ଛେଣ୍ଡିପଦା,୨୩ା୬(ଡି.ଏନ.ଏ.) – ଅନୁଗୋଳ ଜିଲାର କେତେକ ଜଣାଶୁଣା ସ୍ଥାନକୁ ପର୍ଯ୍ୟଟନ ସ୍ଥଳୀର ମାନ୍ୟତା ମିଳିଥିଲେ ହେଁ ଆଉ କେତେକ ପ୍ରସିଦ୍ଧ ସ୍ଥାନ ରହିଯାଇଛି ସରକାରଙ୍କ ଦୃଷ୍ଟି ଆଢୁଆଳରେ। ସେଥିମଧ୍ୟରେ ରହିଛି ଛେଣ୍ଡିପଦା ବ୍ଲକ ଜରପଡା ଥାନା ଦୁର୍ଗାପୁର ଗ୍ରାମ ମଠମୁଣ୍ଡିଆ ପାହାଡ ଉପରେ ଥିବା ମା ବନଦୁର୍ଗାଙ୍କ ପୀଠ। ଜଙ୍ଗଲ ପାହାଡ ଘେରା ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଏହି ମନ୍ଦିରରେ ବର୍ଷ ତମାମ ଶ୍ରଦ୍ଧାଳୁଙ୍କ ଭିଡ ଜମୁଥିଲେ ହେଁ ଏହାକୁ ପର୍ଯ୍ୟଟନ ସ୍ଥଳୀର ମାନ୍ୟତା ପ୍ରଦାନ କରାଯାଉ ନ ଥିବାରୁ ଅସନ୍ତୋଷ ଉପୁଜୁଛି।
ମଠମୁଣ୍ଡିଆ ପାହାଡ ଉପରେ ରହିଛି ମା’ ଅପରାଜିତା ବନଦୁର୍ଗା ମନ୍ଦିର। ଜଙ୍ଗଲ ପାହାଡ ଘେରା ସୌନ୍ଦର୍ଯ୍ୟ ଏବଂ ପ୍ରାକୃତିକ ପରିବେଶ ମଧ୍ୟରେ ଥିବା ଏହି ଦେବୀ ପୀଠରେ ବର୍ଷର ସବୁ ସମୟରେ ଯାତ୍ରୀ ତଥା ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ଏହି ପାହାଡ ପାଦଦେଶରେ ରହିଛି ଜମେଇଝରଣ ଜଳସେଚନ ପ୍ରକଳ୍ପ। ପିକନିକ ଋତୁ ତଥା ନୂଆବର୍ଷ ପାଳନ କରିବା ପାଇଁ ଏହି ପୀଠ ଚଳଚଞ୍ଚଳ ହୋଇଥାଏ। ଏହା ସତ୍ତ୍ୱେ ପୀଠକୁ ପର୍ଯ୍ୟଟନ ସ୍ଥଳୀର ମାନ୍ୟତା ପ୍ରଦାନ କରାଯାଉ ନ ଥିବା ଅଞ୍ଚଳବାସୀ ପ୍ରକାଶ କରିଛନ୍ତି। ଏ ସମ୍ପର୍କରେ ସ୍ଥାନୀୟ ବିଧାୟକ, ସମ୍ବଲପୁର ଏମ୍ପି, ଅନୁଗୋଳ ଜିଲାପାଳଙ୍କୁ ମଧ୍ୟ ଲିଖିତ ଭାବେ ଜଣାଯାଇଥିଲେ ହେଁ କେହି ଦୃଷ୍ଟି ଦେଉ ନ ଥିବା ମନ୍ଦିର ପରିଚାଳନା କମିଟି ମୁଖ୍ୟ ଅକ୍ଷୟ କୁମାର ପଟ୍ଟନାୟକ, କେଦାରନାଥ ପ୍ରଧାନ, ଜୟଦେବ ବୁର୍ଗୀ, ଅସିତ କୁମାର ପଟ୍ଟନାୟକ, ରାମଚନ୍ଦ୍ର ସାହୁ, କନ୍ଦର୍ପ ସାହୁ, ହୃଦାନନ୍ଦ ସାହୁ, କପିଳା ସାହୁ ପ୍ରମୁଖ ଅଭିଯୋଗ କରିଛନ୍ତି। ଉପରୋକ୍ତ ସ୍ଥାନକୁ ଜିଲା ପର୍ଯ୍ୟଟନ ବିଭାଗ ପକ୍ଷରୁ ପର୍ଯ୍ୟଟନ ସ୍ଥଳୀର ମାନ୍ୟତା ପ୍ରଦାନ କରିବା ପାଇଁ ସେମାନେ ଦାବି କରିଛନ୍ତି। ଅନ୍ୟ ପକ୍ଷରେ ଦୁର୍ଗାପୁର ପଞ୍ଚାୟତ ଟାଙ୍ଗିରିସାହି ଗ୍ରାମ ନିକଟସ୍ଥ ଦାନ୍ତିଆଣୀ ପାହାଡ, ଜେରେଙ୍ଗ ଦେହୁରୀ ସାହି ମା’ ବୁଢ଼ୀ ପାହାଡ ପାଦଦେଶରେ ଥିବା ଦେବାଦେବୀ ପୀଠ, କୋରଡା ପଞ୍ଚାୟତ ଝିଣ୍ଟିପାଳ ଗ୍ରାମରେ ଥିବା ବୀରେଶ୍ୱର ମହାଦେବ ଅଷ୍ଟଶମ୍ଭୁ ମନ୍ଦିର, ବାଲିପଟା ପଞ୍ଚାୟତ କିସିଣ୍ଡା ଗ୍ରାମ ନିକଟସ୍ଥ କାଶବାଶ ଜଳସେଚନ ପ୍ରକଳ୍ପ, ଚାଙ୍ଗୁଡିଆ ପଞ୍ଚାୟତ ବଡବେରେଣା ଜଙ୍ଗଲ ମଧ୍ୟରେ ଥିବା ଉଷ୍ମ ପ୍ରସବଣ ଆଦି ସ୍ଥାନକୁ ଜିଲା ପର୍ଯ୍ୟଟନ ମାନଚିତ୍ରରେ ସ୍ଥାନ ଦେବାକୁ ସବୁ ଦାବି ହୋଇଛି।
