ବାଲେଶ୍ୱର ଅଫିସ,୨୬।୪-ବାଲେଶ୍ୱର ପୌରାଞ୍ଚଳର ନେଳିଆବାଗ ଅଞ୍ଚଳରେ ପ୍ରଥମ କରୋନା ଆକ୍ରାନ୍ତ ଚିହ୍ନଟ ହେବା ପରେ ସମ୍ପୃକ୍ତ ଅଞ୍ଚଳକୁ ଜିଲା ପ୍ରଶାସନ ତରଫରୁ ସଂକ୍ରମଣ ପ୍ରତିରୋଧ ଅଞ୍ଚଳ (କଣ୍ଟେନମେଣ୍ଟ ଜୋନ) ଭାବେ ଘୋଷଣା କରାଯାଇଥିଲା। ସେହି ଅଞ୍ଚଳରେ ଲୋକମାନଙ୍କ ଯିବା ଓ ଆସିବା ଉପରେ କଟକଣା ଜାରି କରାଯିବା ସହ ଲୋକମାନଙ୍କୁ ନିଜ ଘରେ ରହିବାକୁ କୁହାଯାଇଥିଲା । ଏପ୍ରିଲ ୨୫ ତାରିଖ ମଧ୍ୟରାତ୍ରି ପର୍ଯ୍ୟନ୍ତ ଏହା ବଳବତ୍ତର ରହିବ ବୋଲି ପୂର୍ବରୁ ଘୋଷଣା କରାଯାଇଥିଲା। ଏବେ ଏହି କଣ୍ଟେନମେଣ୍ଟ ଅବଧିକୁ ଆଉ ୭ଦିନ ଅର୍ଥାତ ମେ’ ୨ତାରିଖ ମଧ୍ୟରାତ୍ରି ପର୍ଯ୍ୟନ୍ତ ବୃଦ୍ଧି କରାଯାଇଛି ।
ପରବର୍ତ୍ତୀ ପର୍ଯ୍ୟାୟରେ ସେହି ଅଞ୍ଚଳରେ ଆହୁରି ୭ଟି ପଜିଟିଭ ଚିହ୍ନଟ ହେବା ପରେ ସେଠାରେ ପଜିଟିଭ ସଂଖ୍ୟା ଏବେ ୮କୁ ବୃଦ୍ଧି ପାଇଛି । ତେଣୁ ଜନସାଧାରଣଙ୍କ ସ୍ବାର୍ଥକୁ ଦୃଷ୍ଟିରେ ରଖି ସମ୍ପୃକ୍ତ ଅଞ୍ଚଳରେ କୋଭିଡ଼-୧୯ ସଂକ୍ରମଣକୁ ରୋକିବା ଲାଗି ଜିଲାପାଳ ତଥା କ୍ଷମତାପ୍ରାପ୍ତ ଅଧିକାରୀ କେ. ସୁଦର୍ଶନ ଚକ୍ରବର୍ତ୍ତୀ ଏହି ଅବଧିକୁ ଆଉ ୭ଦିନ ବୃଦ୍ଧି କରିଛନ୍ତି । ପୂର୍ବରୁ ସେହି ଅଞ୍ଚଳରେ ଜାରି କରାଯାଇଥିବା ସମସ୍ତ କଟକଣା ଆସନ୍ତା ମେ’ ୨ ତାରିଖ ମଧ୍ୟରାତ୍ରି ପର୍ଯ୍ୟନ୍ତ ବଳବତ୍ତର ରହିବ ବୋଲି ଜିଲାପାଳଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ସେହିପରି ରବିବାର ପୂର୍ବାହ୍ନ ୧୦ଟା ପର୍ଯ୍ୟନ୍ତ ସମଗ୍ର ବାଲେଶ୍ୱର ଜିଲାରେ ଶଟଡାଉନ ଅବଧି ସରିଥିବା ବେଳେ ଜିଲାରେ ପୂର୍ବଭଳି ଲକ୍ଡାଉନ କଟକଣା ଜାରି ରହିବ ଏବଂ ଅତ୍ୟାବଶ୍ୟକ ସାମଗ୍ରୀ ଦୋକାନଗୁଡ଼ିକ ଦିନ ୨ଟା ପର୍ଯ୍ୟନ୍ତ ଖୋଲା ରହିପାରିବ ବୋଲି ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
