ନାଲ୍‌କୋ ସ୍ମେଲଟର ପୂର୍ବତନ ଜିଏମ୍‌ଙ୍କୁ ୨ ବର୍ଷ ଜେଲ
7:39 amSeptember 27, 2019 / 21

ଅନୁଗୋଳ ଅଫିସ, ୨୭।୯-ନାଲ୍‌କୋର ପୂର୍ବତନ ମହାପ୍ରବନ୍ଧକ ଶମ୍ଭୁ ଦୟାଲ ଚୌହାରିଆଙ୍କୁ ଅନୁଗୋଳ ଏସ୍‌ଡିଜେଏମ୍‌ କୋର୍ଟ ଗୁରୁବାର ଏକ ମାମଲାରେ ଦୋଷୀ ସାବ୍ୟସ୍ତ କରିଛନ୍ତି। ୨ ଜଣଙ୍କ ସାକ୍ଷ୍ୟ ପ୍ରମାଣକୁ ଭିତ୍ତି କରି ଜଜ୍‌ ବିଶ୍ୱଜିତ ନାୟକ ଚୌହାରିଆଙ୍କୁ ଦୁଇ ବର୍ଷ ଜେଲ ଦଣ୍ଡ ଶୁଣାଇଛନ୍ତି।
ମାମଲାର ବିବରଣୀରୁ ପ୍ରକାଶ, ୧୯୯୮ ଅଗଷ୍ଟ ୨୦ରେ ନାଲ୍‌କୋ ସ୍ମେଲଟର ପ୍ଲାଣ୍ଟରେ ରାଣୀଗୁଡ଼ା ଅଞ୍ଚଳର ବିକ୍ରମ ନାଏକ ବିନା ସୁରକ୍ଷା ସରଞ୍ଜାମରେ କାର୍ଯ୍ୟ କରୁଥିବା ବେଳେ ୨୦ ଫୁଟ ଉପରୁ ଖସି ପଡିଥିଲେ। ଏଥିଯୋଗୁ ତାଙ୍କର ମୃତ୍ୟୁ ଘଟିଥିଲା। ଘଟଣା ପରଦିନ ଫ୍ୟାକ୍ଟ୍ରିଜ୍‌ ଆଣ୍ଡ ବଏଲର୍ସ ଇନ୍ସପେକ୍ଟର ବି.ସି. ସ୍ବାଇଁ କୋର୍ଟରେ ମାମଲା ରୁଜୁ କରିଥିଲେ। ନାଲ୍‌କୋ କର୍ତ୍ତୃପକ୍ଷ କର୍ମଚାରୀଙ୍କ ସୁରକ୍ଷା ପ୍ରତି ଦୃଷ୍ଟି ନ ଦେଇ ସେମାନଙ୍କୁ କାର୍ଯ୍ୟରେ ଲଗାଉଥିବା ଅଭିଯୋଗ ପରେ ଫ୍ୟାକ୍ଟ୍ରି ନିୟମ ଅନୁଯାୟୀ ମାମଲାର ବିଚାର କରାଯାଇଥିଲା। ଘଟଣାରେ ତତ୍କାଳୀନ ମହାପ୍ରବନ୍ଧକ ଚୌହାରିଆଙ୍କୁ ଏହି ଦଣ୍ଡବିଧାନ କରାଯାଇଛି। ପରେ ତାଙ୍କୁ ବେଲ୍‌ ମିଳିଥିବା ସୂଚନା ମିଳିଛି। ଏହି ମାମଲାକୁ ଆସିଷ୍ଟାଣ୍ଟ କ୍ୟାଡର ପିପି ଜ୍ୟୋତିପ୍ରକାଶ ମହାପାତ୍ର ପରିଚାଳନା କରିଥିଲେ।