ଗାନ୍ଧୀଙ୍କ ଚିତାଭସ୍ମ ବିସର୍ଜନ ହୋଇଥିବା ପାପନାଶିନୀ ନଦୀ କୂଳରେ ପହଞ୍ଚତ୍ ବାଲି ତର୍ପଣ କରିଥିଲେ। ଏହା ପରେ ସେ ଥିରୁନେଲି ମନ୍ଦିର ଯାଇ ସେଠାରେ ପୂଜାର୍ଚ୍ଚନା କରିଥିଲେ। ରାହୁଲ ଧୋତି ଓ ସିଲ୍କ ସାଲ୍ ପରିଧାନ କରିଥିବା ଦେଖାଯାଇଥିଲା। ଦକ୍ଷିଣର କାଶୀ ଭାବେ ପରିଚିତ ପାହାଡ ଜଙ୍ଗଲଘେରା ଏହି ମନ୍ଦିରରେ ଭଗବାନ ମହାବିଷ୍ଣୁ ପୂଜା ପାଇଥାନ୍ତି।
ଆନନ୍ଦଠାରେ ଏକ ନିର୍ବାଚନୀ ସଭାରେ ପ୍ରଧାନମନ୍ତ୍ରୀ ରାହୁଲଙ୍କୁ କଡ଼ା ଜବାବ ଦେଇଛନ୍ତି। କଂଗ୍ରେସ ହିଁ ମିଛର ସୃଷ୍ଟିକର୍ତ୍ତା। ସାମ୍ପ୍ରଦାୟ ମଧ୍ୟରେ ବିଭାଜନ ସୃଷ୍ଟି କରିବା କଂଗ୍ରେସର ଏକମାତ୍ର ଲକ୍ଷ୍ୟ। ତାଙ୍କୁ ଚୋର କହି ରାହୁଲ ସମସ୍ତ ଓବିସିଙ୍କଠାରେ ଚୋର ମୋହର ଲଗାଇଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ। ଭାଜପା ଅଧ୍ୟକ୍ଷ ଅମିତ ଶାହ ଗତ ସପ୍ତାହରେ କହିଥିଲେ, ରାହୁଲଙ୍କ ଶୋଭାଯାତ୍ରାରୁ ତାହା ଭାରତରେ କିମ୍ବା ପାକିସ୍ତାନରେ ଚିହ୍ନଟ କରିବା କଷ୍ଟକର ହେଉଥିଲା। ରାହୁଲଙ୍କ ଗତ ୪ ତାରିଖ ରୋଡ୍ ଶୋରେ ଆଇୟୁଏମ୍ଏଲ୍ର ସବୁଜ ପତାକାକୁ ଲକ୍ଷ୍ୟ କରି ଶାହ ଏଭଳି ମନ୍ତବ୍ୟ ଦେଇଥିଲେ।
