ବିହାରର ଫତେହପୁର ଗାଁ ଏବେ ସମ୍ପୂର୍ଣ୍ଣ ଭାବେ ଖୋଲା ଶୌଚମୁକ୍ତ। ଏହାର ସମସ୍ତ ଶ୍ରେୟ ଯାଉଛି ୪୫ ବର୍ଷୀୟ ଦୃଷ୍ଟିହୀନ ସାଧୁ ମାଝିଙ୍କୁ। ଯିଏକି ନିଜ ଘରେ ଶୌଚାଳୟ ତିଆରି କରିବା ସାଙ୍ଗକୁ ପୂରା ଗାଁକୁ ଖୋଲା ଶୌଚମୁକ୍ତ କରିବାର ସଚେତନତା ସୃଷ୍ଟି କରି ସଫଳ ହୋଇଛନ୍ତି। ପ୍ରଥମେ ଏହି ଗାଁର କୌଣସି ଲୋକଙ୍କ ଘରେ ଶୌଚାଳୟ ନ ଥିଲା। ଏମିତିରେ ଲୋକଙ୍କର ଖୋଲାରେ ଶୌଚ କରିବା ନିତିଦିନିଆ ଅଭ୍ୟାସରେ ପରିଣତ ହୋଇଥିଲା। କିନ୍ତୁ ମାଝି, ଯିଏକି ନେତ୍ରହୀନ ଥିଲେ। ତାଙ୍କ ପରିବାରରେ ମଧ୍ୟ ଶୌଚାଳୟ ନ ଥିଲା। ଦିନେ ଜଣେ ପଡୋଶୀଙ୍କଠାରୁ ଘରେ ଶୌଚାଳୟର ଫାଇଦା ସମ୍ପର୍କରେ ଶୁଣିବାକୁ ପାଇଲେ। ମନସ୍ଥ କଲେ ନିଜ ଝିଅବୋହୂଙ୍କ ଇଜ୍ଜତ ରକ୍ଷାପାଇଁ ସେ ସ୍ବଚ୍ଛ ଭାରତ ଅଭିଯାନ ଅନ୍ତର୍ଗତ ଶୌଚାଳୟ ନିର୍ମାଣ କରିବେ। ଦୃଷ୍ଟିହୀନ ହୋଇ ମଧ୍ୟ ଖୋଲା ଶୌଚମୁକ୍ତ କରି ନିଜ ପରିବାରକୁ ସୁରକ୍ଷିତ କରିବା ପରେ ଗାଁରେ ସଚେତନତା ସୃଷ୍ଟି କଲେ। ଗ୍ରାମବାସୀ ତାଙ୍କୁ ଓ ତାଙ୍କ ଲକ୍ଷ୍ୟକୁ ହୃଦ୍ବୋଧ କରି ନିଜ ନିଜ ଘରେ ଶୌଚାଳୟ ତିଆରି କଲେ।
