ବାଲେଶ୍ୱର ଅଫିସ ,୯ା୫: ସମ୍ଭାବ୍ୟ ବାତ୍ୟା ନେଇ ଚାଷୀମାନେ ଭୟଭୀତ ହୋଇପଡିଛନ୍ତି। ଗତପଥ ବଦଳାଇ ବାତ୍ୟା ବାଂଲାଦେଶ, ମିଅଁାମାର ମୁହଁା ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଉଥିଲେ ମଧ୍ୟ ବାଲେଶ୍ୱର ଜିଲାରେ ଧାନ ଚାଷ କରିଥିବା ଚାଷୀମାନେ ଭରସା କରି ନ ପାରି ଅଧା ପାଚିଲା ଧାନକୁ କାଟି ନେଉଛନ୍ତି। ଅମଳ ସମୟ ହୋଇ ନ ଥିଲେ ମଧ୍ୟ ବାତ୍ୟାଜନିତ ବର୍ଷାରେ ଭାସିଯିବା ଭୟରେ ଚାଷୀମାନେ ଏଭଳି ତରବରିଆ ଭାବେ କାମ କରୁଛନ୍ତି।
ଚାଷୀମାନେ ମୁଖ୍ୟତଃ ଧାନ ଚାଷ ଉପରେ ନିର୍ଭରଶୀଳ। ମାତ୍ର ଧାନ ଅମଳ ବେଳକୁ ପ୍ରାକୃତିକ ବିପର୍ଯ୍ୟୟ ଚାଷୀଙ୍କ ମେରୁଦଣ୍ଡ ଦୋହଲାଇ ଦେଉଛି। ଗତ କିଛି ବର୍ଷ ହେବ ମେ’ରେ ବାତ୍ୟା ଆସି ଚାଷୀଙ୍କ ଫସଲକୁ ନଷ୍ଟ କରିଦେଉଛି। ଧାନ ସମ୍ପୂର୍ଣ୍ଣ ପାଚି ନ ଥିବା ବେଳେ ବାତ୍ୟା ଖବର ପାଇ ଚାଷୀ ତରତରରେ ଅଧା ପାଚିଲା ଧାନକୁ କାଟିବାକୁ ବାଧ୍ୟ ହେଉଛି। ଫଳରେ ଆଶା କରିଥିବା ଅମଳଠାରୁ ଅଧା ଫସଲ ପାଇବା ସମ୍ଭାବନା କମ୍। ପ୍ରତିବର୍ଷ ଭଳି ଧାନ ସମ୍ପୂର୍ଣ୍ଣ କ୍ଷତି ହେବା ଅପେକ୍ଷା ଯାହା କିଛି ମିଳିବ ସେହି ଆଶା ନେଇ କିଏ ମେଶିନ୍ରେ, ତ କିଏ ପରିବାର ଲୋକଙ୍କୁ ନେଇ ଧାନ କାଟିବାରେ ବ୍ୟସ୍ତ। ବାଲିଆପାଳ ବ୍ଲକ ଲଙ୍ଗଳେଶ୍ୱର ଅଞ୍ଚଳରେ ୮୦ ପ୍ରତିଶତ ଲୋକେ ଚାଷ ଧାନଚାଷୀ। ମାତ୍ର ବାତ୍ୟା ସବୁ ବର୍ଷ ଲୋକଙ୍କ ମୁହଁରୁ ଆହାର ଛଡ଼ାଇ ନେଉଛି। ଚଳିତବର୍ଷ ବସ୍ତା ବ୍ଲକରେ ୫ ହଜାର ହେକ୍ଟର ଜମିରେ ଧାନଚାଷ ହୋଇଥିଲା। ଧାନ ସମ୍ପୂର୍ଣ୍ଣ ପାଚିବାକୁ ଆଉ ପାଖାପାଖି ୧୫ ଦିନ ଆବଶ୍ୟକ ଥିବା ବେଳେ ବାତ୍ୟା ଭୟରେ ଧାନ କାଟିବାକୁ ବାଧ୍ୟ ହେଉଛି ଚାଷୀ। ବର୍ତ୍ତମାନ ଧାନ ୪୦ପ୍ରତିଶତ ପାଚିଥିବା ବେଳେ ୬୦ପ୍ରତିଶତ ପାଚିବା ପାଇଁ ବାକି ରହିଛି। ବାତ୍ୟା ଭୟରେ କିଛି ପାଇବା ଆଶାରେ ଧାନ କାଟୁଛନ୍ତି ସିନା କିପରି ଋଣ ପରିଶୋଧ କିପରି ସେହି ଚିନ୍ତା ଘାରିଛି। ଲଙ୍ଗଳେଶ୍ୱର ଅଞ୍ଚଳର ଚାଷୀ ପଞ୍ଚାନନ ଜେନା କୁହନ୍ତି, ୪ ଏକର ଜମିରେ ଧାନ ଚାଷ କରିଛନ୍ତି। କିନ୍ତୁ ବର୍ଷକୁ ବର୍ଷ ନୂଆ ନୂଆ ବାତ୍ୟା ଆସିବା ଫଳରେ କଞ୍ଚା ଥିବା ଧାନକୁ କାଟିବାକୁ ବାଧ୍ୟ ହେଉଛୁ। ବେପାରୀମାନେ କମ୍ ଦାମ୍ରେ ଧାନକୁ ନେଉଛନ୍ତି। ଶକୁଳ ମଣି ବେହେରା କହନ୍ତି, ପ୍ରତିବର୍ଷ ବାତ୍ୟା ଆସୁଛି। ଫଳରେ ଚାଷ କରିଥିବା ଧାନ ଠିକ୍ ଭାବେ ଅମଳ ହୋଇପାରୁନି। ଫଳରେ ଋଣ ଓ ସୁଧରେ ଟଙ୍କା ଆଣି ଚାଷ କରି ବହୁ ହଇରାଣ ହରକତ ହେଉଛୁ।
