ବାଲେଶ୍ୱର ଅଫିସ, ୨୫।୨-ବାଲେଶ୍ୱର ସହର ସ୍ଥାନୀୟ ଟାଉନହଲ୍ଠାରେ ବାଲେଶ୍ୱର ‘ଇନ୍ଟାକ୍’ ଚାପ୍ଟରର ତୃତୀୟ ଆକର୍ଷଣୀୟ ପୀଠା ପ୍ରତିଯୋଗିତା ଓ ପ୍ରଦର୍ଶନୀ ଅନୁଷ୍ଠିତ ହୋଇଯାଇଛି। ଏଥିରେ ୫୨ଜଣ ପ୍ରତିଯୋଗୀ ଯୋଗଦାନ କରିଥିଲେ। ଏହି ପ୍ରତିଯୋଗିତାରେ ବୀଣା ନନ୍ଦୀ ପ୍ରଥମ, ରଶ୍ମି ସାହୁ ଦ୍ୱିତୀୟ ଓ ବେବିରାଣୀ ଦାସ ତୃତୀୟ ସ୍ଥାନ ହାସଲ କରିବା ସହ ୧୦ଜଣଙ୍କୁ ସାନ୍ତ୍ୱନାମୂଳକ ପୁରସ୍କାର ପ୍ରଦାନ କରାଯାଇଥିଲା। ଏହି ପ୍ରତିଯୋଗିତାରେ ପୋଡ଼ ତଥା ସିଝା ପିଠା ସବୁକୁ ମୂଲ୍ୟାୟନ ପାଇଁ ଗ୍ରହଣ କରାଯାଇଥିଲା। ଅନ୍ୟ ସମସ୍ତ ପ୍ରକାର ପିଠା ପ୍ରଦର୍ଶନୀରେ ଦର୍ଶକମାନଙ୍କୁ ବିକ୍ରୟ ପାଇଁ ରଖାଯାଇଥିଲା। ଅତିଥିମାନେ କାର୍ଯ୍ୟକ୍ରମକୁୁ ପ୍ରଶଂସା କରିଥିଲେ। ପିଠାର ମହତ୍ତ୍ୱ ଆଜିକାଲିର ଫାଷ୍ଟଫୁଡ୍ ଯୁଗରେ କେତେ ଯେ ଗୁରୁତ୍ୱପୂର୍ଣ୍ଣ ତାହା ସମସ୍ତେ ଉପଲବ୍ଧି କରିଥିଲେ।
ବାଲେଶ୍ୱର ‘ଇନ୍ଟାକ୍’ ଚାପ୍ଟରର ଆବାହକ ହିମାଂଶୁ ଦାଶ ସଭାପତିତ୍ୱ କରିଥିଲେ। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କାର୍ଯ୍ୟକ୍ରମକୁ ଉଦ୍ଘାଟନ କରି ଅନ୍ୟ ସବୁ ସଂସ୍ଥାଙ୍କୁ ଏଭଳି କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ ଆହ୍ବାନ ଦେଇଥିଲେ। ସହଆବାହକ ଉଦୟ ରଞ୍ଜନ ଦାସ ବର୍ତ୍ତମାନ ପରିସ୍ଥିତିରେ ପାରମ୍ପରିକ ପିଠା ପ୍ରତିଯୋଗିତାର ଆବଶ୍ୟକତା ଏବଂ ବିଲୁପ୍ତପ୍ରାୟ ପୀଠାର ପୁନଃ ମୂଲ୍ୟାୟନର ସମୟ ଆସିଛି ବୋଲି କହିଥିଲେ। ଚାନ୍ଦିପୁର ପାନ୍ଥନିବାସର ମ୍ୟାନେଜର ସୟଦ ତାରିକ ଅଲ୍ଲୀ, ଅଧ୍ୟାପିକା ବନ୍ଦନା ମହାପାତ୍ର ଓ କୁମ୍କୁମ୍ ଦାସ ବିଚାରକ ଭାବେ ଯୋଗଦେଇଥିବା ବେଳେ ‘ଇନ୍ଟାକ୍’ ସଭ୍ୟା ଅଲିଭା ଦାସ, ସଂଘମିତ୍ରା ମହାନ୍ତି ପ୍ରମୁଖ ସହଯୋଗ କରିଥିଲେ। ଜିଲା ଶିଳ୍ପ କେନ୍ଦ୍ର ଜେନେରାଲ ମ୍ୟାନେଜର ହରିହର ଜେନା ଅତିଥି ଭାବେ ଯୋଗଦେଇ କୃତି ପ୍ରତିଯୋଗୀମାନଙ୍କୁ ପୁରସ୍କାର ପ୍ରଦାନ କରିଥିଲେ। କାର୍ଯ୍ୟକ୍ରମକୁ ଅର୍ଚ୍ଚନା ନନ୍ଦୀ, ଭାବଗ୍ରାହୀ ମହାନ୍ତି ପରିଚାଳନା କରୁଥିବାବେଳେ ସହ-ଆବାହକ ନିକୁଞ୍ଜ ବିହାରୀ ଦାସ, ସଭ୍ୟ ବିଶ୍ୱନାଥ ରଣା, ସପନ ମହାପାତ୍ର, ପ୍ରଦୀପ୍ତ ପଣ୍ଡା, ଯଶୋଦା ନନ୍ଦନ ଆଶ୍, କିଶୋର ଚକ୍ରବର୍ତ୍ତୀ, ହରେନ ରଣା, ଗୌରବ ବେହେରା, ମାତୃଦତ୍ତ ଦାସ, ଗୀତାଞ୍ଜଳି ପାଣିଗ୍ରାହୀ ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ।
