ନାରକଣ୍ଡା ହିମାଚଳ ପ୍ରଦେଶସ୍ଥିତ ଏକ ଛୋଟ ସହର;ଯାହା ନିଜର ଆକର୍ଷଣୀୟ ପ୍ରାକୃତିକ ସୌନ୍ଦର୍ଯ୍ୟ ତଥା ସ୍କିଂ ପଏଣ୍ଟ ପାଇଁ ସାରା ଭାରତରେ ବେଶ୍ ପ୍ରସିଦ୍ଧିଲାଭ କରିପାରିଛି। ସମୁଦ୍ର ପତ୍ତନଠାରୁ ପ୍ରାୟ ୨, ୭୦୮ ମିଟର ଉଚ୍ଚତାରେ
ଅବସ୍ଥିତ ନାରକଣ୍ଡାରେ ଭରିରହିଛି ବହୁ ଉଚ୍ଚ ପାହାଡ଼, ସବୁଜ ବନାନୀ ତଥା ଅନେକ ପର୍ଯ୍ୟଟନସ୍ଥଳୀ…
ହିମାଚଳ ପ୍ରଦେଶର ଶିମ୍ଲା ଜିଲା ଅନ୍ତର୍ଗତ ଏକ ପାର୍ବତ୍ୟ ସହର ହେଉଛି ନାରକଣ୍ଡା। ଅପୂର୍ବ ପ୍ରାକୃତିକ ସୌନ୍ଦର୍ଯ୍ୟଭରା ଏହି ସହରରେ ପର୍ଯ୍ୟଟକ ବହୁ ଉଚ୍ଚ ପାହାଡ଼, ସବୁଜ ବନାନୀ ଦେଖିବା ସାଙ୍ଗକୁ ସ୍କିଂ ତଥା ଟ୍ରେକିଂର ମଜା ମଧ୍ୟ ନେଇପାରିବେ। କେବଳ ସେତିକି ନୁହେଁ ଏଠାକାର ରାସ୍ତାଘାଟର ଉଭୟ ପାର୍ଶ୍ୱରେ ଜାତିଜାତିକା ବୃକ୍ଷ ବିଶେଷକରି ଦେବଦାରୁ, ଚେରି, ସେଓ ତଥା ନାନାଦି ରଙ୍ଗର ଫୁଲର ସମ୍ଭାର ଦେଖିବାକୁ ମିଳିଥାଏ। ଏଥିସହିତ କୋଟଗଢ଼ ଏବଂ ଥାନେଧାର ହେଉଛି ନାରକଣ୍ଡାସ୍ଥିତ ଏମିତି ଦୁଇଟି ସ୍ଥାନ; ଯେଉଁଠାରେ ମୁଖ୍ୟତଃ ସେଓ ଚାଷ କରାଯାଇଥାଏ। ଖାସ୍ ଏହିସବୁ କାରଣ ପାଇଁ ବର୍ଷସାରା ଏଠାରେ ପର୍ଯ୍ୟଟକଙ୍କର ଗହଳି ଦେଖିବାକୁ ମିଳେ।
ଜଳବାୟୁ
ନାରକଣ୍ଡାର ଜଳବାୟୁ ବର୍ଷସାରା ବୁଲାବୁଲି କରିବା ପାଇଁ ବେଶ୍ ଅନୁକୂଳ ରହୁଥିଲେ ବି ଏଠାରେ ଏପ୍ରିଲ୍ରୁ ଜୁନ୍ ଗ୍ରୀଷ୍ମ, ଜୁଲାଇରୁ ସେପ୍ଟେମ୍ବର ବର୍ଷା ଏବଂ ଅକ୍ଟୋବରରୁ ମାର୍ଚ୍ଚ ଶୀତ ଋତୁ ଅନୁଭୂତ ହୋଇଥାଏ। ଗ୍ରୀଷ୍ମଦିନେ ଏଠାକାର ସର୍ବୋଚ୍ଚ ତାପମାତ୍ରା ୨୦ଡିଗ୍ରୀ ସେଲ୍ସିୟସ୍ ରହୁଥିବା ବେଳେ ସର୍ବନିମ୍ନ ତାପମାତ୍ରା ପ୍ରାୟ ୧୦ ଡିଗ୍ରୀ ସେଲ୍ସିୟସ୍ ରହିଥାଏ। ଅନ୍ୟପକ୍ଷେ ଶୀତଦିନେ ଏଠାକାର ସର୍ବୋଚ୍ଚ ତାପମାତ୍ରା ୭ରୁ ୮ ଡିଗ୍ରୀ ସେଲ୍ସିୟସ୍ ରହୁଥିବା ବେଳେ ସମୟେ ସମୟେ ତାପମାତ୍ରା କମିଯାଇ -୫ରୁ -୧୦ ଡିଗ୍ରୀ ମଧ୍ୟ ହୋଇଯାଇଥାଏ। କହିବାକୁ ଗଲେ ଶୀତଦିନେ ଏଠାକାର ଚାରିଆଡ଼େ ବରଫର ଚାଦର ଘୋଡ଼େଇ ହେଲାଭଳି ଦେଖାଯାଇଥାଏ।
କ’ଣ ଦେଖିବେ?
ପର୍ଯ୍ୟଟକଙ୍କ ଦେଖିବା ନିମନ୍ତେ ଏଠାରେ ରହିଛି ଅନେକ ଆକର୍ଷଣୀୟ ପର୍ଯ୍ୟଟନସ୍ଥଳୀ। ଯେମିତିକି:
* ହାଟୁ ଶିଖର: ନାରକଣ୍ଡାଠାରୁ ମାତ୍ର ୮ କି.ମି. ଦୂରରେ ରହିଛି ଏହି ଆକର୍ଷଣୀୟ ପର୍ଯ୍ୟଟନସ୍ଥଳୀ। ଏଠାରେ ପର୍ଯ୍ୟଟକ ହାଟୁ ମାତାଙ୍କ ମନ୍ଦିର ଦେଖିବା ସହ ଶୀତଦିନେ ସ୍କିଂର ଭରପୂର ମଜା ନେଇପାରିବେ।
* ଭୀମ୍କା ଚୁଲା: କିମ୍ବଦନ୍ତୀ ଅନୁଯାୟୀ, ଅଜ୍ଞାତବାସ ସମୟରେ ପଞ୍ଚୁ ପାଣ୍ଡବ କୁଆଡ଼େ ଏହି ସ୍ଥାନରେ କିଛିଦିନ ବିତାଇବା ସହ ରୋଷେଇ କରି ଖାଇଥିଲେ। ଏହି ପବିତ୍ର ସ୍ଥାନଟି ହାଟୁ ମାତାଙ୍କ ମନ୍ଦିରଠାରୁ ମାତ୍ର ଅଳ୍ପ କିଛି ଦୂରରେ ଥିବାର ଦେଖାଯାଇଥାଏ।
* କୁମାରସୈନ: ନାରକଣ୍ଡାଠାରୁ ମାତ୍ର ୨୦ କି.ମି. ଦୂରରେ ରହିଛି ଏହି ସ୍ଥାନଟି। ଏଠାରେ ପର୍ଯ୍ୟଟକ ପାହାଡ଼ ଉପରେ କେମିତି ସୁନ୍ଦର ସୁନ୍ଦର ଘର ଆଦି ତିଆରି କରାଯାଇଛି; ତାହାର ଅନେକ ଝଲକ ଦେଖିବାକୁ ପାଇପାରିବେ।
* ନାରକଣ୍ଡା ବଜାର: ନାରକଣ୍ଡାର ଏହି ବଜାରରେ ପର୍ଯ୍ୟଟକ ସୁଲଭ ମୂଲ୍ୟରେ ଶୀତବସ୍ତ୍ର କିଣିବାର ସୁଯୋଗ ପାଇପାରିବେ।
ବୁଲିବାର ପ୍ରକୃଷ୍ଟ ସମୟ
ଏଠାକାର ଜଳବାୟୁକୁ ଲକ୍ଷ୍ୟକଲେ ଜଣାଯାଏ ଯେ, ଖରାଦିନେ ଏଠାକୁ ବୁଲିଯିବା ସବୁଠାରୁ ଉତ୍ତମ ହୋଇଥାଏ। କାରଣ ଏହି ସମୟରେ ଏଠାକାର ପାଣିପାଗ ବୁଲାବୁଲି କରିବାକୁ ବେଶ୍ ଅନୁକୂଳ ରହିଥାଏ। ନା ବେଶି ଗରମ ହେଉଥାଏ ନା ଶୀତ। କିନ୍ତୁ ଯେଉଁମାନଙ୍କର ସ୍କିଂ କରିବା ପସନ୍ଦ ସେମାନେ ଚାହିଁଲେ ଶୀତଦିନେ ଏଠାକୁ ବୁଲିଯାଇ ପାରବେ।
