ପାରାଦୀପ,୧୬।୩ (ସ୍ବ.ପ୍ର.): ପାରାଦୀପ ବନ୍ଦର ଭିତ୍ତିକ ଶିଳ୍ପାଞ୍ଚଳରେ ଏବେ ଜନସଂଖ୍ୟା ହ୍ରାସ ପାଇବାରେ ଲାଗିଛି। ୨୦୦୧ ଜନଗଣନା ତଥ୍ୟାନୁସାରେ ଏଠାକାର ଜନସଂଖ୍ୟା ୭୩,୬୨୫ ଥିବା ବେଳେ ୨୦୧୧ ବେଳକୁ ହ୍ରାସ ପାଇ ୬୮,୩୧୦ରେ ପହଞ୍ଚତ୍ଥିଲା। ୨୦୨୧ ଜନଗଣନା ବେଳକୁ ସେହି ସଂଖ୍ୟା ଅଧିକ ହ୍ରାସ ପାଇବ ବୋଲି ପୂର୍ବାପର ଘଟଣାରୁ ଅନୁମାନ କରାଯାଉଛି। ଅନ୍ୟପଟେ ସେହି ଶିଳ୍ପାଞ୍ଚଳରେ ଗତ ୧୦ ବର୍ଷରେ ଥାନା ସଂଖ୍ୟା ୧ରୁ ୫ରେ ପହଞ୍ଚତ୍ଛି। ଏହାସତ୍ତ୍ୱେ ଅପରାଧ ନିୟନ୍ତ୍ରଣ ନିରୁତ୍ସାହଜନକ ରହିଛି।
୨୦୦୯ ସୁଦ୍ଧା ପାରାଦୀପରେ ଗୋଟିଏ ଥାନା ଥିଲା। ପାରାଦୀପ ଥାନାର ସୀମା କୁଜଙ୍ଗ ପାଖ ୧୫ ନଂ. ଛକ ପର୍ଯ୍ୟନ୍ତ ଥିଲା। ସେତେବେଳେ ବର୍ଷକୁ ଉକ୍ତ ଥାନାର କେସ୍ ସଂଖ୍ୟା ପ୍ରାୟ ୩୫୦ରୁ ୪୦୦ ମଧ୍ୟରେ ରହୁଥିଲା। ୨୦୦୯ ମାର୍ଚ୍ଚରେ ଲକ୍ ଥାନା ଓ ମେରାଇନ୍ ଥାନା କାର୍ଯ୍ୟକ୍ଷମ ହେଲା। ଏହାପରେ ୨୦୧୨ରୁ ଅଭୟଚାନ୍ଦପୁର ଥାନା, ୨୦୧୭ରୁ ଜଟାଧାର ମୁହାଣ ସାମୁଦ୍ରିକ ଥାନା କାର୍ଯ୍ୟ କରୁଛି। ୫ ଥାନାରେ ୫ ଆଇଆଇସିଙ୍କ ସମେତ ୨୦ରୁ ଊଦ୍ଧର୍ବ ଅଫିସର, ଶତାଧିକ କନଷ୍ଟେବଳ, ହାବିଲଦାର, ଗୃହରକ୍ଷୀ ଆଦି ଅଛନ୍ତି। ଗୋଟିଏ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟ ମଧ୍ୟ ରହିଛି। ହେଲେ ପୂର୍ବାପେକ୍ଷା ଏଠାରେ ଚୋରି, ଟ୍ରାଫିକ୍ ସମସ୍ୟା, ସଂଘୀୟ ପ୍ରୋଟେକଶନ୍ ବ୍ୟବସ୍ଥା, କଳାବଜାରୀ ଆଦି ବଢୁଥିବା ଅଭିଯୋଗ ସଂଖ୍ୟାରୁ ସ୍ପଷ୍ଟ ହେଉଛି। ସେହିପରି ପୋଲିସ ଏକାଧିକ ଚୋରି ଘଟଣାର ରହସ୍ୟ ଖୋଲିପାରି ନାହିଁ।
ପ୍ରକାଶ ଯେ, ପାରାଦୀପ ଶିଳ୍ପସଂସ୍ଥାରେ ପ୍ରତ୍ୟହ କୋଟିଏରୁ ଊର୍ଦ୍ଧ୍ୱ ଟଙ୍କାର ଟେଣ୍ଡର ହେଉଛି। ଠିକାସଂସ୍ଥା ପକ୍ଷରୁ କାମ ଆରମ୍ଭ ବେଳେ ସଂଘ, ୟୁନିୟନ, ପରିଷଦ, ସମିତି, ମଞ୍ଚ, ଟ୍ରଷ୍ଟ ନଁାରେ ସଂଗଠନ କରାଯାଇ ସେଥିରେ ବିରୋଧ କରାଯାଉଛି। ପ୍ରଦୂଷଣ, ପାନୀୟ ଜଳ, ଇପିଏଫ୍, ଇଏସ୍ଆଇ, ସିଏସ୍ଆର, ପାରିପାର୍ଶ୍ୱିକ ଉନ୍ନୟନ, ନିଯୁକ୍ତି ନଁାରେ ଠିକା କମ୍ପାନୀଗୁଡିକୁ ଶୋଷଣ କରାଯାଉଛି ବୋଲି ପ୍ରାୟତଃ ଅଭିଯୋଗ ହେଉଛି। ଚୋରା ତେଲ, ସ୍କ୍ରାବ୍, କଳା ତେଲ, ଅବକାରୀ, ବନ୍ଦର ଓ ଶିଳ୍ପରେ କାରବାର ହେଉଥିବା ପଣ୍ୟ ହେରଫେର, କେବୁଲ ଚୋରି ଆଦି ଅନେକ ଆପରାଧିକ କାରବାର ମଧ୍ୟ ଚାଲୁଛି। ଶିଳ୍ପ ସଂସ୍ଥାରେ ଅଧିକାଂଶ ସମୟ ଧାରଣା, ଆନ୍ଦୋଳନ ଲାଗିରହିଛି। ତା’ସହିତ ସହରାଞ୍ଚଳରେ ଅଧରାତି ପର୍ଯ୍ୟନ୍ତ ଡାକବାଜି ଯନ୍ତ୍ର, ସାଂସ୍କୃତିକ କାର୍ଯ୍ୟକ୍ରମ ଚାଲୁଥିବା ବେଳେ ପୋଲିସ ଏହାକୁ ବନ୍ଦ କରିବାରେ ବିଫଳ ହୋଇଛି। ବେଳାଭୂମି, ମହାନଦୀ ମୁହାଣ ଅଞ୍ଚଳ ଭଳି ପର୍ଯ୍ୟଟନ ସ୍ଥଳୀରେ ଅନେକ ସମୟରେ ଅପରାଧିକ କାର୍ଯ୍ୟକଳାପ ଚାଲୁଥିବା ଅଭିଯୋଗ ହେଉଛି। ଏଥିସହ ସୋସିଆଲ ମିଡିଆରେ ଠକେଇ ଓ ଫଟୋ, ଭିଡ଼ିଓ ଭାଇରାଲ ଭଳି ଘଟଣା ଘଟୁଥିବା ନଜରକୁ ଆସୁଛି। ଅବଶ୍ୟ ପାରାଦୀପ ମଡେଲ ଥାନା ‘ମୋ ସରକାର’ ଅଧୀନକୁ ଆସିବା ପରଠାରୁ ପୋଲିସ ବ୍ୟବହାରରେ କେତେକ ପରିବର୍ତ୍ତନ ଦେଖିବାକୁ ମିଳୁଥିବା ସହରାଞ୍ଚଳବାସୀ କହିଛନ୍ତି। ଏ ପ୍ରସଙ୍ଗରେ ପାରାଦୀପ ଏଏସ୍ପି ବିଷ୍ଣୁଚରଣ ମିଶ୍ରଙ୍କୁ ପଚାରିବାରେ, ସହରରେ ଅପରାଧ ନିୟନ୍ତ୍ରଣ ପାଇଁ ଚେଷ୍ଟା ଚାଲିଛି। ମାତ୍ର ପାରାଦୀପରେ ଟ୍ରାଫିକ୍ ଏକ ପ୍ରମୁଖ ସମସ୍ୟା ପାଲଟିଛି। ଏଥିଯୋଗୁ ଦିନକୁ ଦିନ ସଡ଼କ ଦୁର୍ଘଟଣା ବଢୁଛି। ପାରାଦୀପକୁ ଦୈନିକ ୧୦ ହଜାରରୁ ଊର୍ଦ୍ଧ୍ୱ ଟ୍ରକ୍ ଚଳାଚଳ କରୁଥିବା ବେଳେ ଟର୍ମିନାଲର ସୁବିଧା ନାହିଁ, ଯାହାଫଳରେ ରାଜପଥ ଉପରେ ସେଗୁଡ଼ିକ ଧାଡ଼ି ଧାଡ଼ି ହୋଇରହୁଛି। ଏଥିଯୋଗୁ ଦୁର୍ଘଟଣା ଓ ତତ୍ଜନିତ ମୃତ୍ୟୁସଂଖ୍ୟା ବଢ଼ୁଛି ବୋଲି ଏଏସ୍ପି ମିଶ୍ର କହିଛନ୍ତି।
