ଚୌଦ୍ୱାର,୨୦।୫(ଡି.ଏନ.ଏ.): ମୃତ୍ୟୁ କେତେବେଳେ କେମିତି ଆସେ ତାହା କେହି ଜାଣିପାରନ୍ତି ନାହିଁ। ବର୍ତ୍ତମାନ ରାତିପାହିଲେ କରୋନା ଆକ୍ରାନ୍ତଙ୍କ ମୃତ୍ୟୁ ଘଟୁଥିବା ଖବର ଶୁଣିବାକୁ ମିଳୁଛି। କେଉଁଠି ମାଆବାପା ଆଗରେ ପୁଅ ଚାଲିଯାଉଛି ତ ଆଉ କେଉଁଠି ପିଲାଙ୍କ ଆଗରେ ମାଆବାପାଙ୍କ ଜୀବନ ଯାଉଛି। ଏପରି ଏକ ଘଟଣା ଦେଖିବାକୁ ମିଳିଛି କଟକ ଜିଲା ଟାଙ୍ଗୀ-ଚୌଦ୍ୱାର ବ୍ଲକ ନପଙ୍ଗ ପଞ୍ଚାୟତ ଅଧୀନ ସାଇଁଟୋ ଗ୍ରାମରେ। ପୁଅର ମୃତ୍ୟୁ ଖବର ଶୁଣିବା ପରେ ମା’ର ମୃତ୍ୟୁ ଘଟିଛି।
ମିଳିଥିବା ସୂଚନା ଅନୁଯାୟୀ, ୭ଦିନ ତଳେ କରୋନାରେ ଆକ୍ରାନ୍ତ ହୋଇ ସାଇଁଟୋ ଗ୍ରାମର କିଣୁ ଚରଣ ବେହେରାଙ୍କ ପୁଅ ଦୟାନିଧି (୪୨) କଟକ ଖାନନଗରସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ଅପରାହ୍ନ ପ୍ରାୟ ୪ଟାରେ ତାଙ୍କର ମୃତ୍ୟୁ ଘଟିଥିଲା। ଏହି ଖବର ଶୁଣି ତାଙ୍କ ପରିବାରରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଥିଲା। ଏହି ଖବର ପାଇବା ପରେ ନିଜକୁ ସମ୍ଭାଳି ପାରି ନ ଥିଲେ ଦୟାନିଧିଙ୍କ ମା’ ଶାନ୍ତିଲତା(୬୨)। ପୁଅର ମୃତ୍ୟୁ ଖବର ତାଙ୍କୁ ଶକ୍ତ ଧକ୍କା ଦେଇଥିଲା। ପୁଅ କଥା ଭାବିଭାବି ରାତିସାରା କାନ୍ଦିବା ପରେ ଶେଷରେ ବୁଧବାର ସକାଳ ୮ଟାରେ ହୃଦ୍ଘାତରେ ଶାନ୍ତିଲତାଙ୍କ ମୃତ୍ୟୁ ଘଟିଥିବା କିଣୁ ଚରଣ କହିଛନ୍ତି। କଟକ ସତୀଚଉରା ଶ୍ମଶାନରେ ମଙ୍ଗଳବାର ଦୟାନିଧିଙ୍କ ମୃତଦେହ ସତ୍କାର କରାଯାଇଥିବାବେଳେ ଶାନ୍ତିଲତାଙ୍କ ମୃତଦେହ ସାହିଭାଇ ଓ ପରିବାର ଲୋକେ ଗଁା ମଶାଣିରେ ପୋତିଥିଲେ।
ଦୟାନିଧିଙ୍କ ଦୁଇଟି ଝିଅ ଓ ଗୋଟିଏ ପୁଅ ଅଛନ୍ତି। ବଡ ଝିଅଟି ୧୦ବର୍ଷର, ଅନ୍ୟ ଜଣେ ୮ବର୍ଷର ଓ ପୁଅକୁ ୩ ବର୍ଷ। ଦୟାନିଧି ମୂଲଲାଗି ପରିବାର ଚଳାଉଥିଲେ। ଏବେ ତାଙ୍କ ମୃତ୍ୟୁ ପରେ ୩ଟି ପିଲାଙ୍କୁ କେମିତି ମଣିଷ କରିବେ ବୋଲି ତାଙ୍କ ସ୍ତ୍ରୀ ସରୋଜିନୀ କହିଛନ୍ତି।
